Engero 11 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Musengwa acaawa abatambisa ebipimo ebicaamu aye asiima ebipimo ebituufu.

² Ohwepaahapaaha huleeta ohuswala aye ohweŋomeha hihufuula mugesi.

³ Onahola ebiraŋi amazima gaja huhuluŋamya aye abatali besigwa basihiiriha.

⁴ Obuŋinda buŋuma mugaso hu ludaalo olwʼohusaliraho emisango aye ohuhola ebiruŋamu hiri huŋonia ohufa.

⁵ Obugwalaafu wʼomuutu bumuleetera ohumulaga ehyʼohuhola aye ebikolwa byʼabahosi bʼebibi bibaleetera ohusihiiriha.

⁶ Obuluŋamu wʼabagwalaafu bubanunula aye ohwegomba ohubi ohwabatali besigwa hubafuuhira mutego.

⁷ Esuubi lyʼomuhosi wʼebibi anafa lisihiiriha. Era ebi galubiriranga ohuhola olwʼamaani gage byosi bihoma.

⁸ Omuutu omugwalaafu aŋunuha ebigosi aye omuhosi wʼebibi abigwamo.

⁹ Omuutu atali mwesigwa alimirira muliranwawe aye amagesi gʼomugwalaafu gamuŋonia.

¹⁰ Omuutu omugwalaafu anasuna ekabi abaatu mu hibuga basangaala aye omuhosi wʼebibi anafa basaŋalya.

¹¹ Olwʼekabi jʼomugwalaafu ehibuga hifuuha hyʼeŋono aye ebibono byʼabahosi bʼebibi bihireetera ohusihiiriha.

¹² Hyabuŋubeebe ohunyooma abahyo aye omuutu ategeera geŋolerera.

¹³ Omuutu owʼolugambo sahuuma byama aye omwesigwa abihuuma.

¹⁴ Ŋanaŋumaŋo omuutu owʼamagesi aluŋamya egwanga hirireetera ohugwa aye aŋali abaŋi bʼamagesi abangi, ŋabaaŋo obuŋangusi.

¹⁵ Oyo ateeraŋo oweŋola oyu atamanyire omusingo, himuŋweramo ohubonaabona aye ohutabyeyingisamo njʼehisinga.

¹⁶ Omuhasi owʼehyere bamuŋa eŋono aye abaatu abaŋuma sambo basuna obuŋinda woŋene.

¹⁷ Omuutu owʼehisa aganyulwamo aye omuhambwe omwene gereetera ebigosi.

¹⁸ Omuhosi wʼebibi asuna ebiitu ebyʼobudulingi aye onahola ebiruŋamu oja husuna ebiitu ebyʼamazima.

¹⁹ Omuutu ahola ebiraŋi asuna obulamu aye ahola ebibi himuŋweramo ohufa.

²⁰ Musengwa acaawa abʼemyoyo ejekirihindi aye asangaalira abo abahola ebituufu.

²¹ Obutuufu aŋaŋuma hubuusabuusa baligudya abahosi bʼebibi, aye abaatu abagwalaafu baja hwebeera bulaŋi.

²² Omuhasi omuŋoono aŋuma episa ali hyʼepeta eyʼezaabbu mu suulu yʼembiiji.

²³ Ebiitu ebi bagwalaafu baŋeegaho biba biraŋi aye ebi bahosi bʼebibi basuubira ohuhola bireeta obugosi.

²⁴ Ŋaliŋo aŋamba ebbeesa gayeeda abaatu era geyongera ohuba muŋinda aye nakumuumu geyongera hwafuŋala.

²⁵ Omuutu omugabi aja husuna obuŋinda, oyo ayeeda abahye yeesi baja humuyeeda.

²⁶ Omuutu ahweha emere nʼahuuma ebbeeyi ohweyongera, bamulomaho wubi aye oyo abagusa bamuloma biraŋi byereere.

²⁷ Ebigendererwa bibyo binaba biraŋi baja huhusiima aye ebigosi bija hugwira oyo abyendula.

²⁸ Oyo owesiga obuŋinda wuwe aligwa aye omuutu ahola ebiruŋamu aja huhulahulana hyʼamahoose gʼomusaala.

²⁹ Oyo aleetera amago gaawe ebigosi alihaya ehyʼohusikira era omuŋubeebe aja hufuuha mwidu wʼoyo omugesi.

³⁰ Ebiitu ebi mugwalaafu ahola musaala oguleeta obulamu era oyo ali nʼesambo endaŋi abandi bajironderera.

³¹ Obanga omugwalaafu bamuŋa omuhemba gugwe hu hyalo huno, ne olwo hiriba hiitye eyiri abatamanyire Hatonda ko nʼabahosi bʼebibi?