Ezabbuli 14 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli ya Dawudi.

¹ Omuŋubeebe aloma mu mwoyo gugwe ati, “Ŋaŋumaaŋo Hatonda.” Bahosi bʼebibi, ebi bahola byambiho. Era ŋaŋuma wayire mulala ahola ehiraŋi.

² Musengwa aba mwigulu galengerera baatu ŋaasi hu hyalo, abone oba ŋaliŋo omuutu yesiyesi ategeera, yesiyesi amwendula.

³ Aye bosibosi baaŋaba, bosibosi ŋalala bahola ebibi. Era eŋuma wayire mulala ahola ebiruŋamu.

⁴ Abahosi bʼebibi, sibaja hwega? Bahenireŋo ohulya abaatu bange oti balya mere era sibasunga Musengwa ohubayeeda.

⁵ Aye bulihya lulala jabagaana olwohuba Hatonda ali ŋalala ni naabo abahola ebiruŋamu.

⁶ Enywe abahosi bʼebibi muhayisa etegeha jʼabagadi aye Musengwa ahuuma ababe.

⁷ Era saba ti omuutu aŋwe mu Sayuuni anunule Yisirayiri! Musengwa nʼaligobosa abaatu babe bunyaaha, leha olulyo lwa Yakobbo lusangaale era Yisirayiri asaŋalye!