Engero 13 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Omwana omugesi ataayo omwoyo hu ebi semwana amulaabbira aye omunyoomi saŋulira nʼolu muhangavula.

² Omuutu omugwalaafu asuna omuhemba olwʼebibono ebiraŋi ebi aloma aye abo abadulingi baŋemba huhuhola ebitoola.

³ Oyo owegenderesa mu ndoma ahuuma obulamu wuwe aye oyo oweromaja hifaabi gesihiirisa omwene.

⁴ Omuutu omudoto safuna ehi gegomba aye oyo owʼehyonji asuna ehi aba ni genda.

⁵ Omuutu omugwalaafu acaawa obudulingi aye omuhosi wʼebibi ahola ebiswasa.

⁶ Esambo jʼomugwalaafu jimuŋonia aye ehibi hyʼomubbengi himuhubbiraŋo.

⁷ Ŋaliŋo omuutu oweranga ohuba muŋinda atenga ko panaŋo ne ŋabaaŋo owehosa ati mugadi aye nga ali nʼobuŋinda buhehere.

⁸ Omuŋinda atambisa obuŋinda wuwe ohwenunula mu higosi aye omugadi aŋuma ehimweralihirisa.

⁹ Omugwalaafu ali hyʼenjase eyimulisa hiisi ŋaatu aye omuhosi wʼebibi ali hyʼetaala eyisimire.

¹⁰ Amalala galeeta obuyoga aye hiraŋi ohuba omuutu aŋeeha amagesi.

¹¹ Obuŋinda obu muutu asuna mu ngeri embi buŋwaŋo mangumangu aye oyo abuhumbaania polapola weyongera ohwala.

¹² Ohuŋuma esuubi hireetera omwoyo ohulwala aye ehi obaaye nʼoŋembaho hinolerera hihusangaasa.

¹³ Oyo anyooma ebi bamubulirira aja husihiiriha aye oyo agondera ehiragiro alisuna omuhemba.

¹⁴ Esomesa yʼomuutu omugesi yiri oti sulo eyireeta obulamu era yireetera omuutu ohuŋwa mu mitego jʼohufa.

¹⁵ Ohusalaŋo ohulaŋi hihuleetera owende aye abo abatali besigwa baŋambire oluguudo olutiina mu husihiiriha.

¹⁶ Omuutu omutegeefu ahena huŋeega hu hiitu ko gahihola aye omuŋubeebe golesa obutamanya wuwe.

¹⁷ Omuhwenda omuhosi wʼebibi ahugwisa mu bugosi aye oyo omwesigwa aleeta emiyaaya.

¹⁸ Atenda humubuulirira gafuŋala gahena gaswala aye aleha bamunenya, asuna eŋono.

¹⁹ Omuutu asangaala singa asuna ehi abaaye nʼaŋembaho aye abaŋubeebe sibenda hulehaŋo ebibi byawe.

²⁰ Oyo ahola omuhumba nʼomuutu omugesi yeesi afuuha mugesi aye oyo asyana nʼabaŋubeebe gereetera hubonaabona.

²¹ Ebigosi birumba abo abahosi bʼebibi aye abagwalaafu basuna ebiraŋi.

²² Omuutu omulaŋi asuna obuŋinda obu aleeheraho nʼabejuhulu babe aye owʼomubbengi babubungihira bagwalaafu.

²³ Endimiro yʼomugadi yisobola ohwama emere nyingi aye abatali bʼamazima sibamuganya huyirya.

²⁴ Oyo ataŋamo mwana wuwe endabusi aba samwenda aye owenda omwana wuwe afaayo ohumuluŋamya.

²⁵ Omugwalaafu alya geguta aye omuhosi wʼebibi asiiba nʼali njala.