Engero 6 - Endagaano Epyaha ko n'ebitabo ebindi eby'Endagaano Ekayire mu Lunyole

Obubi wʼohweyimirira abandi

¹ Mwana wase, singa weyimirira owahyo olwʼebbanja, nʼoba nʼofugiiriye ohumuteraŋo omusingo ohumuŋola,

² singa weboŋa olwʼendagaano yiyo ebibono ebi waloma ebyene byahuboŋa,

³ wedanya mu mihono jije. Olwʼehyo otiinanga wamwegayirira afugiirire musalemo endagaano.

⁴ Otagayaalanga huhihola otaŋuumula nʼohiiri huhihola.

⁵ Wefubengaho hyʼenjobe olu yefubaho embiro ohuŋona omuŋiimi, hyʼenyuni egululuha ohuŋwa mu lubanjo.

Ohweŋala obudoto

⁶ Mudoto ewe, ŋeega hu kola yʼamage ohene weege ogobolemo amagesi.

⁷ Amage gaŋuma mutangirisi wayire muŋugi oba nyapala,

⁸ aye gahola nʼamaani ohwendobooli gewungira emere eyi galya ohwefula.

⁹ Kale mudoto ewe olyosa ŋe ohuŋenyuha? Oja huŋwa ŋaali mwiro?

¹⁰ Oŋosa oti, “Leha punguleho ahalo ŋatotono, pongereho ŋatotono, pumuleho ŋatotono,”

¹¹ aye obugadi wuja huhugwira hyʼomwibi, obugadi bulihulumba hyʼomutemu.

¹² Abaatu abaŋuma mugaso era abahosi bʼebibi batiina hiisi ŋaatu ni bageesya syetu.

¹³ Bahola obubonero wʼobudulingi ni baminanira emoni, ni banyeenya amagulu era ni basoosya nʼolwala.

¹⁴ Abahosi bʼebibi bategeha huhola bibi mu mwoyo jaawe era sibalehera huleeta bigosi.

¹⁵ Ebi bahola bija hubaŋweramo ebigosi ni batamanyire era baja husihiiriha ni ŋaŋuma huŋona.

¹⁶ Ŋaliŋo ebiitu mukaaga ebi Musengwa acaawa, biri musanvu ebyʼembiho eyi ali,

¹⁷ ekeja eyʼamalala nʼebibono ebyʼobudulingi nʼobutemu

¹⁸ nʼomwoyo ogupanga ekwe nʼohudulumirira ohuhola ebicaamu,

¹⁹ omujulizi ajofumula ebyʼobudulingi, nʼomuutu aleeta ohutawuujuha mu mago.

Ohulabula ohuŋamba hu buhwedi

²⁰ Mwana wase, oŋambanga ebiragiro bya lataawo era solehanga ebi maawo ahusomesa.

²¹ Ebibono ebyo obihuumanga hu mwoyo gugwo obyesidihanga mu mamiro.

²² Bija huhuluŋamyanga nʼogenda bija huhuhuumanga nʼoŋenyuhire era bija hulomanga ni neewe nʼosisimuhire,

²³ olwohuba ebiragiro biri hyʼetaala ohuhuŋa enjase, bija huhusomesa ohufuga owongo nʼohuhutangirira mu ngira eyʼobulamu.

²⁴ Bija huhutaasa omuhasi omuhwedi, bihutuse hu muhabeene ali nʼebibono ebihongeresa.

²⁵ Otegombanga buŋoono wuwe otaleha keja yʼemoni jije huhuhongeresa.

²⁶ Omuhasi malaaya bamugula hu bbeeyi yʼemere aye ohwenda muhabeene hihuleetera ohufiirwa obulamu wuwo.

²⁷ Omuutu aŋanga gagegera hu hifuba hihye amanda agekeeka, engoye jije ndijinye?

²⁸ Oba omuutu asobola ohugendera hu manda agekeeka amagulu ndigababuhe?

²⁹ Pohiri hiityo nʼomuutu aŋenyuha ni muhabeene, hiisi ahihola baja humuboneresa.

³⁰ Singa omuutu geeba olwohuba abaaye afa enjala, sibamusoniŋa.

³¹ Singa bamuŋamba, aja huliŋa emirundi musanvu nʼolu hiba ti ali nʼohutunda ebi ali ni nabyo mu mago gage byosibyosi.

³² Aye ahwedesania ni muha owahye aba muŋubeebe. Oyo ahihola, asihiirisa bulamu wuwe omwene.

³³ Bali mwosaho ebisago era balimutala ehiswalo ehi aliba nʼasunire sihirimuŋwaho,

³⁴ olwohuba ewuba lyʼomusinde omwene muhasi muhambwe era saaliba nʼehisa ni gegalula.

³⁵ Salifugiirira ndiŋi, saaja huŋira mutango wayire mubbala guutye.