Ezabbuli 119 - Endagaano Epyaha ko n'ebitabo ebindi eby'Endagaano Ekayire mu Lunyole1 Bali nʼekabi abo abahola ebiraŋi abagondera amagambi ga Musengwa. 2 Bali nʼekabi abo abahuuma ebiragiro bibye, era bamwendula nʼomwoyo gwawe gwosigwosi. 3 Era sibahola hibi bagendera mu magira gage. 4 O Musengwa, watuŋa amagambi gago era watulagira ohugagonderanga. 5 Nahendire negumye ohugondera amagambi gago! 6 Naŋeegenga hu biragiro bibyo ehyo hyahandeetera ohutaswala. 7 Nja huhujumirya nʼomwoyo ogwʼamazima, ni neega esala yiyo eyʼemisango nʼotehubbira. 8 Nja hugonderanga ebiragiro bibyo, otakubba mugongo. 9 Omuvubuka asobola atye ohwehuuma ko asobole ohweŋala ohuhola ehibi? Gehuuma nʼagondera ehibono hihyo. 10 Kwendula nʼomwoyo gwange gwosigwosi, otandeha huŋaba ohuŋwa hu biragiro bibyo. 11 Kwehire ehibono hihyo mu mwoyo gwange, ko tabbenga mu moni jijo. 12 O Musengwa, oŋeewe eŋono, somese ebiragiro bibyo. 13 Nʼejanjaasi eryaŋamugulu ndoma hu ebyo byosibyosi ebi watulabbira. 14 Hisangaasa ohugondera ebiragiro bibyo ngʼolu muutu asangaala olwʼobuŋinda obungi. 15 Omwoyo gwange guŋeega hu biragiro bibyo era nehenenya ebi wusomesa. 16 Sangaalira ebiragiro bibyo, sinjahwerabira ehibono hihyo. 17 Bisya bulaŋi omuŋeeresa wuwo, ko mbeŋo mulamu, nja hugondera ehibono hihyo. 18 Njigule emoni jange nahabona ebyeŋunjisa, ebiri mu magambi gago. 19 Ndi mulugendwa hu hyalo huno, otakweha biragiro bibyo. 20 Omwoyo gwange guŋemba hu magambi gago hiisi hiseera. 21 Ohangavula abehudumbasa, abaŋwabe era ababbaama baŋwa hu biragiro bibyo. 22 Otabaleha hunduha nʼohunyooma olwohuba nʼoheresa ebiragiro bibyo. 23 Wayire abatangirisi behala ŋalala bandomaho bubi, ese omuŋeeresa wuwo naŋembenga hu biragiro bibyo. 24 Ebiragiro bibyo njʼesangaalo lyange, era njʼebiipa ehyohuholeraho. 25 Obulamu wange buli huupi hutiina emayeera, ngobose bunyaaha ngʼolu wasuubisa. 26 Nebbwaga olwʼebibi ebi nahola byosibyosi, era wasaasira, somese ebiragiro bibyo. 27 Njeede nahategeera amagambi gago, sobole ohuŋembanga hu somesa yiyo eyeŋunjisa. 28 Omwoyo gwange gwejuuye enaku, ngalusemo amaani ngʼolu wasuubisa. 29 Kingirise tagendera mu magira amacaamu, pambire ehisa wusomese amagambi gago. 30 Salireeŋo ohubanga wʼamazima, era ebiŋeego byange mbitaaye hu magambi gago. 31 Kolera hu biragiro bibyo, olwʼehyo Musengwa otandeha huswala. 32 Nja hugondera ebiragiro bibyo olwohuba wunjeeda ohubitegeera. 33 O Musengwa, somese ohugondera amagambi gago, sobole ohugaholerangaho habuhyabuhya. 34 Njeede ohutegeera amagambi gago, hija hundeetera ohugagonderanga nʼomwoyo mulala. 35 Njeede ohugonderanga ebiragiro bibyo, olwohuba ehyo hindeetera esangaalo. 36 Cuusa omwoyo gwange guŋembenga hu biragiro bibyo, sosi ohululuhanira obuŋinda. 37 Kuume ohutaŋembanga hu biitu ebiŋuma mugaso aye ohuume obulamu wange ngʼolu wasuubisa. 38 Yoheresa ebi wasuubisa omuŋeeresa wuwo ko abaatu bahahutya. 39 Tuseho eduho olwohuba nditya, ngʼendamula yiyo yʼamazima! 40 Nga peega bugali hu biragiro bibyo! Kusunga wuupe obulamu obunyaaha olwohuba oli mwawufu. 41 O Musengwa, ndage ohwenda huhwo era wunoŋole ngʼolu wasuubisa. 42 Nja hugobola mu abo abanduula olwohuba nesiga ehibono hihyo. 43 Otatusamo hibono hihyo olwohuba hyʼamazima era esuubi lyange liri mu magambi gago. 44 Nja hugonderanga amagambi gago emirembe nʼemirembe. 45 Nja huba mu dembe, olwohuba fubaho ohuŋamba ebiragiro bibyo. 46 Esoni sijija hupamba ohulomera abahabaha ebiŋamba hu magambi gago. 47 Ebiragiro bibyo bisangaasa olwohuba binesiimisa. 48 Ebiragiro bibyo mbiŋa eŋono era mbyenda nja huŋeeganga hu biragiro bibyo. 49 Hebulira ehi wasuubisa omuŋeeresa wuwo era ehyo hiipa esuubi. 50 Ehingumya mu hubonaabona hwange, cʼehino ti wasuubisa ohukuuma. 51 Abaatu abepaahapaaha basiiba banjeeja ni batalehera aye sinja huŋwa hu magambi gago. 52 O Musengwa, kebulira esala yiyo eyʼemisango era esala eyo yingumya. 53 Hipambya obusungu, ni mbona ababi ni babbwaga amagambi gago. 54 Amagambi gago njʼomulamwa gwʼolwembo lwange hiisi aŋa mba. 55 O Musengwa, mu wiire kuhebulira era nja huhuumanga amagambi gago. 56 Era eyo njʼebaaye ekola yange, ngondera ebiragiro bibyo. 57 O Musengwa, ndiiwe owange, nasuubisa ohugonderanga ebibono bibyo. 58 Kwegayiriiye nʼomwoyo gwange gwosigwosi, pambire ehisa ngʼolu wasuubisa. 59 Ni nehubba mu hifuba hu ngeri eyi ŋendamo, suubisa ohuhuuma ebiragiro bibyo. 60 Sinja husidihamo, nja hwanguŋa ohugondera ebiragiro bibyo. 61 Wayire abahosi bʼebibi bakaada emigoye, sinja hwibirira magambi gago. 62 Mu wiire ŋagati ninyoha nahweyaasa olwʼamagambi gago amawufu. 63 Ndi nʼomuhumba eyiri abo bosibosi abahutya abo abagondera ebiragiro bibyo. 64 O Musengwa, olagire baatu hu hyalo ohwenda huhwo, somese ebiragiro bibyo. 65 O Musengwa, holera omuŋeeresa wuwo ebiraŋi ngʼolu wasuubisa. 66 Pe amagesi nʼohutegeera, olwohuba nesiga ebiragiro bibyo. 67 Ni waali nʼohiiri humboneresa nabbama, aye ŋaahani ngondera ehibono hihyo. 68 Oli mulaŋi era ebi ohola biraŋi byereere, somese ebiragiro bibyo. 69 Wayire abepaahapaaha bapahire esiro aye kuuma ebiragiro bibyo nʼomwoyo mulala. 70 Emyoyo jaawe mihahanyafu era jasiriŋala, aye ese sangaalira amagambi gago. 71 Wahola bulaŋi ohupaamo endabusi, hyanjeeda ohwega amagambi gago. 72 Amagambi gago gamuŋendo bugali ohusinga eduuli lyʼezaabbu nʼefeeza. 73 Wamumba nʼengalo jijo olwʼehyo pe ohutegeera nahamanya ebiragiro bibyo. 74 Leha abo abahutya basangaale ni bambwene, olwohuba esuubi lyange liri mu hibono hihyo. 75 O Musengwa, manyire ti amagambi gago mawufu era wamboneresa olwohuba oli mwesigwa. 76 Leha ohwenda huhwo ohubitiirifu hungumye, ngʼolu wasuubisa omuŋeeresa wuwo. 77 Pambire ehisa, sobole ohuba nʼobulamu, olwohuba sangaalira amagambi gago. 78 Leha abepaahapaaha baswale olwʼohunjolonga aŋaŋuma ehi kolire aye nja huŋeeganga hu biragiro bibyo. 79 Leha abo abahutya baaje eyi ndi, abo abategeera ebiragiro bibyo. 80 Njeede ohuŋamba ebiragiro bibyo, ko nahaŋona ohuswala. 81 O Musengwa, omwoyo gwange guŋemba hu bunoŋosi wuwo aye esuubi lyange liri mu hibono hihyo. 82 Emoni jange jidembire ohuhuumirira ohubona ehi wasuubisa, nebuusa ti, “Olinjeeda ŋaali?” 83 Wayire fuuhire hyʼesaŋu yʼehyanjo eyiŋuma mugaso, sinibiriranga biragiro bibyo. 84 Omuŋeeresa wuwo aja huhuumirira hwosa ŋe? Oligudya ŋaali abakiyaania? 85 Abepaahapaaha, sibagondera magambi gago, banjabiiye amaloŋo mbo ngwemo. 86 Ebiragiro bibyo byosibyosi mbyesiga. Njeede olwohuba abaatu bakiyaania aŋaŋuma hibi hyosihyosi ehi kola. 87 Ŋabulira ŋatono ohukenaŋo hu hyalo, aye sipwanga hu biragiro bibyo. 88 Olwʼohunyenda ehibitiiriye, huuma obulamu wange butagota, nja hugonderanga ebiragiro bibyo. 89 O Musengwa, ehibono hihyo hyʼemirembe nʼemirembe, era hiri mwigulu. 90 Owesigwa wuwo wahweyongera ohubaaŋo mu hiisi mulembe, watongosa ehyalo era sihitenga. 91 Ebiragiro bibyo bisigala ni biri bituufu, olwohuba ebiitu byosibyosi bihuŋeeresa. 92 Amagambi gago gabanga ni gatasangaasa, hani nasihiirihira mu hubonaabona ohu naalimo. 93 Sinja hwibirira biragiro bibyo olwohuba njʼebigira nʼohuumire obulamu wange. 94 Noŋole olwohuba ndi wuwo, fubaho ohwoheresa ebiragiro bibyo. 95 Abahosi bʼebibi bahuumiriiye ohukenaŋo aye naŋembenga hu biragiro bibyo. 96 Ebiitu byosibyosi biri nʼaŋabihoma aye ebiragiro bibyo biŋuma hyagamo. 97 Nga nenda amagambi gago bugali! Ngaŋembaho hiisi hiseera. 98 Ebiragiro bibyo bifuula omugesi, ohusinga abalabe bange. Hiri hiityo olwohuba hiisi hiseera mbebi ngenderaho. 99 Tegeera bingi nʼohuhiraho abasomesa bange bosibosi, olwohuba peega hu biragiro bibyo. 100 Ndi nʼohutegeera ohusingaho abakiraho obuhulu mu myaha, olwohuba ngondera amagambi gago. 101 Nehuumire ohutagendera mu ngira embi, ko nahasobola ohugondera ehibono hihyo. 102 Sindehuliranga magambi gago olwohuba ewe wamwene wusomehiise. 103 Ngʼebibono bibyo bipoomera, biŋooma ohuhira omudugere. 104 Amagambi gago gafuula mugesi, olwʼehyo caawa esambo embi. 105 Ehibono hihyo taala yʼamagulu gange, njase eyimuliha mu ngira yange. 106 Ndayira era kihahasa ti, nja hugondera amagambi gago amawufu. 107 O Musengwa, mbweneweene bugali, huuma obulamu wange ngʼolu wasuubisa. 108 O Musengwa, fugiirira ohuhujumirya hwange era wusomese amagambi gago. 109 Wayire ndi mwetegefu ohuŋaayo obulamu wange, sinja hwibirira magambi gago. 110 Abahosi bʼebibi bategire omutego, aye sipwanga hu biragiro bibyo. 111 Ebiragiro bibyo njʼomuhemba gwange emirembe nʼemirembe, era njʼesangaalo lyʼomwoyo gwange. 112 Nasalaŋo mu mwoyo gwange ohugonderanga ebiragiro bibyo ohwola olu ndifa. 113 Caawa abaatu abemeerera nʼohugulu hulala eyi neeyi, aye ese nenda amagambi gago. 114 Ndiiwe omu neŋogoma era engabo yange, nesiga ebi wasuubisa. 115 Mupwereŋo enywe ababbengi, nahahuuma ebiragiro bya Hatonda wange. 116 Pe amaani ngʼolu wasuubisa, mbe mulamu, otandeha nasuubirira wereere. 117 Panirire era nja huŋunuha, hiisi hiseera naŋembenga hu biragiro bibyo. 118 Ocaawa abo bosibosi abaŋwa hu biragiro bibyo, era etegeha jaawe jiŋuma mahulu. 119 Abahosi bʼebibi bosibosi hu hyalo obabisya hyʼebisasiro olwʼehyo nenda ebiragiro bibyo. 120 Omubiri gwange guteetema olwʼohuhutya, olwʼengeri eyi osalamo emisango. 121 Kolire ebiraŋi era ebisaana, otapayo mu mihono jʼabalabe bange. 122 Yeeda omuŋeeresa wuwo, otaleha abepaahapaaha ohunyigirisa. 123 Emoni jange jidembire ohuhuumirira ohubona obunoŋosi wuwo obu wasuubisa. 124 Ŋamba omuŋeeresa wuwo nʼehisa, era wusomese ebiragiro bibyo. 125 Ndi muŋeeresa wuwo, pe amagesi, nahategeera ebiragiro bibyo. 126 O Musengwa, hino njʼehiseera ohubaaho nʼehyohola, olwohuba abaatu bali hubbwaga amagambi gago. 127 Hiri hiityo olwohuba nenda ebiragiro bibyo ohuhiraho ezaabbu, ezaabbu enongose obugali, 128 era olwohuba pira ebiragiro bibyo ohuba ebituufu, caawa amagira amabi gosigosi. 129 Ebiragiro bibyo byeŋunjisa, olwʼehyo mbigondera. 130 Esomesa yʼehibono hihyo, ereeta ohutegeera eyiri abo abatamanyire. 131 Ndahalaha olwʼohwenda ebiragiro bibyo. 132 Kejeho wupambire ehisa, ngʼolu habuhyabuhya oholera abo abahwenda. 133 Luŋamya amagulu gange ngʼolu wasuubisa, ŋaŋumeŋo ehibi ehiŋuga obulamu wange. 134 Noŋole mu hunyigirisiwa hwʼabahosi bʼebibi, sobole ohugondera ebiragiro bibyo. 135 Ŋambira omuŋeeresa wuwo ehisa, era wusomese ebiragiro bibyo. 136 Ndira amasiga bugali, olwohuba abaatu sibagondera magambi gago. 137 O Musengwa, oli mwawufu, era amagambi gago matuufu. 138 Amagambi aga wataŋo matuufu, era gesigiwa. 139 Obusungu wange wohyerera mugati hyʼomuliro olwohuba abalabe bange sibafa hu bibono bibyo. 140 Ebisuubiso bibyo babigezesya bulaŋi weene era omuŋeeresa wuwo abisiima. 141 Wayire puma mugaso era banyooma, sipanga hwibirira biragiro bibyo. 142 Oli mwesigwa emirembe nʼemirembe era amagambi gago matuufu. 143 Ngwiriiye ebigosi nʼohubonaabona, aye ebiragiro bibyo njʼebisangaasa. 144 Ebiragiro bibyo bituufu emirembe nʼemirembe. Pe ohutegeera nahaba nʼobulamu. 145 O Musengwa, kwegayirira nʼomwoyo gwange gwosigwosi, ngobolemo, nja hugondera amagambi gago. 146 Kwegayirira, noŋole era nja hugonderanga amagambi gago. 147 Puuna pwipwipwi, nahweririra wunjeede esuubi lyange nditaaye mu hibono hihyo. 148 Sinimba hwiro owiire wosiwosi olwohuba mba mu huŋeega hu ebi wasuubisa. 149 O Musengwa, ŋulira ehi ndoma olwʼohunyenda era huuma obulamu wange olwʼebiragiro bibyo. 150 Abo abaŋuuna ohugunjaŋo amagira amabi, bandi ŋaapi, aye bali ŋaleeŋi nʼamagambi gago. 151 Ne O Musengwa, oli ŋalala ni nange, era ebiragiro bibyo byosibyosi bituufu. 152 Ohuŋwa ahale neega ebiragiro bibyo, ti wabitaŋo ohubaaŋo emirembe nʼemirembe. 153 Bona ngʼolu mbonaabona wununule, olwohuba sinibiriranga magambi gago. 154 Tereeŋo ahabega wununule, huuma obulamu wange ngʼolu wasuubisa. 155 Abahosi bʼebibi sibaja hunoŋoha olwohuba sibagondera biragiro bibyo. 156 O Musengwa, oli nʼehisa hingi, huuma obulamu wange ngʼolu hiri mu magambi gago. 157 Ndi nʼabakiyaania bangi, aye sipwe hu biragiro bibyo. 158 Ni mbona abaatu abatafugiirira, pulira obulumi mu mwoyo gwange olwohuba sibagondera hibono hihyo. 159 O Musengwa, bona ngʼolu nenda ebiragiro bibyo huuma obulamu wange olwohunyenda. 160 Ebibono bibyo byosibyosi byʼamazima, amagambi gago gosigosi maawufu era gʼemirembe nʼemirembe. 161 Abaŋugi bakiyaania aŋaŋuma songa, aye ehibono hihyo njʼehiteetemya. 162 Ebi wasuubisa bisangaasa hyʼomuutu owangala ebyʼobuŋinda ebyʼamaani. 163 Caawira erala obudulingi aye nenda amagambi gago. 164 Hiisi ludaalo kujumirya emirundi musanvu olwohuba osala emisango nʼotehubbira. 165 Abenda amagambi gago bali nʼemiyaaya ejʼamaani era ŋaŋuma ehisobola ohubaleetera ohwegumula. 166 O Musengwa, suubirira mu ndiiwe ohununula era ngondera ebiragiro bibyo. 167 Ngondera ebiragiro bibyo olwohuba mbyenda bugali. 168 Ngondera ebiragiro bibyo nʼamagambi gago olwohuba omanyire amagira gange gosigosi. 169 O Musengwa, ŋulira ohulira hwange, pe ohutegeera ngʼolu wasuubisa. 170 Ŋulira ohweŋundera hwange, nunule ngʼolu wasuubisa. 171 Nahujumiryenga hiisi hiseera olwohuba wusomesa ebiragiro bibyo. 172 Nembenga ehibono hihyo, olwohuba ebiragiro bibyo byosibyosi byawufu. 173 Wetegehe ohunjeeda olwohuba nasalaŋo ohuŋamba ebiragiro bibyo. 174 O Musengwa, nesunga obunoŋosi wuwo, era amagambi gago nja gasangaasa. 175 Leha mbe mulamu sobole ohuhujumiryanga era leha amagambi gago ganjeede. 176 Mbamire hyʼetaama eyigotire yendula omuŋeeresa wuwo, olwohuba sinibiriranga biragiro bibyo. |
© Wycliffe Bible Translators, Inc.
Wycliffe Bible Translators, Inc.