Yohana 6 - Testamente Ledrimpswha ni Mapsalma

Mahlolana ya kuyandrisa makati

¹ Antrhaku ka leswo Yesu asuka awela tiva dra Galileya ledri valiki i Tiberiyasi

² Alandriwi hi xitrhungu lexi xikulu lexi afaka xifamba naye, hikusa afa xivoni mahlolana lawa amayentxiki ya kuhanyisa timbabyi.

³ Kutani Yesu antlhantukela nhaveni, ayatrhama ni vadondrisiwa vakwe.

⁴ A nkhuvu wa Paska dra va-Yuda afa wuli kusuhi.

⁵ Kuti loko Yesu avoni leswaku a xitrhungu xikulu xita ku yene, aku ku Filipi: Xana hingaxava kwini makati akuva vhanu lava vatada xana?

⁶ (Afa ahlaya leswo kuli kumudringa, hikusa yene n'winyi afa ativa leswi afaka ataswiyentxa.)

⁷ Filipi amuyangula, aku: A makati ya madzana mabiri (200) ya madenari (mali ya ntlhohe) mangaka mangavayaneli nambi loko mun'wana-ni-mun'wana angakuma xikhemu lexitrongo ntse.

⁸ A mun'wana wa vadondrisiwa vakwe, Andreyasi a makwa Simoni Petrosi, aku ku yene:

⁹ Kuni ndrisanyana mun'we halenu, lweyi angani ntlhanu wa makati ya sevhada ni tinhlampfi tibiri; kambe kungayanela vangani ku vhanu lavanyingi swakunhati xana?

¹⁰ Yesu aku: Trhamisisani vhanu. A byanyi afa byi byinyingi a mbangwini wolowo. Kutani vhanu vatrhamisa hansi; loko va hlayiwa, afa vadjula kutlhasa ntlhanu wa makume ya madzana (5.000) wa vavanuna, ntsena.

¹¹ Kutani Yesu ateka makati, kuti loko atlangeli Xikwembu Nkulukumba, ayavela vhanu lava afaka vatrhamisile; ayentxisa xiswoswo ni hi tinhlampfi, hinkwavu vada swivadringana.

¹² Loko vaxurile, aku ku vadondrisiwa vakwe: Hlengeletani mantlhantlha lawa masaliki, akuva kungatxukumetiwi ntxhumu.

¹³ Vahlengeleta mantlhantlha ya ntlhanu wa makati ya sevhada, lawa masaliki, matata khume dra swihundru na swibiri (12).

¹⁴ A vhanu lava vavoniki mahlolana lawa Yesu amayentxiki, vaku: Ha kunene, lweyi hi yene muprofeta lweyi afaka afanekeli kuta misaveni.

¹⁵ Kambe Yesu, hi kutiva leswaku vadjula kuta, vatamuwutla akuva vamuyentxa mufumi, atlhelela nhaveni na ali vuswake.

Yesu afamba henhla ka mati

¹⁶ Loko dripela, a vadondrisiwa vakwe vafulamela nambyeni,

¹⁷ kutani vanhingena byatrhwini, vasungula kuwelela Kapernawume; kusungula kumphuma, na Yesu angasita ku vone.

¹⁸ Na swone a nambu afa wusungula kukarata hikusa mheho leyi yikulu afa yihunga hi ntamu.

¹⁹ Kuti loko vaweti mpfuka wa makume mabiri ni ntlhanu, kumbe makume mararu ya mamisitada, vavona Yesu na afamba henhla ka mati, atrhindrekela kusuhi ni byatrhu; kutani vatxhava.

²⁰ Kambe aku ku vone: Hi mine, n'wingatxhaveni.

²¹ Afa vadjula kumunhingenisa abyatrhwini, kambe hi nomu-lo, a byatrhu driyakhisa a saveni laha afaka vakongoma kone.

Yesu, kati dra vutomi

²² A siku ledri drintlantamaka, a xitrhungu lexi afaka xisali tlhelweni drin'wana dra nambu, xivona leswaku afa kungena byatrhu kone, loko dringe ledri avadondrisiwa vanganhingena ku drone, ni leswaku Yesu anganhingenanga kun'we ni vadondrisiwa vakwe; kambe vone vafambile na ve swavu.

²³ Kambe kuti mabyatrhu lawa mapfaka Tiberiyasi, matlhasa kusuhi ni mbangu lowu vangada makati ku wone, loko Hosi yitlangelile;

²⁴ Kuti loko ke vhanu vavoni leswaku Yesu ni vadondrisiwa vakwe afa vangehe kone kolahu, vanhingena mabyatrhwini wolawo, vawelela Kapernawume, vayadjula Yesu.

²⁵ Loko vamukumile ku tlhelo drin'wana dra nambu, vaku ku yene: Mudondrisi, xana utlhasi drini lomu?

²⁶ Yesu avayangula, aku: Nihlayelamfuri nili ku n'wine, n'wanidjula kunge hi leswi n'wingavona swikombiso, kambe hi leswi n'wingada makati n'wixura.

²⁷ N'wingatireleni swakuda leswi swibolaka, kambe tirelani swakuda leswi swingabolikiki, swinga leswi swinyikaka vutomi lebyi byingahelikiki. Leswi i swakuda leswi N'wana wa mhunu atakan'winyika swone, hikusa hi yene lweyi Xikwembu Nkulukumba Tatana amufungiki.

²⁸ Vahangaku ku yene: Hifanela kuyentxa yini a kutira mintiro ya Xikwembu Nkulukumba xana?

²⁹ Yesu avayangula, aku: A ntiro wa Xikwembu Nkulukumba hileswaku n'wipfumela ku lweyi amurumiki.

³⁰ Kutani vaku ku yene: Xana utira xikombiso xini xana, akuva hitaxivona, akuva hitapfumela ku wene? Xana utira yini?

³¹ A vatatana veru vadi mana ahuleni, swanga heswi kutraliwiki leswaku: Avanyiki kuda kati ledri drihumaka Tilweni.

³² Yesu avabyela aku: Nihlayelamfuri, nili ku n'wine: Moxe angan'winyikanga kati ledri drihumaka Tilweni, kambe Tatana wanga an'winyika kati ledri drihumaka Tilweni, ledri dringa drone.

³³ Hikusa a kati dra Xikwembu Nkulukumba hi ledri drixikaka hi le Tilweni, na drinyikaka a vutomi misava.

³⁴ Kolahu vaku ku yene: Hosi, hinyike kati droledro masiku hinkwawu.

³⁵ Yesu aku ku vone: Hi mine kati dra vutomi. Lweyi ataka ku mine, angavina ndlala ni siku ni drin'we, ni lweyi apfumelaka ku mine angavina tora ni siku ni drin'we.

³⁶ Kambe nin'wibyeli khale leswaku, nambi leswi n'winivoniki, an'wipfumeli.

³⁷ Hinkwaswu leswi Tatana aninyikaka, switata ku mine; kutani lweyi ataka ku mine, ningaka ningamutxukumeti ni siku ni drin'we.

³⁸ Hikusa nixiki hi le Tilweni, kunge kutatayentxa kurandra kwanga, kambe kuli kurandra ka lweyi anirumiki.

³⁹ Kutani akurandra ka lweyi anirumiki hi loku; hileswaku ningalahli ni mun'we wa hinkwavu lava aninyikiki vone, kambe nivapfuxa ku lifu vaya vuton'wini hi siku dra vugamu.

⁴⁰ Hikolahu-ke a kurandra ka Tatana wanga, hileswaku mun'wana-ni-mun'wana lweyi alavisaka N'wana, ava apfumela ku yene, avani vutomi lebyi byingahelikiki, kutani mine nitamupfuxa hi siku dra vugamu.

⁴¹ Kutani va-Yuda va n'unun'uta hikola kwake, ni hi leswi atiki: Hi mine kati ledri drixikiki hi le Tilweni.

⁴² Kutani vaku: Xana lweyi ahi yene Yesu n'wana Yosefa, lweyi hi tivaka tatana wakwe ni mamana wakwe xana? Kutani swoswi ahlayisa kuyini, loko aku: Nixiki hi le Tilweni.

⁴³ Yesu ayangula, aku: Kungaveni kun'unun'uta amakari kwenu.

⁴⁴ Akuna mhunu lweyi angataka ku mine, loko Tatana lweyi anirumiki angamukokeli ku mine, kutani mine nitamupfuxa hi siku dra vugamu.

⁴⁵ Kutraliwi amabukwini ya vaprofeta: Hinkwavu vatadondrisiwa hi Xikwembu Nkulukumba. Hileswo-ke, mani na mani lweyi ayingeliki Tatana ni kudondra ku yene, ata ku mine.

⁴⁶ Ahileswaku kuni mhunu lweyi asamaka avona Tatana, loko ntsena ange lweyi ahumaka ku Xikwembu Nkulukumba avoniki Tatana.

⁴⁷ Nihlayelamfuri nili ku n'wine, lweyi apfumelaka, ani vutomi lebyi byingahelikiki.

⁴⁸ Hi mine kati dra vutomi.

⁴⁹ A vatatana venu vadi mana a mananga, kambe vafile.

⁵⁰ A kati ledri drixikaka hi le Tilweni hi drone ledri driyentxaka leswaku loko mhunu ada drone, angafi.

⁵¹ Hi mine kati ledri drihanyaka ledri drixikiki hi le Tilweni; loko mhunu ada kati ledro atahanya hi la kungahelikiki, a kati ledri nitakanyika drone, i miri yanga; nin'winyika akuva n'wiva ni vutomi.

⁵² A va-Yuda vakanetana ha vuswavu, vaku: Xana a mhunu lweyi angahinyikisa kuyini a miri yake akuva hida xana?

⁵³ Yesu aku ku vone: Nihlayelamfuri nili ku n'wine, loko n'wingadi miri ya N'wana wa Mhunu, ni loko n'winganwi ngati yake, an'wina vutomi andreni kwenu.

⁵⁴ Lweyi adaka miri yanga ni kunwa ngati yanga, ani vutomi lebyi byingahelikiki; kutani mine nitamupfuxa hi siku dra vugamu.

⁵⁵ Hikusa a miri yanga i swakuda ha kunene, ni ngati yanga i swakunwa ha kunene.

⁵⁶ Lweyi adaka miri yanga ni kunwa ngati yanga, atrhama ku mine, na mine nitrhama ku yene.

⁵⁷ Swanga hi leswi Tatana lweyi ahanyaka anirumiki, na mine nihanya hikola kwake, na yene lweyi anidaka atahanya hikola kwanga.

⁵⁸ Ledri hi drone kati ledrixikiki hi le Tilweni; adrifani ni ledri vatatana venu vadridiki, hikusa drone adri vasivelanga kufa; lweyi adaka kati ledri, atahanya hi la kungahelikiki.

⁵⁹ Yesu ahlayi timhaka leti loko adondrisa asinagogeni le Kapernawume.

Maritu ya vutomi lebyi byingahelikiki

⁶⁰ Loko vadondrisiwa lava vakutala va Yesu vayingeli leswo, vaku: A ritu ledri dra nonon'hwa; hi mani lweyi atakadriyingela xana?

⁶¹ Kambe Yesu aswitiviki mbilwini yake leswaku a vadondrisiwa vakwe van'unun'uta hikola ka leswo, kutani aku ku vone: Xana a mhaka leyi yan'wikhunguvanyisa xana?

⁶² Switakuyini, a siku n'witaka vona N'wana wa Mhunu antlhatukela lomu afaka ekone khale xana?

⁶³ A Moya hi wone wuhanyisaka, a handle ka wone a mhunu anganakuyentxa ntxhumu. A maritu lawa nin'wibyelaka wone, i Moya ni vutomi.

⁶⁴ Nambi swili tanu, van'wana amakari kwenu a vapfumeli. Hikusa aswitivile ni le kusunguleni, leswaku hi vamani lava vangapfumelikiki ni leswaku lweyi atakamuwonga hi mani.

⁶⁵ Kuva loko ayengeta aku: Hikolahu nin'wibyeliki, niku: Akuna mhunu lweyi angataka ku mine, loko anganyikiwanga swone hi Tatana.

⁶⁶ Kusukela nkameni wolowo, lava vanyingi ku vadondrisiwa vakwe vatlhelela ntrhaku, vangahafambafambi na yene.

⁶⁷ Hi loko Yesu aku ku lava va khume na vabiri: Xana na n'wine n'widjula kutifambela xana?

⁶⁸ Simoni Petrosi ayangula aku ku yene: Hosi, hingaya ku mani xana? Uni maritu lawa manyikaka vutomi lebyi byingahelikiki.

⁶⁹ Kutani hine hini kupfumela ni kuswitiva leswaku hi wene Muhlawuleki wa Xikwembu Nkulukumba.

⁷⁰ Yesu avayangula aku: Xana ahi mine ningan'wihlawula, n'wine lava va khume na vabiri? Kasi mun'we ku n'wine i Diyavulosi

⁷¹ Afa ahlaya Yudasi, n'wana Simoni Iskariyota, hikusa hi yene afaka atiyimiseli ku muwonga, nambi leswi afaka ali mun'we wa lava va khume na vabiri.