Engero 20 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Sihiraŋi ohumeera olwohuba hyabuŋubeebe eyi oli era ohumeera huhuleetera ohusoola.

² Habaha analuŋa abuluguma hyʼempologoma olwʼehyo oyo amuleetera obusungu aba geyita omwene.

³ Ohweŋala ohusoola hihuŋeesa eŋono aye hiisi muŋubeebe ganguŋirisa ohuduhana.

⁴ Omudoto sategeha hisambu mu hiseera olwʼehyo mu hiseera ehyʼohuhungula ahenamo emoni ni ŋaŋuma ehi abonaho.

⁵ Ebigendererwa byʼomuutu mu mwoyo biri hyʼobuliba wʼamaaji aye omuutu ali nʼohutegeera abisengeeja.

⁶ Abaatu bangi beeranga ohuba bʼamazima aye sihyangu ohusuna omuutu omwesigwa.

⁷ Abahola ebiruŋamu obulamu waawe sibubaho mbalo, era abaana baawe balisuna ekabi.

⁸ Habaha ni gehala hu tebe yiye eyʼobuŋugi ohusala emisango, atambisa emoni jije ohusengeeja ehiraŋi nʼehibi.

⁹ Njʼani asobola ohuloma ati, “Ese omwoyo gwange mugwalaafu era puma hibi hyosihyosi mu bulamu wange?”

¹⁰ Musengwa acaawa abatambisa emizaani nʼebipimo ebicaamu.

¹¹ Nʼomwana omuŋere omumanyira hu bikolwa bibye, wamanya oba enebisya yiye ndaŋi era tuufu.

¹² Amatwi ohuŋulira nʼemoni ohubona, Musengwa njʼowawumba byombi.

¹³ Onenda ohuŋenyuha bugali obugadi buja huhuŋamba aye onahalabana osuna emere mu bungi.

¹⁴ Agula apatana nʼajerega ati, “Ebbeeyi yaŋamugulu, ebbeeyi yaŋamugulu.” Aye oluhena ohugula, atiina ni gebuuja ngʼolu adondooye.

¹⁵ Ezaabbu nʼamabaale agʼomuŋendo biri mu biha bingi aye omuutu aloma ebyʼamagesi hyamuŋendo ehitaboneha aŋa ni naaŋa.

¹⁶ Owetaŋo ohweyimirira omuutu oyu atamanyire olwʼebbanja, asaana ohutaaŋo omusingo ohuhahasa ati anahasasule.

¹⁷ Emere eyʼowiibi eŋoma aye oheneresa nʼehutulira mu suulu.

¹⁸ Etegeha yolerera singa oŋamba amagesi agabahuŋa era otatiina mu lutalo nʼoŋuma abaŋi bʼamagesi.

¹⁹ Owʼolugambo sabiiha hyama olwʼehyo weŋale abaatu abali nʼeminwa ejitagwaho soŋera.

²⁰ Singa omuutu aduha semwana oba nyina obulamu wuwe buheneresa ni buli hyʼetaala esimiiye mu hiirema ehiŋambire ti ngu.

²¹ Obuŋinda owamangumangu ni huhiiri baŋere sibubamo kabi hu komerero.

²² Solomanga oti, “Nja huhwesasusa olwʼehibukolire.” Aye wesiganga Musengwa aja huhununula.

²³ Musengwa acaawa abaatu abatambisa ebipimo nʼemizaani ebitali bituufu.

²⁴ Musengwa njʼategeha amagendere gʼomuutu. Olwʼehyo ŋaŋumaaŋo asobola ohutegeera ebitiina mu moni.

²⁵ Otanguŋirisanga husuubisa Hatonda ehiitu nʼohiiri hweŋeegamo, olwohuba hisobola ohuhuŋweramo ohwehebulisa.

²⁶ Habaha omugesi asengeja abahosi bʼebibi era ababoneresa aŋaŋuma husaasira.

²⁷ Enjase ya Musengwa emuliha mu mwoyo gwʼomuutu yaata ŋalafu hiisi higendererwa ehi bahweha.

²⁸ Habaha aja hweyongera nʼaŋuga anaba nʼali mwesiga nʼatehubbira era ni genda abaatu babe.

²⁹ Abavubuka benyumirisa olwʼamaani gaawe aye efi njʼeŋono lyʼabasahulu.

³⁰ Endabusi yigira hwalehaŋo esambo embi era ehibbooko higira hwacuusamo enebisya.