Engero 26 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Ngʼolu obuŋololohi butabaŋo mu hiseera hyʼomumwi nʼefula ngʼolu etasaana hutonya mu hiseera hyʼegesa nʼomuutu omuŋubeebe sasaanira eŋono.

² Hyʼenyuni egululuha ni eŋuma ŋa hwebanda ehiŋwabo sihisobola huhuŋamba onaba nʼoŋumaho musango.

³ Hutambisa esimbo hu mbalaasi hwatambisa oluhoba hu nasugirya ohuhola ehi hwenda nʼomuŋubeebe yeesi gendamo ehibbooko.

⁴ Sogobolanga mu hibuuso hyʼomuŋubeebe, onamugobolamo, weesi oliba muŋubeebe hya niye.

⁵ Omuŋubeebe omugobolangamo mu ngeri eyʼehiŋubeebe ko gafaania ati ehibuuso hihye hibaaye hyabuŋubeebe. Ni hitali cehyo, aja huŋeega ati mugesi.

⁶ Ohutuma omuŋubeebe ohuŋira obuhwenda hiri hyʼohwetemaho ohugulu wamwene oba ohunywa obutwa.

⁷ Engero eyiri omuŋubeebe jiŋuma mahulu, hyʼohugulu ohuleme eyiri omwenehwo ni hulereeja hulereeja.

⁸ Hiŋuma mahulu ohuŋa omuŋubeebe eŋono hifaana hyʼomuutu aboŋa ebaale mu panda ko gahubba.

⁹ Omuŋubeebe ohutambisa engero hiri hyʼomumeesi agesyaho ohweyiŋa oluŋwa.

¹⁰ Ohuŋa omuŋubeebe omulimo, hiri hyʼomuutu agoba galasa hulasa obusaale hifaabi.

¹¹ Omuŋubeebe agobolamo ohuhola ehiitu cʼehyene, ali hyʼembwa egaluhira ebirusi byayo.

¹² Omuutu ahirira erala ohuba omuŋubeebe asinga oyo oweranga ohuba omugesi.

¹³ Omuutu omudoto aloma ati, “Epologoma yiri mu luguudo, epologoma egendera mu nabiŋwera.”

¹⁴ Ngʼolu olwigi lucuuhira hu pata, omudoto yeesi atyo po gecuuhisa hu buliri wuwe.

¹⁵ Omudoto aŋira engalo mu bbakuli ohubugula emere aye yimudembya ohuyita mu hanwa.

¹⁶ Omuutu omudoto aŋeega ati mugesi ohuhira abaatu abangi abaloma nʼamagesi.

¹⁷ Omuutu oweyingisa mu buduhani obutamuŋambaho, ali hyʼomuutu aŋamba hu matwi gʼembwa eyi atamanyire eyi eŋwera.

¹⁸ Omulalu agudusa ehisoosa ehyʼobulabe,

¹⁹ ali hyʼomuutu adulinga muliranwawe ngʼahena amuloma ati, “Mbaaye saaga husaaga.”

²⁰ Ŋanaŋumaŋo asendamo ekwi, omuliro gusima era aŋaŋuma lugambo siŋaba buduhani.

²¹ Ngʼolu kwi jihuuma omuliro ni gwaduha, mu ngeri njʼenyene nʼomuutu aleeta obuyoga agima obuduhani weyongera.

²² Owʼolugambo ebi aloma biŋomerera, era biri hyʼemere eyi olya yeehala mu hida.

²³ Omuutu oweŋoomya mu ndoma aye mugati mula nʼali nʼomwoyo omubi, ali hyʼetamu eyi baŋahaho erangi yaboneha bulaŋi ate nga ko panaŋo.

²⁴ Omunafuusi ahweha obucaayi wuwe era geŋomya mu malomere aye mu mwoyo gugwe ni gejuuye budulingi wereere,

²⁵ wayire geŋomya mu malomere aye sofugiiriranga ebi aloma, olwohuba omwoyo gugwe gwijuuye bibi byereere.

²⁶ Asobola ohuwiiha hu bucaayi wuwe aye obubi wuwe buja hweta ŋalafu mu lwijuuye.

²⁷ Singa oyaba eroŋo, oja huligwamo wamwene era oyo aŋiringisya ebaale, lirimugaluhira lyamuhenaŋo omwene.

²⁸ Omuutu adulinga abahye aba saabenda era obudulingi buleeta ohusihiiriha.