Amagambi 32 - Endagaano Epyaha ko n'ebitabo ebindi eby'Endagaano Ekayire mu Lunyole

Olwembo lwa Musa

¹ “Ewe egulu, tegere ohutwi ndome, era leha ehyalo hiŋulire ebindoma.

² Esomesa yange yitonye hyʼefula, ebi ndoma bigwe hyʼolume, hyʼefula eyigwa obulaŋi hu nyaasi egondi, eyi basasalya hu nyaasi eŋere.

³ Nja hulangirira esiina lya Musengwa, mbutule ngʼolu Hatonda weefe ali wʼamaani.

⁴ “Musengwa njʼolwanda, ebi ahola biŋumaaho hamogo, era nʼasala esonga sigehubbira. Hatonda mwesigwa era wʼamazima, ahola ebituufu era ebiruŋamu.

⁵ Abaatu babe sibesigwa, era sibasaana nʼohuba baana babe. Aye bafuuhire badulingi, abaatu abʼomulembe omugodami.

⁶ Musengwa mumusasula muutyo, enywe abaatu abasirusiru era abaŋuma magesi? Musengwa sinje senywe owabatonda? Sinje owabafuula egwanga?

⁷ “Muhebulire ebiseera ebyahale, muŋeege hu mirembe ejahale. Mubuuse abasenywe babalomere, abasehulu benywe babalomere ebyaliŋo.

⁸ Musengwa oyo Ali Ŋamugulu Obugali ni gaaŋa amawanga ebyʼobusika, olu gaawulamo abaatu, ngʼataŋo esalo jaawe ni geema hu bungi wʼabaana ba Yisirayiri.

⁹ Ne Musengwa omwene, nje Hatonda wʼAbayisirayiri, abejuhulu ba Yakobbo.

¹⁰ “Gabagaana mu lulafu eŋuma baatu, ni mugendaana mu mbeŋo, gabahumbaania ngʼabalabirira, hyʼomuutu alabirira emunge yʼemoni yiye.

¹¹ Hya haŋungu ngʼolu asomesa owaana waayo ohuguluha, gabuŋira mu bbanga, era gahena gataŋo amabaŋa ohubuŋonia ohugwa, ni Musengwa yeesi pwahola atyo ohuŋonia Abayisirayiri.

¹² Musengwa yeŋene njʼowabatangirira, era eŋuma hatonda obundi owabayeeda.

¹³ “Gabaŋa ohuba abaŋugi mu hyalo ehyʼesozi, nga balya ebibala ebi balima mu ndimiro. Bagaana omudugere mu mabaale, era emizayiti jaawe jahula mu mabaale.

¹⁴ Eŋombe nʼembusi jaawe jaŋwamo amabeere ameene amangi, jiŋwamo amabeere ameene amangi agʼeŋombe, nʼemiigu nʼembusi engeji, jʼembego endaŋi nʼengaano yoosi endaŋi ohuŋwa e Bbasani. Banywa omwenge ogwomu mizabbibbu omulando hyamafugi.

¹⁵ “Aye Yesuramu mangu nyo bafunduŋala nga bafuuha bajeemu. Baalya emere beguta, nga baŋwa hu wabatonda, era banyooma Olwanda, Omunoŋosi waawe.

¹⁶ Bamuleetera ewuba, olwʼohujumirya abahatonda abandi. Bamuleetera ehiruŋi olwʼohujumirya ebiitu ebibbote.

¹⁷ Baŋongera emisambwa, ejitali Hatonda, abahatonda aba baali ni batamanyire, abahatonda aba baali ni bahamanyanga, aba basehulu baawe batajumiryanga.

¹⁸ Sibahebulira oyo Olwanda owabatonda, beebirira Hatonda owabawumba.

¹⁹ “Musengwa ni gahibona gabaluŋira. Abaana babe abahaana nʼabaseere bamusunguŋasa.

²⁰ Ngʼabaloma ati, ‘Nja hubehweha, ko mbone ngʼolu banahahenerese, abo abatali besigwa, abaatu bʼomulembe omugodami.

²¹ Bapambisa ewuba ni beeŋa ebitali Hatonda. Basunguŋahise ni besiga ebiitu ebibbote. Keesi nja hubaŋambya ewuba, ni ndumirwa abaatu aba muŋeega muuti mbo baŋuma punga yiita hiswa. Nja hubaleetera ohuluŋa olwʼegwanga lyʼabo abaŋubeebe.

²² Obusungu wange wohya hyʼomuliro ogwohya hiisi ehiri hu hyalo. Era gwohya ohwola emagombe ŋaasi eyo, gwohya emisingi jʼesozi.

²³ Ndi babungihaho ebigosi era nja hubaheneraho obusaale wange.

²⁴ Nja hubaŋindihira enjala nʼomusuuja, obulwaye owahabi buja hubahenaŋo. Nja huŋindiha esolo ekambwe jibalye, nʼemisota ejʼobusagwa jibabooje.

²⁵ Baja hufiira ebulafu mu nguudo nʼomugati mu nyumba obuti buja hubaŋamba, abaseere nʼabahaana, omuhayire owʼefi nʼomuŋere owooka, baja hufanga hufa.

²⁶ Hani nabaheneeyeŋo erala hu hyalo, ŋabuleŋo abahebulira.

²⁷ Aye sinendire abalabe baawe ohwepaaha mbo njʼababahenireŋo. Baja huloma baati, “Olwʼamaani geefe hubaŋanguuye, Musengwa sinje aholire ebyo.” ’ ”

²⁸ Nga Musa geyongera aloma ati, “Yisirayiri gwanga lyʼabaatu abaŋubeebe, baŋuma hutegeera.

²⁹ Singa balimo amagesi bahategeeye ehyo ehija huboolaho.

³⁰ Omulabe mulala abbinga atye Abayisirayiri olukumi, oba abalabe babiri bafulumusa omutwalo, ohutusaho oyo Olwanda nʼabaŋayeeyo, ohutusaho nga Musengwa abalehireeŋo?

³¹ Abalabe beefe bamanyire baati abahatonda baawe sibamaani hyʼOlwanda lwefe.

³² Abalabe beefe bali hyʼendimiro jʼemizabbibbu eji bahoma e Sodoma ni Gomora, emizabbibbu ejiri nʼobutwa nʼebibala byajo birulu.

³³ Omwenge gwajo guli hyʼobusagwa wʼemisota, wiita hyʼobusagwa wʼefulugundu.

³⁴ “Musengwa aloma ati, ‘Sindihubiiha ebiitu ebyo byosibyosi ni mbihweha mu sitoowa yange?

³⁵ Ohwegalula hwange, ndibesasula. Ebiseera bija hwola bagwe, oludaalo olwʼohubonaabona luboolireeho.’

³⁶ “Musengwa aja hununula abaatu babe, era saaja hubasalira musango. Aja huŋambira abaŋeeresa babe ehisa, olu alibona ni baŋoyemo amaani, era ni ŋaŋumamo asigaaye, omusibe nʼowedembe.

³⁷ Musengwa alibabuusa ati, ‘Abahatonda benywe bali ŋe, abʼamaani aba mwesiganga?

³⁸ Abahatonda abalyanga amasavu gʼeŋongo lyenywe, era banywa omwenge ogwʼemizabbibbu ogu mwabaŋanga? Baaje babayeede, babahuume.

³⁹ Ese samwene ndiise era ŋaŋuma hatonda wundi. Ese ndiise owiita era ndiise agaba obulamu. Fumita era naŋonia ŋaŋuma asobola ohunyagulaho ehiba ni hiri mu buŋangi wange.

⁴⁰ Ngolola omuhono gwange ŋamugulu nalayira ti, “Ngʼolu ndi ndiise omwene bulamu emirembe nʼemirembe,

⁴¹ nja huŋagala epiima yange emasamasa, mbone ti ŋabaaŋo ohutehubbira. Nja hwesasusa abalabe bange, nja huboneresa abatanyenda.

⁴² Obusaale wange bulihwana amafugi, nʼepiima yange eja hunabulanabula emibiri. Nja huhenaŋo hiisi oyu pamba, era nja husalaho emitwe jʼabatangirisi baawe.” ’ ”

⁴³ Nga Musa geyongera aloma ati, “Enywe amawanga, musaŋalye olwʼesangaalo, musangaale nʼabaatu ba Musengwa, aja hwesasusa olwʼabaŋeeresa babe, aja hwegalula abalabe babe aja husoniŋa abaatu babe.”

⁴⁴ Nga Musa atiina ni Yoswa omusaani wa Nuuni agobolamo ebibono byʼolwembo, abaatu ni baŋulirisa.

⁴⁵ Era Musa ni gahena ohulomera Abayisirayiri ebibono ebyo byosibyosi,

⁴⁶ ngʼabaloma ati, “Muŋeegenga hu biitu byosibyosi ebi mbalagiiye olwa leero, mulagire nʼabaana benywe bafubengaho ohwoheresa byosibyosi ebiri mu magambi ago.

⁴⁷ Esomesa yino sibibono ebinambulamo, olwohuba ebiitu bino bibaleetera obulamu. Mubigondere ko muwangaale mu hyalo ehi muja hwambuha olwabi Yoludaani ohuŋira.”

Musengwa aloma Musa atiine eyi aja hufiira

⁴⁸ Nga hu ludaalo olwene olwo Musengwa aloma Musa ati,

⁴⁹ “Tiina hu sozi ejʼe Abbariimu, hu lusozi Nebbo mu hyalo hyʼe Mowaabbu, ohuupi nʼehibuga Yeriko, olengere ehyalo hyʼe Kanani, ehyalo ehi ndi huŋa Abayisirayiri ohuba obusika waawe.

⁵⁰ Hu lusozi olwo, oja hufiira eyo otiine wegaate hu basehulu babo, ngʼolu mugandawo Alooni gafiira hu Lusozi Hoori, ngʼatiina hu basehulu babe.

⁵¹ Hiri hiityo olwohuba enywe mwembi simwali besigwa eyi ndi mu moni jʼAbayisirayiri ni mwali hu maaji gʼe Meribba Kadesi, mu lulafu lwʼe Ziini, simwatamo ŋono.

⁵² Olwʼehyo, oja hulengera ehyalo ehi ndi huŋa Abayisirayiri aye sooja hu hyolamo.”