Ezabbuli 143 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Dawudi.

¹ O Musengwa, ŋulira ohusaba hwange, ŋulira ohwerira hwange, ŋulira wupambire ehisa, mu wawufu wuwo ŋulira ohwerira hwange, ngobolemo ngʼolu oli mwesigwa.

² Otasalira muŋeeresa wuwo musango humusinga olwohuba eŋuma muutu ahola ebiruŋamu mu moni jijo.

³ Omulabe ali humbinga gafulyafulihiisya mwiroba era agira ni menya mu hiirema hyʼabaafa ahale.

⁴ Ehyo hireetera obulamu wange ohunafuŋa era omwoyo gwange mweralihirifu.

⁵ Kebulira endaalo ejahale peega hu byosibyosi ebi wahola, ebi wahola nʼemihono jijo.

⁶ Kugololera emihono jange ni saba, omwoyo gwange guhuli nduŋo, hyʼeroba eriŋalahaaye olwʼohuŋuma amaaji.

⁷ O Musengwa, ngobolemo mangu olwohuba poyeemo amaani. Otakubba mugongo, kanda naaba hyaba batiina e magombe.

⁸ Hiisi mu mugamba kebulisenga ohwenda huhwo ohubitiirifu olwohuba nesiga ndiiwe. Ndage engira eyi ndi nʼohugenderamo olwohuba ndiiwe oyu ndengereeye ohutangirira.

⁹ O Musengwa, nunule ohuŋwa mu balabe bange olwohuba ndiiwe omuneŋogoma.

¹⁰ Somese ohuhola ebi wenda olwohuba ndiiwe Hatonda wange. Mwoyo wuwo omulaŋi gatangirire mu ngira enuŋamu.

¹¹ O Musengwa, olwʼesiina liryo, huuma obulamu wange mu wawufu wuwo, tuse mu bigosi.

¹² Olwʼohunyenda obugali, ŋolereesa abalabe bange, sihiirisa abalabe bange bosibosi olwohuba ndi muŋeeresa wuwo.