Engero 12 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Omuutu afugiirira ohumuŋa amagesi aba genda ohumanya aye oyo atenda humunenya nagodeeme aba muŋubeebe.

² Omuutu omulaŋi asuna obuhoda ohuŋwa eyiri Musengwa aye Musengwa asalira abakuyikuyi omusango.

³ Ohuba omuhosi wʼebibi sihireeta obuhuumi hu bulamu wʼomuutu aye eŋuma aŋanga ohugengula omugwalaafu.

⁴ Omuhasi omwegenderesa agima abaatu baŋa wamwe eŋono aye omuhasi aŋuma esambo aba oti bulwaye obuleetera amagumba ga wamwe ohuseseŋa.

⁵ Etegeha jʼabaatu abagwalaafu jiba jʼamazima aye amagesi agʼabahosi bʼebibi gabudulingi.

⁶ Endoma yʼabahosi bʼebibi yahujuha mafugi aye endoma yʼabagwalaafu yibanunula.

⁷ Abahosi bʼebibi basihiiriha bosibosi aye olulyo lwʼabagwalaafu nirwo siruŋwaŋo.

⁸ Singa oba mugesi, abaatu baja huhusiima aye onaba muŋubeebe, balihunyooma.

⁹ Hiraŋi abaatu ohuhunyooma ne waholerera obulamu wuwo ohuhira olu weranga ohuba omwegingihiriri aye nʼohaya nʼehyohulya.

¹⁰ Abaatu abalaŋi balabirira ebyayo byawe aye abahosi bʼebibi sibafayo hu byawe.

¹¹ Omuutu ahola emirimo nʼamaani asuna emere nyingi aye oyo ahenera ebiseera hu biitu ebitagasa muŋubeebe.

¹² Abahosi bʼebibi baŋemba hu huhola bibi aye abagwalaafu sibatangatanga.

¹³ Obudulingi wʼababi wubaŋambirayo abeene aye omugwalaafu aŋunuha ebigosi.

¹⁴ Omuutu asuna omuhemba ohwema hubi aloma nʼebi ahola hiisi muutu aja husuna ehimusaanira.

¹⁵ Omuŋubeebe aŋeega mbo ati hiisi ehi ahola hiraŋi aye omugesi aŋuliirisa ebi bamulomera.

¹⁶ Omuŋubeebe saalwa hulaga busungu wuwe aye omuutu omutegeefu geŋomeha nʼolu bamuduha.

¹⁷ Omujulizi owʼamazima aŋa obujulizi obutuufu aye abadulingi baloma byakalebule.

¹⁸ Ebibono abaatu abaŋubeebe ebi beromboja bifumita bugali hyʼepiima aye ebyʼamagesi bireeta ohuŋona.

¹⁹ Amazima sigaŋwaŋo emirembe nʼemirembe aye obudulingi wa haseera buseera.

²⁰ Abahosi bʼebibi bejuuye budulingi mu myoyo aye abo abateesa ebiraŋi baleeta esangaalo.

²¹ Eŋuma habi ahoola hu mugwalaafu aye ebigosi bingi bigwira abahosi bʼebibi.

²² Musengwa acaawira erala abaloma ebyʼobudulingi aye asangaalira abo abaloma amazima.

²³ Omuutu omutegeefu sigehenamo ebi amanyire aye abaŋubeebe berebula.

²⁴ Ohuhola nʼamaani hihuleetera ohuŋuga aye obugayaafu buhuleetera ohuba omwidu.

²⁵ Omwoyo omuti guhuhenaho esangaalo aye ebibono ebiraŋi bigobosamo amaani.

²⁶ Omuutu omugwalaafu aluŋamya meriiwe aye amagira gʼabahosi bʼebibi gabaŋira mu hubbaama.

²⁷ Sosuna ehi wenda onaba nʼoli mudoto aye atamba nʼamaani aligwa mu biitu.

²⁸ Engira yʼomugwalaafu yimuleetera ohuba nʼobulamu era oluguudo olwo luli ŋaleeŋi nʼohufa.