Ezabbuli 138 - Endagaano Epyaha ko n'ebitabo ebindi eby'Endagaano Ekayire mu Lunyole

Ya Dawudi.

¹ O Musengwa, nja huhujumiryanga nʼomwoyo gwange gwosigwosi, nja hwemba ni kujumirya mu moni ja bahatonda.

² Nja huhubba amafuha ni nengereeye Yekaalu yiyo enjawufu era nja hujumirya esiina liryo olwʼohwenda huhwo ohubitiirifu nʼowesigwa wuwo olwohuba ebiitu byosibyosi biri ŋaasi wʼesiina liryo nʼehibono hihyo.

³ Ni nahulanga, wangobolamo, wafuula musira era wangumya.

⁴ O Musengwa, abahabaha bosibosi mu hyalo bahujumiryenga, hiisi olu banaŋulirenga ebibono bibyo.

⁵ Baja hwemba hu ebi Musengwa ahola, Musengwa wʼeŋono bugali.

⁶ Wayire Musengwa ali ŋamugulu, alabirira aba banyooma aye ali ŋaleeŋi nʼabepaahapaaha.

⁷ Wayire ngenda ebigosi ni binetolooye aye ohuuma obulamu wange. Oŋiriŋania abasigu bange, omuhono gugwo njʼoguponia.

⁸ Musengwa aja hwoheresa ehigendererwa hihye mu bulamu wange, O Musengwa, ohwenda huhwo hubitiirifu emirembe nʼemirembe. Otatwesamba olwohuba watutonda.