Yohana 9 - Testamente Ledrimpswha ni Mapsalma

Kuhanyisiwa ka mhunu angapswaliwa na afi mahlu

¹ Loko Yesu alikari akhalutela mahlweni, avona mhunu lweyi apswaliwiki na afi mahlu.

² Kutani vadondrisiwa vakwe vamuvutisa vaku: Mufundrisi, xana i mani lweyi angadoha, xana hi yelweyi kumbe i vapswele vakwe; leswi angapswaliwa na afi mahlu, xana?

³ Yesu ayangula, aku: Ahi yene lweyi angadoha, nambi vali vapswele vakwe; kambe hileswaku a mintiro ya Xikwembu Nkulukumba mitavoneka ha yene.

⁴ Hifaneli kutira mintiro ya lweyi anirumiki, na dambu dringasangana pela; a vusiku byata, lebyi mhunu atakava angahakoti kutira hikola ka byone.

⁵ Loko nahali misaveni ni kuvaninga ka misava.

⁶ Kuti loko ahlayi leswo, athukela hansi apfuva ntraka hi mari, atota a mahlu ya lweyi wa kufa mahlu hi ntraka wa kone,

⁷ ahangaku ku yene: Famba uyahlamba anhlobyeni ya Silowa (hileswaku Ntrumi.) Kutani aya hlamba; abuya na avona.

⁸ Lava vayakelaniki na yene ni lava afaka vamuvona na ali mukombeli, vaku: Xana a mhunu lweyi ahi yene lweyi afaka atolovela kutrhama akombela xana?

⁹ Van'we vaku: Hi yene. Van'wna vaku: Im'hi, ahi yene; kambe afana na yene. Yene ha vuswake aku: Hi mine!

¹⁰ Kutani vaku ku yene: A mahlu yaku mapfulisiwi kuyini xana?

¹¹ Yene ahangayangula, aku: A mhunu lweyi valiki hi Yesu, apfuvi ntraka, anitota mahlu ha wone, kutani aku ku mine: Famba uyahlamba a nhlobyeni ya Silowa. Nahangafamba, niyahlamba, kutani nivona.

¹² Vaku ku yene: Akwini a mhunu yelweyi? Aku: Animutivi.

A vafarisi vakaneta ntamu wa Yesu

¹³ A mhunu lweyi afaka ali wa kufa mahlu, ntrhaku vamuyisi ku vafarisi.

¹⁴ A siku ledri Yesu angapfuva ntraka apfula mahlu ya mhunu lweyo ha drone, afa dri siku dra Savata.

¹⁵ A vafarisi na vone vamuvutisa leswi apfulisiwiki xiswone a mahlu. Yene aku ku vone: Anitoti mahlu hi ntraka; niva niyahlamba, kutani navona.

¹⁶ Van'we vafarisi vaku: Lweyi ayentxiki leswi angapfi ku Xikwembu Nkulukumba, hikusa angalondrisi Savata. Van'wana vaku: Xana mhunu lweyi anga mudohi angaswikotisa kuyini kuyentxa mahlolana yange hi lawa xana? Kutani afa kuni kuhambana amakari kwavu.

¹⁷ Vatlhela vavutisa lweyi faka ali wa kufa mahlu, vaku: Wene-ke uli yini ha yene, leswi akupfuliki mahlu? Yene aku: I muprofeta!

¹⁸ A va-Yuda afa vangapfumeli leswaku a mhunu lweyi afa ali wa kufa mahlu, ni leswaku swoswi awavona, vako vavitana vapswali vakwe;

¹⁹ vavavutisa, vaku: Xana a mhunu lweyi i n'wanenu, lweyi n'wihlayaka leswaku apswaliwi na afi mahlu xana? Swoswi aswikotisa kuyini akuvona xana?

²⁰ A vapswali vakwe vayangula vaku: Haswitiva leswaku lweyi i n'waneru, ni leswaku apswaliwi na afi mahlu.

²¹ Kambe leswi swiyentxiki leswaku swoswi avona, ahiswitivi, ni lweyi amupfuliki mahlu, ahimutivi. Muvutisani, i nkulu, atatiyangulela.

²² A vapswali afa vahlayisa xileswo hikutxhava ava fambisi va va-Yuda. Hikusa va-Yuda afa vayingelani leswaku, loko mhunu mun'wana anga txhuka ahlaya leswaku Yesu hi Mesiya, ata hlongoliwa a Tempeleni.

²³ Hikolahu a vapswali vakwe vangaku: Yene i nkulu, muvutisani.

²⁴ Vatlhela nangweso vavitana mhunu lweyi afaka ali wa kufa mahlu, vaku ku yene: Twalisa Xikwembu Nkulukumba! Hine haswitiva leswaku a mhunu lweyo i mudohi.

²⁵ Yene aku: Mine aniswitivi leswaku i mudohi. Nitiva ntxhumu mun'we ntsena: swinga leswaku afa ningavoni, kambe swoswi navona.

²⁶ Vaku ku yene: Ayentxi yini ku wene? Akupfulisi kuyini a mahlu xana?

²⁷ Avayangula, aku: Nin'wibyeli khale, kambe an'wipfumelanga ku mine. Hikola ka yini n'widjulaka kutlhela n'wiyingela mhaka leyi xana? Na n'wine n'widjula kuva vadondrisiwa vakwe xana?

²⁸ Kutani vamuruketela vaku: Hi wene unga mudondrisiwa wakwe. Hine hi vadondrisiwa va Moxe.

²⁹ Haswitiva leswaku Xikwembu Nkulukumba avulavuli na Moxe, kambe a mhunu lweyo, ahikutivi lomu apfaka kone.

³⁰ Lweyi apfuliwiki mahlu avayangula, aku: Hi leswi swihlamalisaka ha kakunene, leswaku an'wikutivi lomu apfaka kone, kasi anipfuli mahlu!

³¹ Haswitiva leswaku Xikwembu Nkulukumba angayingeli vadohi; kambe loko mhunu ali mutxhavi wa Xikwembu Nkulukumba, ayentxa ni kurandra kwake, Yene awamuyingela.

³² Kusukela akusunguleni ka misava akungiyingeliwa ni siku ni drin'we leswaku mhunu asama apfula mahlu amun'wana mhunu lweyi apswaliwiki na afi mahlu.

³³ Loko afa mhunu lweyo angapfi ku Xikwembu Nkulukumba, afa angatikota kuyentxa ntxhumu.

³⁴ Vamuyangula vafarisi vaku: Wene upswaliwi nsileni ya swidoho, ungahi dondrisa xana? Kutani vamuhlongola.

Vufamahlu bya vafarisi

³⁵ Yesu ayingela leswaku vamuhlongolile, andlwini ya Xikwembu Nkulukumba. Kutani amudjula, aku ku yene: Xana wapfumela ku N'wana wa Mhunu xana?

³⁶ Yene ayangula aku: Hi mani we Hosi, nitapfumela ku yene?

³⁷ Yesu aku ku yene: Umuvonile, hi yelweyi avulavulaka na wene.

³⁸ Yene ayangula aku: Hosi, napfumela. Kutani akhisama mahlweni ka Yesu.

³⁹ Yesu aku: Nitile misaveni leyi kutayavanyisa leswaku lava vangavoniki vavona, ni leswaku lava vavonaka vandruluka va kufa mahlu.

⁴⁰ Vafarisi van'wana lava afaka vali na yene, vayingela maritu lawa, kutani vaku ku yene: Xana na hine hi va kufa mahlu ke?

⁴¹ Yesu aku ku vone: Loko afa n'wi va kufa mahlu, afa n'wingativana nandru; kambe swoswi, leswi n'wiliki: Havona, hi kone n'wingani nandru.