Engero 15 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Engobolamo endaŋi, yihahania ehiruŋi aye ebibono ebyʼehabyo bireeta obusungu.

² Omuutu omugesi aloma ebisaana aye omuŋubeebe aloma ebiŋuma mahulu.

³ Musengwa abona hiisi ŋaatu era emoni jije ajitaaye hu bahosi bʼebibi nʼabagwalaafu.

⁴ Ebibono ebiŋonia biri hyʼomusaala oguleeta obulamu aye ebibono ebyʼobudulingi bibbwaga omwoyo.

⁵ Hya buŋubeebe ohuŋwa hu ebi lataawo gahusomesa aye hiisi aŋamba ebi bamulabbira aba mugesi.

⁶ Amago gʼomuutu omugwalaafu mubaamo ebyʼobuŋinda bingi aye ebyefuna byʼabahosi bʼebibi bibaŋweramo ebigosi.

⁷ Ebibono byʼabagesi bireetera abandi ohumanya aye ehyo sihiri mu myoyo jʼabaŋubeebe.

⁸ Musengwa genyinyalya eŋongo lyʼabahosi bʼebibi aye ohusaba hwʼabagwalaafu humusangaasa.

⁹ Musengwa acaawa esambo jʼabahosi bʼebibi aye genda abo abafayo ohuhola ebiruŋamu.

¹⁰ Singa oleha engira endaŋi baja huhuhangavula luhulu lwene era oyo acaawa ohumunenya aja mu hufa.

¹¹ Musengwa aŋuma ehi atamanyire ehiŋamba hu hufa nʼohusihiiriha olwʼehyo eŋuma ehi atamanyire ehiri mu myoyo jʼabaatu.

¹² Omunyoomi sigenda humulomaho era sigenda hwebuusaho hu bamuhiraho ohumanya.

¹³ Omwoyo omusangaafu guleeta amamwemwe mu moni aye ohulumwa hu mwoyo huleeta ohunakuŋala.

¹⁴ Omuutu owʼamagesi genda bugali ohwega aye omuŋubeebe gebona ati ali bulaŋi mu obuŋubeebe wuwe.

¹⁵ Obulamu wʼomugadi wijuuye bigosi aye abasangaafu mu myoyo nibo baba mu hweyagala.

¹⁶ Hiraŋi ohwebeera nʼahadiidiri onaba nʼotya Musengwa ohuhira ohuba nʼobuŋinda ehibbiiryo aye nʼoŋuma miyaaya.

¹⁷ Omala galiira eryani eryamagala ne ni mwendana ohusinga ohuliira ebinoli aye ni mwejuuye obucaayi.

¹⁸ Omuutu atalwa hunyiiga atanula etalo aye oyo aŋamba pola ebiitu gehahania obuduhani.

¹⁹ Onaba mudoto oja hwagaana ebigosi mu bulamu wuwo aye onaba mwesigwa sooja huba nʼobugosi.

²⁰ Omwana omugesi asangaasa semwana aye omuŋubeebe anyooma nyina.

²¹ Obuŋubeebe wusangaasa abaŋuma magesi aye omuutu omutegeefu ahola ebisaana.

²² Aŋaŋuma huhuŋa magesi, etegeha siyolerera aye yolerera abaŋi bʼamagesi banaba ni bali bangi.

²³ Hiisi muutu asangaalira engobolamo endaŋi era nga hisangaasa ohuba nʼendomaloma eyolaana mu hiseera ehituufu.

²⁴ Abaatu abʼamagesi bagendera mu ngira eja ŋamugulu eyiri obulamu sosi engira eyija ŋaasi mu hufa.

²⁵ Musengwa asihiirisa amago gʼomuutu owehudumbasa aye ahuuma ebiitu byʼanamwandu.

²⁶ Musengwa acaawa ebiŋeego byʼabahosi bʼebibi aye ebyʼabagwalaafu bimusangaasa.

²⁷ Omuutu owomuŋudu aleetera amago gage ebigosi aye oyo acaawa enguzi aja huwangaala.

²⁸ Omugwalaafu asooka huŋeega mu mwoyo hu ehi aja huloma konyo gagobolamo aye omuhosi wʼebibi aloma hifaabi.

²⁹ Musengwa aba ŋaleeŋi nʼabahosi bʼebibi aye aŋulira ohusaba hwʼabagwalaafu.

³⁰ Ohumwemwejera huleeta esangaalo hu mwoyo era amaŋuliro amalaŋi gagobosa mu magumba amaani.

³¹ Aŋuliirisa ni bamunenya aja hufuuha mugesi.

³² Agaana ohwega gerumya omwene aye afugiirira ohumunenya geeyongera amagesi.

³³ Ohutya Musengwa hireetera omuutu ohuba mugesi era ohuba omuutu oweyiisa ŋaasi, hihuŋeesa eŋono.