Engero 2 - Endagaano Epyaha ko n'ebitabo ebindi eby'Endagaano Ekayire mu Lunyole

Ebiraŋi ebi magesi galeeta

¹ Mwana wase singa ofugiirira ebibono ebi ndoma era waŋamba ebiragiro byange,

² waŋulira ebibono ebyʼamagesi era waŋayo omwoyo ohubitegeera

³ era onayayanira ohumanya wegayirira ohuhuŋa ohutegeera

⁴ era wendula amagesi hyʼowendula efeeza hyʼowendula ebyʼobuŋinda ebi bahweha,

⁵ aŋo oja humanya ohutya Musengwa ehi hitegeesa era oja hutegeera Hatonda.

⁶ Hiri hiityo olwohuba Musengwa njʼaŋa amagesi era ebibono bibye bireeta ohumanya nʼohutegeera.

⁷ Ayeeda era ahuuma abagwalaafu era njʼengabo yaabo abesigwa.

⁸ Agadirira abo abatehubbira era ahuuma abesigwa.

⁹ Nʼoja huŋayo omwoyo gugwo hu ebi kulabbira, oja humanya ebituufu ebyʼamazima era ebi osaana ohuhola.

¹⁰ Oja hufuuha mugesi era ohumanya huja huhufuula musangaafu.

¹¹ Ohumanya huja huhuhuumanga era obutegeefu buja huhugadiriranga.

¹² Amagesi gaja huhuŋonia amagira gʼabahosi bʼebibi, gaja huhuŋonia abaatu abagodama,

¹³ abo abaleha ohugendera mu ngira enduŋamu nga bagendera mu hiirema.

¹⁴ Abanyumirwa ohuhola ebibi era basangaalira obugodami,

¹⁵ amagira gaawe magodami era ebi bahola sibiraŋi.

¹⁶ Amagesi gaja huhuŋonia omuhasi omuhwedi, gahutaase nʼebibono bibye ebihusendasenda.

¹⁷ Owalehaŋo wamwe owomu buvubuka wuwe, gabbwaga endagaano eyi gaahola mu moni ja Hatonda.

¹⁸ Ohwingira mu nyumba yiye huba hutiina mu hufa era nʼengira eyitiinayo yija yimagombe.

¹⁹ Hiisi atiina eyi ali, aba aŋambire engira eyʼohusihiiriha.

²⁰ Olwʼehyo oja hugenderanga mu ngira eyʼabaatu abagwalaafu era ogumirenga hu magira aga bagwalaafu,

²¹ olwohuba abagwalaafu njʼabaja ohumenya hu hyalo era abaŋumaho mbalo njʼabalihisigalamo.

²² Aye Hatonda aja hutusa abahosi bʼebibi hu hyalo era asihirise abatali besigwa.