Yohana 8 - Testamente Ledrimpswha ni Mapsalma

Yesu a drivalela wansati wa vumbuye

¹ Ntrhaku Yesu aya Nhaveni ya Minhlwari.

² Hi siku ledri landrelaka ampundrwini, atlhelela Ndlwini ya Hosi; a vhanu hinkwavu vata ku yene. Kolahu Yesu atrhama, asungula kuvadondrisa.

³ Kutani vadondrisi va Nawu ni vafarisi vatisa wansati lweyi akhomiwiki vumbuyeni. Vamuyimisa mahlweni ka hinkwavu,

⁴ kutani vaku ku Yesu: Mudondrisi, a nsati lweyi akumiwi na ayentxa vumbuye.

⁵ Moxe ahileleti Nawini kukhandla hi maribye a vavasati vakunhati. Xana wene, uliyini ke?

⁶ Afa vahlaya leswo hi kumudringa, leswaku vatakuma mhaka leyi vangamurambelaka ha yone. Kambe Yesu akarama, atralatrala hansi hi litiho.

⁷ Kambe leswi afaka vaphikelela kumuvutisa, ahangawololoka, aku ku vone: Lweyi angekena xihono, amakari kwenu, arange amutxukumetela hi ribye.

⁸ Atlhela akarama, atralatrala.

⁹ Kutiki loko vayingeli leswo, vahuma ha mun'we ha mun'we, kusungula hi lava vakulu, Yesu asala vuswake kun'we ni lweyi wansati afaka ayimi makari.

¹⁰ Kutani Yesu awololoka, aku ku yene: Wansati, vakwini lava vakurambeliki xana? Akuna ni mun'we lweyi a kuyavanyisiki xana?

¹¹ Aku: Angakone, Hosi. Yesu aku ku yene: Na mine, anikuyavanyisi. Famba, ungahatlheli udoha.

Yesu, Livaningo dra misava

¹² Kutani Yesu atlhela avulavula navu, aku: Hi mine livaningo dra misava. Lweyi anilandraka angaka angafambi munyameni, kambe atava ni livaningo dra vutomi!

¹³ A vafarisi vahangaku ku yene: Wene utihambela vumboni ha vuswaku! A vumboni byaku abyitiyanga.

¹⁴ Yesu avayanguli, aku: Ni loko nitihambela vumboni, a vumboni byanga byitiyile, hikusa nitiva lomu nihumaka kone; kambe n'wine an'witivi lomu nihumaka kone, ni lomu niyaka kone.

¹⁵ N'wine, n'wiyavanyisa hi ndlela ya vhanu; mine aniyavanyisi mhunu.

¹⁶ Kambe, ni loko niyavanyisa akuyavanyisa kwanga hi loku kunene; hikusa ani vuswanga, Tatana lweyi anirumiki ana mine.

¹⁷ Anawini wenu kutraliwi leswaku a vumboni bya vhanu vabiri byitiyile.

¹⁸ Hi mine lweyi nitihambelaka vumboni, na yene Tatana, lweyi anirumiki, ahamba vumboni henhla kwanga.

¹⁹ Vaku ku yene: A tatana waku akwini? Yesu ayangula, aku: An'winitivi, nambi ali Tatana wanga an'wimutivi; loko afa n'winitivile, an'witativa ni Tatana wanga.

²⁰ Yesu ahlayi maritu lawa loko ali kari adondrisa a Tempeleni, ambangwini lowu afaka kubekiwa ku wone a swibya swa nhlengo. Kolahu akuvanga na mhunu lweyi angamukhoma, hikusa a nkama wakwe afa wungasinatlhasa.

Hi mani Yesu?

²¹ Yesu ayengeta aku ku vone: Nafamba, kutani n'wita nidjula, kambe n'witafela akudoheni kwenu. Laha niyaka kone, n'wingaka n'wingayi.

²² Kolahu va-Yuda vaku: Xana atatisunga, leswi aliki: Laha niyaka kone, n'wingaka n'wingayi, xana?

²³ Aku ku vone: N'wine n'wi va lana hansi; mine ni wa le henhla; n'wine n'wi va misava leyi; mine ani wa misava leyi.

²⁴ Hileswo-ke nin'wibyeli leswaku n'witafela swihonweni swenu; hikusa loko n'wingapfumeli leswaku Mine ni yene, n'witafela swihonweni swenu.

²⁵ Kolahu vaku ku yene: Hi wene mani? Yesu aku ku vone: Swanga hi leswi nin'wibyelisiki xi swone akusunguleni

²⁶ Afa nini leswi swinyingi ningaswihlayaka ni kuswiyavanyisa ahenhla kwenu. Kambe lweyi anirumiki i xihlayelamfuri ha vuswake; kutani leswi niswiyingeliki ku yene, nitivisa misava.

²⁷ Vone ava yingelisisanga leswaku afa akhanela navu hita Tatana.

²⁸ Hilahu Yesu angaku ku vone: Loko n'witava n'witlakuxi N'wana wa Mhunu, hi kone n'witakativa leswaku hi mine lweyi, kutani na swone n'witativa leswaku aniyentxi ntxhumu hi kurandra kwanga. Kambe nihlaya leswo hi laha Tatana anidondrisiki ha kone.

²⁹ Lweyi anirumiki, ana mine; anganitrikanga vuswanga, hikusa masiku hinkwawu niyentxa leswi swimutrhavisaka.

³⁰ Loko ali kari ahlaya timhaka leto, lava vanyingi vapfumela ku yene. A xihlayelamfuri i muntrhunxi

³¹ Yesu aku ku va-Yuda lava afaka vapfumeli ku yene: Loko n'witiyisela ritwini dranga, n'witava vadondrisiwa vanga ha kunene.

³² Na swone n'witativa xihlayelamfuri, kutani a xihlayelamfuri xitan'wintrhunxa.

³³ A va-Yuda vamuyangula, vaku: Hi vana va Abrahamu; ahingiva swikarawa swa mhunu ni siku ni drin'we. Ungahlayisa kuyini uku: Hitava lava vantrhunxiwiki, xana?

³⁴ Yesu avayangula, aku: Nan'wibyela leswaku mun'wana ni mun'wana lweyi ayentxaka xihono, i xikarawa xa xihono.

³⁵ A xikarawa axitrhameli vugamu a kaya, kambe lweyi atrhamaka kaya masiku hinkwawu i N'wana.

³⁶ Hikolahu ke, loko N'wana an'wintrhunxa n'witava lava vantrhunxiwiki ha kunene.

³⁷ Naswitiva leswaku n'wi vana va Abrahamu, kambe n'widjula kunidlaya, hikusa a ritu dranga adri nhingenisisi andreni kwenu.

³⁸ Mine nikhanela hi leswi niswivoniki ku Tatana, kambe n'wine n'wiyentxa leswi n'wiswiyingeliki ku Tatana wenu.

³⁹ Vamuyangula, vaku: A tatana weru hi Abrahamu. Yesu aku ku vone: Loko afa n'wi vana va Abrahamu, an'witatira mintiro ya Abrahamu.

⁴⁰ Kambe swoswi n'widjula kunidlaya, mine nin'wibyeliki xihlayelamfuri lexi nixiyingeliki ku Xikwembu Nkulukumba! Leswo Abrahamu angaswiyentxanga.

⁴¹ N'wine n'wiyentxa mintiro ya tatana wenu. A va-Yuda vaku: Hine ahi vana va vumbuye. Hina Tatana mun'we ntsena, anga Xikwembu Nkulukumba.

⁴² Yesu aku ku vone: Loko afa Xikwembu Nkulukumba ali tatana wenu, afa n'witanirandra, hikusa mine nipfa ku Xikwembu Nkulukumba. Anitanga hi kutisungulela, kambe hi Yene anirumiki.

⁴³ Hikola kayini n'wingayingelisisi leswi nihlayaka swone xana? Hi leswi n'wihlulekaka kuyingela ritu dranga.

⁴⁴ N'wine n'wipfa ku tatana wenu, anga Diyavulosi, kutani n'wirandra kulandra a kunavela kwake. Lweyo i mudlayi wa vhanu ni le kusunguleni, kutani angatrhamanga xihlayelamfurini; hikusa akuna xihlayelamfuri andreni kwake. Loko ahlaya madrimi ahlaya leswi swinga kone ambilwini yake, hikusa i muhembi, i tatana wa kuhemba.

⁴⁵ Kambe leswi mine nihlayaka xihlayelamfuri, an'wipfumeli ku mine.

⁴⁶ Hi mani ku n'wine lweyi angakombaka xidoho xanga xana? Loko nihlaya xihlayelamfuri, hikola kayini n'wingapfumeli ku mine xana?

⁴⁷ Lweyi apfaka ku Xikwembu Nkulukumba ayingela maritu ya Xikwembu Nkulukumba. Leswi swiyentxaka leswaku n'wingayingeli, hileswaku an'wi va Xikwembu Nkulukumba.

Yesu na Abrahamu

⁴⁸ A va-Yuda vayangula, vaku ku yene: Xana ha hemba loko hiku, u mu-Samariya, ni leswaku uni demoni xana?

⁴⁹ Yesu ayangula, aku: Mine anina demoni, kambe nitxhava Tatana wanga, kasi n'wine an'winitxhavi.

⁵⁰ Anitidjuleli kutwalisiwa; Tatana hi yene lweyi adjulaka kunitwalisa, na swone awaniyavanyisela.

⁵¹ Nihlayelamfuri nili ku n'wine, a mhunu lweyi abekisaka ritu dranga, angaka angavoni lifu hi la kungahelikiki.

⁵² A va-Yuda vaku ku yene: Swoswi haswitiva leswaku uni demoni, Abrahamu afile na vone vaprofeta vafile; kutani wene uli: Loko mhunu abekisa ritu dranga, angaka angafi hi la kungahelikiki.

⁵³ Xana u nkulu kutlula tatana weru Abrahamu? Yene afile na vone vaprofeta vafile. Kolahu, udjula kutiyentxa mani?

⁵⁴ Yesu ayangula, aku: Loko ni titwalisa ha vuswanga akutwala kwanga akupfuni ntxhumu. Lweyi anitwalisaka hi Tatana wanga lweyi n'wiliki: I Xikwembu Nkulukumba weru;

⁵⁵ kasi an'wimutivi, kambe mine namutiva. Loko afa niku: animutivi, afa ningava muhembi kufana na n'wine. Kambe mine namutiva, kutani nibekisa ritu drakwe.

⁵⁶ A tatana wenu Abrahamu, atrhavile hi leswi afaka atakavona siku dranga; adrivonile, ava atrhava.

⁵⁷ Kolahu va-Yuda vaku ku yene: Awusiva wa ntlhanu wa makume (50) ya malembe, kutani uli uvoni Abrahamu xana?

⁵⁸ Yesu aku ku vone: Hi leswaku na Abrahamu angasinatumbuluka, mine afa nili lweyi ninga yene.

⁵⁹ Kutani varola maribye akuva vamutxukumetela, kambe Yesu atumbela, kutani ahuma a Tempeleni.