Ezabbuli 141 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Dawudi.

¹ O Musengwa, kweriririra nja mangu wunjeede. Ŋulira ejanjaasi lyange ni kulanga.

² Leha ohusaba hwange hwole eyi oli hyʼobubbaani, leha ohugolola emihono jange hube hyʼeŋongo eyi baŋayo egulo.

³ O Musengwa, njeede ohusengeeja ebibono byange, ŋuga olulimi lwange.

⁴ Leha omwoyo gwange gutagotanira mu hibi ohwenyigira mu bikolwa byʼabahosi bʼebibi, leha talya hu binoli byawe.

⁵ Leha omuutu omugwalaafu gapemo endabusi, aba gandagire ehyere. Anakangavula, hiba hyʼamafuta agʼekabi hu mutwe gwange, sinja hugaana olwohuba mu husaba hwange, soosa ebikolwa bya bahosi bʼebibi.

⁶ Balidanya abaŋugi baawe ŋaasi ohuŋwa ŋamugulu hu lusozi era abahola ebibi balimanya baati ebi ndoma byolerera.

⁷ Ngʼolu boŋaania eroba ni balima, nʼamagumba geefe baligoŋania hu magombe.

⁸ Aye O Musengwa Omwene Buŋangi, emoni jange njitaaye hu ndiiwe, ndiiwe omuneŋogoma, otandeha hufa.

⁹ Kingirise emitego eji bategire, ohuŋwa mu lutuula olu bahosi bʼebibi baategire.

¹⁰ Leha abahosi bʼebibi abeene bagwe mu mitego jaawe eji bategire, ese ni nebitira hwebitira.