Engero 16 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Omuutu ategeha mu mwoyo gugwe ebi gahendire ahole aye Musengwa njʼasalaŋo.

² Osobola ohuŋeega oti hiisi ehi ohola hiraŋi aye Musengwa njʼamanyire ehiri mu mwoyo.

³ Etegeha jijo jiŋambye Musengwa aja hujoheresa.

⁴ Hiisi ehi Musengwa gataŋo hiri nʼehigendererwa era abahosi bʼebibi gabateeraŋo oludaalo olwʼohubaboneresa.

⁵ Musengwa genyinyalya abo bosibosi abepaahapaaha mu myoyo jaawe era mu butuufu oweene aja hubahangavula.

⁶ Ba wa hisa era mwesigwa, Hatonda aja huhusoniŋa ebibi era oyo atya Musengwa geŋala ohuhola ehibi.

⁷ Onaba nʼosangaasa Musengwa afuula abasigu babo ohuba bameeri babo.

⁸ Omala gaba nʼehitono ne nʼoli mugwalaafu ohuhira ohuba nʼehibbiryo hyʼobuŋinda nʼobusunira mu bukuyakuyi.

⁹ Hutegeha ebi hwahendire huhole aye Musengwa njʼasalaŋo ngʼolu binagende.

¹⁰ Ebi habaha aloma abiroma hu buŋangi wa Hatonda era ebi asalaŋo byʼamazima.

¹¹ Emizaani nʼebipimo ebyolana bya Musengwa, era ebi bapimiraho byosibyosi bibye.

¹² Habaha acaawa ebikolwa ebibi olwohuba ohuhola ebiitu mu buluŋamu hinywanywasa etebe eyʼobuŋugi.

¹³ Abahabaha basangaalira amazima era benda abo abaloma ebituufu.

¹⁴ Habaha analuŋa aŋanga geeta omuutu aye omuutu omugesi amuŋooyaŋooya.

¹⁵ Habaha anasangaala aŋo ŋabaaŋo obulamu era ohuba muhoda eyi ali hiri hyʼefula ohwendobooli.

¹⁶ Ohuba nʼamagesi hisinga ezaabbu era ohuba nʼohutegeera hisinga efeeza.

¹⁷ Abaatu abaluŋamu beŋalama amagira agabaleetera ohuhola ebibi olwʼehyo manya amagendere gago wahaŋonia obulamu wuwo.

¹⁸ Amalala galeeta ohusihiiriha, ohwepaahapaaha huŋwamo ehigo.

¹⁹ Omala gaba muutu owaŋaasi era waba ŋalala ni naabo ababanyigirisa ohuhira ohugabana ebyʼomunyago ni naabo abehudumbasa.

²⁰ Hiisi aŋuliirisa ebi bamulabbira aja huhulahulana era gesiimire oyo owesiga Musengwa.

²¹ Omuutu omugesi omubonera hu butegeefu wuwe abandi bamwigiraho ebibono bibye binaba ni biri byʼamahulu.

²² Obutegeefu sibuho yʼobulamu eyiri abo abagesi aye ohugesyaho ohusomesa abaŋubeebe hiba huhena biseera.

²³ Omuutu owʼamagesi gehuuma mu ndoma yiye era ebi aloma biba byʼamahulu.

²⁴ Ebibono ebyʼehisa biri hyʼomudugere bigalusamo amaani era bireeta obulamu.

²⁵ Ŋaliŋo ekola yʼebiitu eyiboneha ohuba endaŋi eyiri omuutu aye hu komerero ni yimuŋira mu hufa.

²⁶ Ohwegomba ohulya ohu mutambi aba ni nahwo humuleetera ohuhola bugali era ehyo himuleetera ohusuna ehi genda.

²⁷ Abahosi bʼebibi basiiba bayiiya engeri eyʼohukosamo abahyawe era ebi baloma byohya hyʼomuliro.

²⁸ Omuutu owakalebule aleeta etalo era gabuhania abameeri.

²⁹ Abaatu abʼemyoyo emibi badulinga abahyawe era babagwisa mwiroŋo.

³⁰ Oyo ahumiinamiinira emoni aba asala luhwe huhugwisa mu bigosi era oyo ahusosya omunwa aba ahwendesa hibi.

³¹ Ohusahuluŋa wamera efi yiba ngule yʼeŋono ohuyifuna oba obaaye ohola ebiruŋamu.

³² Omala gaba mugumiikiriza ohuhira ohuba musooli wʼetalo, era omuutu afuga obusungu ohusinga ohusoola waŋangula ehibuga ehiramba.

³³ Abaatu bahubba ahalulu aye Musengwa njʼasalaŋo ngʼolu hanaabe.