Engero 31 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Ebibono bya habaha Lamweli ebi nyina gamusomesa ati:

² “O mwana wase! O mwana owomu mala gange, omwana oyu nasaba ko nahusaala, olwʼehyo pulirise.

³ Soheneranga maani gago hu bahasi basihiirihise abahabaha.

⁴ O Lamweli wange sihiraŋi abahabaha ohunywa omwenge oba abaŋugi ohuŋemba hu himeesa

⁵ olwohuba ni banywa berabira amagambi, basigalaŋo ni banyigirisa abagadi.

⁶ Omwenge oguŋanga abo abadembereye abo abaŋuma suubi mu bulamu waawe.

⁷ Leha banywe berabire obugadi waawe era batahebulira bigosi ebi bali ni nabyo.

⁸ Banga janjaasi lyʼabo abatasobola hweromereraho era osolererenga abo abaŋuma abayeeda.

⁹ Banga janjaasi era obe mulamuzi atehubbira solehereranga abagadi nʼabali mu wetaavu.”

Omuhasi owʼesambo endaŋi

¹⁰ Njʼani asobola ohuvumbula omuhasi owʼesambo endaŋi? Omuhasi hyʼoyo wamuŋendo, ohuhira amabaale agebbeeyi bugali.

¹¹ Wamwe amwesigira erala era ŋaŋumaaŋo ehyʼomuŋendo ehi aŋuma.

¹² Omuhasi oyo aholera wamwe ebiraŋi byereere era ŋaŋuma hibi ehi amwosaho mu bulamu wuwe wosiwosi.

¹³ Afululuhana nʼengalo jije gatunga engoye ohuŋwa mu mooya gʼetaama ko nʼeja laasi.

¹⁴ Era omuhasi oyo ali hyʼemeeri, eyireeta emere ohuŋwa engereha wʼenyanja.

¹⁵ Genyoha mu mugamba pwipwipwi, gategehera amago gage emere era galaabbira abaŋeeresa babe abahasi ehyʼohuhola.

¹⁶ Nʼabona ehibanja gahyegomba ahigula era atambisa ebbeesa jije ngʼahomaamo emizabbibbu.

¹⁷ Ali nʼamaani era mutambi wʼemirimo emihono jije simidoto.

¹⁸ Gefaaho ohubona ati hiisi ehi ahola himuleetera amagoba era ahola ohwirisa owiire.

¹⁹ Getungira engoye jije omwene.

²⁰ Ali nʼehyere eyiri abagadi era ayeeda abali mu wetaavu.

²¹ Mu biseera ebyʼobuŋololohi obubitiirifu niye saatya olwohuba abomu mago gage bosibosi bali nʼebyambalo ebyʼembeŋo.

²² Omwene getungira amasuuka era gambala engoye eja laasi nʼeja namasyoma.

²³ Wamwe amanyiheene bugali era ngʼomutangirisi, abaatu bamuŋa eŋono mu hibuga.

²⁴ Omuhasi oyo atunga engoye eja laasi ko nʼemisibiro ngʼajitunda agusa abasubuuzi.

²⁵ Wʼamaani era abaatu bamuŋa eŋono saatya ehiija mu moni.

²⁶ Aloma nʼamagesi agʼehikugu era alaga ehisa nʼabuulirira.

²⁷ Alabirira abomu mago gage era saŋuuna hulera ngalo.

²⁸ Abaana babe basiima ebi ahola era wamwe amusiima, gamutenderesa.

²⁹ Amuloma ati, “Eriyo abahasi bangi abaholire ebiitu ebyʼamaani hu hyalo huno aye ewe obahira bosibosi!”

³⁰ Emboneha yʼomuhasi yisobola ohuhudulinga era obuŋoono wuwe buŋwaŋo aye omuhasi atya Musengwa bamuŋenga eŋono.

³¹ Mumuŋe omuhemba era olwʼebiitu ebi aholire, mumuŋenga eŋono mu lwijuuye.