2 Samwiri 1 - Endagaano Epyaha ko n'ebitabo ebindi eby'Endagaano Ekayire mu Lunyole

Dawudi aŋulira ebiŋamba hu hufa hwa Sawulo

¹ Oluvanyuma lwʼohufa hwa Sawulo, Dawudi gagobola e Zikilagi nʼahenire ohuŋangula Abameleki ngʼamenya eyo endaalo ebiri.

² Hu ludaalo olwohudatu yaaliyo omuutu owaŋwa mu kambi ya Sawulo ni gambaaye engoye enabuhi nʼefuuhe mu mutwe. Ni goola aŋa Dawudi gaali, ngʼahubba amafuha ohulaga ati amuŋa eŋono.

³ Nga Dawudi amubuusa ati, “Oŋwera ŋeena?” Ngʼomusinde oyo amugobolamo ati, “Neyibire mu kambi yʼAbayisirayiri.”

⁴ Nga Dawudi amubuusa ati, “Byali biitye?” Ngʼamugobolamo ati, “Eŋe lyefe lyadulumire mu lutalo era baatu bangi baafa. Era Sawulo nʼomusaani Yonasaani boosi bafiiramo.”

⁵ Nga Dawudi amubuusa ati, “Omanyire otye oti Sawulo nʼomusaani Yonasaani bafuuye?”

⁶ Ngʼomusinde oyo amugobolamo ati, “Naali hu lusozi Gilubboowa nʼabona Sawulo ni gediiye hu fumo lirye. Era nabona nʼabasirikale abʼAbafirisuuti abagendera hu bigaali nohu mbalaasi ni bamwolireho.

⁷ Ni gacuuha gambona, gananga nga mugobolamo ti, ‘Wanji.’ ”

⁸ Nga gambuusa ati, “Ndiiwe ani?” Nga mugobolamo ti, “Ndi Mumeleki.”

⁹ Ngʼaŋo gandoma ati, “Nja ŋano wunjite! Banjohiseeho ebisago ebyʼamaani, sinja huŋona.”

¹⁰ Olwʼehyo negerera aŋa ali namwita olwohuba namanya ti ngʼolu aguuye ŋaasi sasobola huŋona. Namufiihula engule hu mutwe nʼehihomo ehyali hu muhono era mbebino musengwa yange.

¹¹ Ngʼaŋo Dawudi nʼabasirikale babe nga banabula engoye jaawe.

¹² Balira era basiiba ohuŋwa mu mugamba ohwola egulo olwa Sawulo nʼomusaani Yonasaani nohu lwʼeŋe lya Musengwa nohu lwʼAbayisirayiri abaali ni bafiiriiye mu lutalo.

¹³ Nga Dawudi abuusa omusinde oyo owaaja ohumulomera amaŋuliro ago ati, “Oŋwera ŋeena?” Ngʼamugobolamo ati, “Ndi Mumeleki omwihasi womu gwanga liryo.”

¹⁴ Nga Dawudi amubuusa ati, “Lwahiina sotyeho ohusihiirisa oyu Musengwa gajuhaho amafuta?”

¹⁵ Nga Dawudi alanga mulala hu basirikale babe amuloma ati, “Mwite!” Ngʼomusinde oyo asoŋolayo epiima amuhenaŋo.

¹⁶ Dawudi galoma Omumeleki oyo ati, “Amafugi gago gabe hu ewe wamwene. Omunwa gugwo guhusaliiye omusango nʼolomire oti, ‘Neetire oyu Musengwa gajuhaho amafuta.’ ”

Dawudi geririgana hulwa Sawulo ni Yonasaani

¹⁷ Nga Dawudi gemba olwembo olwʼohweririgana oluŋamba hu Sawulo nʼomusaani Yonasaani.

¹⁸ Era galagira abaatu babe ohusomesa hiisi muutu mu Buyudaaya olwembo olwo. Gaaŋa olwembo olwo esiina ati, “Olwembo olwʼomubaso,” Era baluŋandiiha mu hitabo hya Yasari.

¹⁹ “Hu sozi ja Yisirayiri, abatangirisi babo bafuuye! Abasira beefe baguuye!

²⁰ “Mutahiromera baatu bʼe Gaasi, mutasalania maŋuliro ago mu nabiŋwera yʼAsikelooni, mutaleetera bahaana Bafirisuuti ohusaŋalya, abahaana bʼabatali bahomole ohusangaala.

²¹ “Enywe esozi jʼe Gilubboowa, eŋume lume oba efula etonya, oba endimiro jenywe ohwama ebibala, olwohuba engabo yʼomusooli omusira bayonoona, engabo ya Sawulo sibahiyiŋahaho mafuta gwomu mizayiti.

²² “Epiima ya Yonasaani yaali sesoboha, epiima ya Sawulo yaali eŋuma hisa, ni yiita abanamaani, ni yiita abalabe.

²³ “Sawulo ni Yonasaani baali beŋunjisa era ni bali bahoda, era baali ŋalala ni bahiiri balamu, baali ŋalala nomu hufa. Bahuŋuhanga hya haŋungu, era baali bʼamaani ohuhira epologoma.

²⁴ “Abahaana bomu Yisirayiri mulire Sawulo owabambasa engoye endaŋi owabambasa ebihomo ebyʼezaabbu.

²⁵ “Abasooli abasira baguuye babeetiiye mu lutalo, Yonasaani agalamiriiye hu sozi.

²⁶ “Kulira ewe Yonasaani, muganda yange, ngʼobaaye muhoda eyi ndi. Obaaye wunyenda ehibitiiriye nʼohusinga ohwenda ohu muhasi gendamo wamwe oba omwana wuwe.

²⁷ “Abasooli abʼamaani baguuye. Ebisoosa byʼolutalo bisihiirihire.”