Engero 21 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Musengwa njʼaŋuga omwoyo gwa habaha aguluŋamya ngʼolu aluŋamya amaaji mu lwabi gatiina eyi agendesa.

² Ebi muutu ahola byosibyosi bimubonehera bulaŋi aye Musengwa njʼahebera emyoyo.

³ Ohuhola ebiitu ebiruŋamu nʼohutehubbira Musengwa ahisiima ohuhira ohumuŋa eŋongo.

⁴ Ohulaga obuhambwe nʼohwepaahapaaha biŋuga abahosi bʼebibi era ehyo hibi.

⁵ Etegeha yʼomuutu owʼehyonji, yireeta ekulahulana ngʼolu ohwanguŋirisa ebiitu huleeta obugadi.

⁶ Obuŋinda obu osuna mu budulingi budumuuha hyʼomuuya era buhuŋira mu mutego gwʼohufa.

⁷ Obuhambwe obu bahosi bʼebibi bahola bulibaŋiriramo nʼabeene olwohuba bagaana ohuhola ebiitu ebiruŋamu.

⁸ Abahosi bʼemisango bagendera mu magira amabi aye abaluŋamu bahola ebisaana.

⁹ Omala gebanda ŋamugulu hu hasolya hʼenyumba ohutabaaye mu nju ndala nʼomuhasi aduhanirisa.

¹⁰ Omuhosi wʼebibi aŋemba hu huhola ebibi era sasaasira muliranwawe.

¹¹ Singa baboneresa omunyoomi liba somo eyiri oyo omubuyabuya. Era onalaabbira omuutu omutegeefu geyongera ohuba mugesi.

¹² Hatonda oyo omutukuvu amanya ehi hiisi bahosi bʼebibi bahola mu mago gaawe era aja hubasihiirisa.

¹³ Singa omugadi gerira ne somudulumirire weesi eŋuma ali hudulumirira ni wenda obuyeedi.

¹⁴ Singa omuutu ahuluŋira ne wamuŋa ehirabo mu ngiso, himwisa obusungu.

¹⁵ Ohutehubbira husangaasa abagwalaafu aye hireeta ohwehanga eyiri abahosi bʼebibi.

¹⁶ Omuutu aŋaba gaaŋwa hu hituufu, amagombe gamulindiriiye.

¹⁷ Abo abenda ebyamasaŋalyo, baja hwafuŋala era hiisi owenda ohunywa omwenge nʼohwejalabya, salifuuha muŋinda.

¹⁸ Abahosi bʼebibi bereetaho ohubonaabona ohu bendesa abagwalaafu, ebi abatali besigwa baleetera abahola ebiruŋamu.

¹⁹ Omala gamenya mu lulafu, ohuhira ohumenya nʼomuhasi aduhanirisa era owʼobusungu.

²⁰ Omuutu omugesi abunga obuŋinda aye omuŋubeebe asalaania ebibye.

²¹ Fubangaho ohuba wʼehyere era omwesigwa, oja huwangaala era abaatu baja huhubisya bulaŋi era bahuŋe nʼeŋono.

²² Omuutu omugesi alumba ehibuga ehyʼabanamaani gabbwagaŋo ebyo ebi besiga.

²³ Oyo atelombooja atyo atyo geŋonia ebigosi.

²⁴ Omuutu owepaahapaaha era aduula abahye bamulanga “Omunyoomi,” ahola ebi ahola nʼaŋeega ati njʼahihenaho.

²⁵ Omudoto geyita omwene olwohuba aŋuuna hulera ngalo.

²⁶ Era asiiba mu hululuhanira biitu aye abo abagwalaafu bagaba nʼomwoyo mulala.

²⁷ Eŋongo yʼabahosi bʼebibi lyenyinyasa, ohusingira erala analiŋayo nʼehigendererwa ehibi.

²⁸ Omuutu aŋa obujulizi owʼobudulingi aja husihiiriha aye omwesigwa ebi aloma babiŋuliirisa.

²⁹ Abahosi bʼebibi bekaza aye abagwalaafu nibo baŋeega hubi bahola.

³⁰ Ŋaŋuma magesi wayire tegeera oba etegeha yosiyosi eyisobola ohuhayisa Musengwa.

³¹ Bategeha embalaasi ohuja mu lutalo aye ohuŋangula huŋwa eyiri Musengwa.