Hebreo 1 - Kalinga Butbut

Nan Ina'apudyus Hesus Gway Ana' Apudyus

¹ Sa'ad san agwi nanginnadchu ja nan'aya'ayasi nan in'aman Apudyus gway na'aapapat sasan nerpugwan ta'u kapu sasan profetana.

² Gwon sa'ad san annachaja mangudchi erkaw na'aapapat as sija an chita'u kapu san Ana'na gway sija nan chinutu'ana as mangin'ugwa san losan. Kapu ahos san Ana'na inggwan Apudyus chanan luhung ja chanan losanay agwad ad langit.

³ Nan Ana'na nan maillan nan ina'erjadna ja sija nan ustu'ustu ilan nan ina'apudyus Apudyus ancha sija nan manitingngil san losan kapu san ayobhongan nan ukudna. Nappungna kun inggwa nan losan tot ligwatan Apudyus nan whersun chanan taku, ummoy ad langit kun na'atuyay san machigwanan Apudyus gway Amod nan Ayobhongana.

Nangatngatu Nan Ana' Apudyus Sasan A'anghel

⁴ Nangatngatu nan Ana' Apudyus sasan a'anghel kapu tan inatchan Apudyus as sija san saad ad langit gway nangatngatu an chicha.

⁵ Tan jo'o anan Apudyus san osa sasan a'anghelnaon, “Si'a nan Ana''u, san sana nangngachan sa'on nan Amam?” Gwinnu jo'o anana hoson, “Sa'on nan mangngachan Amana ad sija nan mangngachan Ana''u?”

⁶ Sa'ad san mangipaaliyan Apudyus san osossa''anay ana'na ad asna luhung anana, “Cha'ajuway a'anghel'u maserpu chajagwonju losan as sija.”

⁷ Ad sa'ad nan mipangkop sasan a'anghel, anan Apudyus, “Oon Apudyus chanan a'anghelna gway mansilsilwhi an sija as isun chi tungnin ja isun chi kukumngot gway apuy.”

⁸ Gwon nu mipangkop san Ana'na, anana, “Sa'ad nan mantuyajam Apudyus, ingkaingkana ja nalintog nan intuttuyaynu san mantuyajam.

⁹ Impatognu nan manggwaan san ustu kun kinuyam nan manggwaan san lagwing. Sija nan sa'on gway Apudyusnu pinili' si'a ja inggwa' si'a as nayagyagsa' sasan huhuyunnu kapu san chajaw gway inatod'u an si'a.”

¹⁰ Kun anan ahos Apudyus san Ana'na, “Si'a, Apu, nan nanggwa san luta san chamuchamu ja chanan losanay agwad ad langit.

¹¹ Mumaidcha gwon sumissija'a ja losancha chumachaan as isun nan luput.

¹² Ad tinupim chicha as isun nan akoy, ad naorsancha hos as isun nan masu'atan nan luput. Gwon sissija'a gway achi kun manohos, ad sa'ad nan whijagnu achi kun mapungpung.”

¹³ Maid kun nangiwhagan Apudyus san osa sasan a'anghel as nanggwanaanaon, “Ma'atuyay'a an sa'on ingkanas ipaawha''u chanan ahursum ad isucha nan layappangan nan i'im.”

¹⁴ Ad ngachan maangkay pangkop chanan a'anghel? Chicha nan achi mailaay mansilsilwhi an Apudyus gway whawha''unona tot humachangcha sasan takuway takuwona.