Engero 1 - Endagaano Epyaha ko n'ebitabo ebindi eby'Endagaano Ekayire mu Lunyole

Emigaso jʼengero

¹ Jino jʼengero ja Sulemaani omusaani wa Dawudi era habaha wa Yisirayiri.

² Emigaso jʼengero jino, hulabbira omuutu ohusuna amagesi nʼesambo endaŋi ko nʼohutegeera ebibono ebyʼamahulu.

³ Jisomesa omuutu ohuba nʼesambo endaŋi nʼohuba mwesigwa nʼatehubbira era omudimamu.

⁴ Engero jiigula emoni jʼabo abatamanyire bingi jʼabaleetera ohutegeera era jiŋa abavubuka amagesi mu husalaŋo ehyʼohuhola.

⁵ Leha omugesi aŋulirise geeyongere ohubeera erala mugesi era leha omutegeefu asune ohumanya,

⁶ ohutegeera amahulu gʼengero nʼendoma eyʼohubbumbirya ko nomu bibono nʼebikoyiko ebyʼabaatu abagesi.

⁷ Ohutya Musengwa njʼetandiha yʼohumanya. Ne abaŋubeebe banyooma amagesi era sibenda hwega.

⁸ Mwana wase, ŋuliirisa ebi lataawo ahulaabbira era solehanga ebi maawo ahusomesa.

⁹ Ebi wasoma bija huba hyʼengule eyʼeŋono hu mutwe gugwo era hyʼomudaali ogwʼeŋono mwigosi.

¹⁰ Mwana wase, singa abahosi bʼebibi bahuhongeresa ohuhola ehibi, otafugiirira huhihola.

¹¹ Singa bahuloma baati, “Nja otweŋimbeho, huje hweteege hwite omuutu hwesangaase, wayire atuŋumaho songa yosiyosi,

¹² leha hubalye balamu hubamire, ngʼolu amagombe gamira abaatu.

¹³ Huja hunyaga ebiitu ebyʼomuŋendo ebya hiisi ngeri era hwijuse amayumba geefe nʼebyomunyago.

¹⁴ Nja otwegaateho, huja hugabana ebi hwiba.”

¹⁵ Mwana wase otahola muhumba ni nabo era otaholanga ebi bahola,

¹⁶ olwohuba baŋemberesa ohuhola ebibi era bangu ohutemula abahyawe.

¹⁷ Nga hiŋuma mugaso ohutega oluhumbeeri enyuni eji wenda ohuŋamba ni jibona!

¹⁸ Ebi baatu abo bahola bibalondoola abeene era nawoogi wʼefumo siwutya awuŋagaaye.

¹⁹ Baatyo pobaliba abo abasuna obuŋinda mu kola embi, baheneresa ni bafiriiye obulamu waawe.

Amagesi galanga

²⁰ Amagesi galanga nʼejanjaasi eryʼamaani mu nabiŋwera galanga nʼamaani mu bifo ebyʼolukale,

²¹ galangirira nʼejanjaasi eryʼamaani mu akisoni nohu mulyango gwʼehibuga gaati,

²² “Enywe abaŋuma ehi mumanyire, mulyosa ŋe ohwenda ohuba mu hutategeera? Enywe abanyoomi mulyosa ŋe ohunyumirwa obunyoomi wenywe? Era abaŋubeebe enywe mulyosa ŋe ohucaawa ohumanya?

²³ Ŋuliirisa nimba ni kuleegera, nja huhuŋa amagesi amalaŋi kuŋe nʼebiŋeego byange.

²⁴ Ne ngʼolu wanegaana ni nahulanga era siwafayo ni nahusimirya,

²⁵ ngʼolu wanyooma amagesi aga nahuŋa era siwebbwaga ni nahunenya,

²⁶ keesi ndi hujeherera nʼoli mu bugosi ndi hulengerera hulengerera ebigwa ni bitalagire ni bihuguyeho,

²⁷ ebigosi ni biri huujira hyʼomuyaga ni biri hweswanigirisa hya hafuusa, olu ebigwa ni bitalagire birihunyigirisa byahuŋinga.

²⁸ “Balindanga ne sindibagobolamo balinyendula aye sibalimbona.

²⁹ Ngʼolu bacaawa ohumanya era ndibatoboleŋo ohutya Musengwa.

³⁰ Ngʼolu bagaana amagesi gange era banyooma ohubanenya,

³¹ baja hulya hu bibala byʼebikolwa byawe era balyesinya ebibala ebiŋwa mu bujeemu waawe.

³² Ehiita abaŋubeebe, hugaana magesi era ehibeeta hutafaayo.

³³ Aye hiisi aŋuliirisa ebi ndoma anaabenga nʼemiyaaya era nʼeŋuma ehi atya nʼehimusindusa.”