Engero 10 - Endagaano Epyaha ko n'ebitabo ebindi eby'Endagaano Ekayire mu Lunyole

Engero ja Sulemaani

¹ Engero ja Sulemaani: Omwana omugesi asangaasa semwana aye omuŋubeebe anakuŋasa nyina.

² Obuŋinda obu osuna mu bukupania buŋuma ehi bugasa aye ohuba owʼamazima hihuleetera ohuwangaala.

³ Musengwa saleeha mugwalaafu ohuhaya emere aye aloberesa abahosi bʼebibi ohusuna ebi balubirira.

⁴ Ohulera engalo hireeta obugadi aye ohutamba nʼamaani hireeta obuŋinda.

⁵ Omuutu awunga emere mu hiseera ehyʼegesa aba mugesi aye oyo aba mu hufuluta mu hiseera ehyʼohuhungula aŋambya esoni.

⁶ Omugwalaafu aja husuna ekabi aye abahosi bʼebibi baloma ni bawihirira hu bibi ebi bahola.

⁷ Omugwalaafu bamuhebulira ngʼomuutu owʼekabi aye omuhosi wʼebibi baja humwibirira mangu.

⁸ Omuutu omutegeefu afugiirira amagesi aga bamuŋa aye omuŋubeebe owerohopa, gesihiirisa omwene.

⁹ Omuutu owebisya obulaŋi abaaŋo neŋuma ehimuluma hu mwoyo aye oyo agendera mu ngira engodami, sibalwa humuŋambya.

¹⁰ Omuutu ataloma mazima aleeta ebigosi aye oyo aloma nʼatabbumbirya aleeta emiyaaya.

¹¹ Ebibono byʼomugwalaafu biri hyʼesulo ejireeta obulamu aye abahosi bʼebibi baloma ni bawihirira hu bibi ebi bahola.

¹² Obucaayi buleeta ohuduhana aye ohwenda huleeta ohusoniŋa ebibi byosibyosi.

¹³ Omuutu omutegeefu aloma ebirimo amagesi aye omuŋubeebe asaanamo endabusi.

¹⁴ Abaatu abagesi benda ohumanya aye endoma yʼomuŋubeebe yireeta ohusihiiriha.

¹⁵ Obuŋinda wʼomuutu buli hyʼehiteepe ehigumu ehyeswanigirihiise ehibuga aye obugadi buleetera omugadi ohusihiiriha.

¹⁶ Omugwalaafu bamuŋa omuhemba ogwʼohuwangaala aye enyingisa yʼomuhosi wʼebibi yimuleetera ohweyongera ohuhola ebibi.

¹⁷ Oyo afugiirira ebi bamusomesa ahuuma obulamu wuwe aye oyo agaana ohumunenya, abbaamya abandi.

¹⁸ Omuutu ahweha obucaayi wuwe, aba mudulingi era ni nooyo ageya abahye aba muŋubeebe.

¹⁹ Mu hwelomaaja obugali mubamo ohubbenga aye oyo ahuuma olulimi lulwe mugesi.

²⁰ Ebibono byʼomuutu omugwalaafu biri hyʼefeeza esengeje aye ebi omuhosi wʼebibi aŋeega mu mwoyo biŋuma mugaso.

²¹ Ebibono byʼomuutu omugwalaafu bigasa bangi aye ehiita abaŋubeebe hutamanya husalaŋo bulaŋi.

²² Ekabi eji Musengwa aŋa jireeta obuŋinda era sijireeta naku.

²³ Omuŋubeebe anyumirwa ohuhola ebibi aye omuutu omugesi anyumirwa bugali ohwega.

²⁴ Ehi omuhosi wʼebibi atya hija humwolaho aye ebi omugwalaafu asuubira aja hubisuna.

²⁵ Abahosi bʼebibi basihiiriha hibuyaga ni gaaja aye abagwalaafu baba bagumu emirembe nʼemirembe.

²⁶ Sotumanga omuutu omudoto, aja huhulumya hyʼomwenge endota hu meeno oba eriisi mu moni.

²⁷ Ohutya Musengwa hireeta ohuwangaala aye abahosi bʼebibi sibawangaala.

²⁸ Ebi bagwalaafu basuubira bibaleetera esangaalo aye ebi bahosi bʼebibi basuubira sibyolerera.

²⁹ Musengwa ahuuma abaatu abʼamazima aye asihiirisa abahola ebibi.

³⁰ Eŋuma ehiritiisatiisa abagwalaafu aye abahosi bʼebibi sibalimenya hu hyalo huno.

³¹ Ebi abagwalaafu baloma byʼamagesi aye baja huŋoleresa abadulingi.

³² Abagwalaafu bamanya ebi basaana ohuloma aye abahosi bʼebibi bamanyire bigodami byereere.