Yohana 5 - Testamente Ledrimpswha ni Mapsalma

Kuhanyisiwa ka lweyi wa kuwonyana swiro

¹ Antrhaku ka leswo, kuvani nkhuvu wa va-Yuda, kutani Yesu antlhantukela Yerusalema.

² A Yerusalema, hi tlhelo dra Mharana ya Tihamba, kuni vuhlambu lebyi hi Xiheberu valiki hi Bethesda; byingani ntlhanu wa tinxaxa ta tingumba

³ A vhanu vanyingi va timbabyi, ni vakufa-mahlu, ni swilema, ni va kuwonyana swiro, [afa vatekisa kuyatrhama kone valavisela kupfindluka ka mati.

⁴ Hikusa, hi minkama min'wana, yin'we ntrumi afa yixikela vuhlambyini yitatapfindluxa mati; kutani lweyi arangaka anhingena loko a mati mahakupfindluxiwa, afa ahanyisiwa, nambi ani mavabyi ya tinxaka-xaka.]

⁵ Afa kuni mhunu kone, lweyi afaka kuheli malembe ya makume mararu ni ntlhanu na mararu (38) na avabya.

⁶ Loko Yesu amuvona na ayetleli kolahu, nikuva ativi leswaku avabyi nkama wa kuleha, aku ku yene: Xana wa swidjula kuhanyisiwa xana?

⁷ A mbabyi yimuyangula, yiku: Hosi, anina mhunu wa kunipeta vuhlambyini, loko mati mahakupfindluxiwa; kutani loko niya kone, mun'wana anirangela, apela.

⁸ Yesu aku ku yene: Pfuka, urwala vunanu byaku, ufamba.

⁹ Hi nomu-lo, a mhunu lweyo ahanyisiwa, ahangarwala vunanu byake afamba. A siku ledro afa drili Savata.

¹⁰ Hikola ka leswo a va-Yuda vaku ku lweyi wa kuhanyisiwa: Namunhla i siku dra Savata; kutani utlula Nawu loko urwala vunanu byaku.

¹¹ Yene avayangula aku: Lweyi anihanyisiki hi yene atiki ku mine: Rwala vunanu byaku, ufamba!

¹² Vamuvutisi, vaku: Hi mani mhunu lweyi atiki rwala vunanu byaku ufamba, xana?

¹³ Lweyi wa kuhanyisiwa angativanga leswaku hi mani, hikusa Yesu afa asukile hikola ka xitrhungu lexi afaka xilikone.

¹⁴ Antrhaku ka leswo Yesu ayamukuma a Tempeleni, kutani aku ku yene: Lavisa, uhanyisiwile. Loko ungadjuli kuweliwa hi khombo ledri drikulu, dritlulaka a dra kuranga, trika kudoha.

¹⁵ Kutani a mhunu lweyo ahangabyela va-Yuda leswaku, lweyi amuhanyisiki, hi Yesu.

¹⁶ Hikola ka mhaka leyo, a va-Yuda vasungula kulandrelela Yesu, hikusa afa atiri leswo hi siku dra Savata.

¹⁷ Kambe Yesu avayangula, aku: Kutlhasa swoswi, Tatana wanga angasanganatrika kutira, kutani na mine, swanga ha yene, natira.

¹⁸ Hinkonta ya ritu ledro, va-Yuda vahundrisa kudjula kumudlaya, hikusa afa angatlulanga Nawu ntsena, kambe, na kone, hi kuhlaya leswaku Xikwembu Nkulukumba hi ntshima, i Tatana wakwe, atiyentxa lweyi afananaka ni Xikwembu Nkulukumba.

Vuhosi bya N'wana wa Xikwembu Nkulukumba

¹⁹ Hileswo-ke Yesu angavayangula, aku: Nihlayelamfuri nili ku n'wine, a N'wana angaswikoti a kutisungulela atira ntxhumu loko angavoni Tatana lweyi aswitiraka; hikuva leswi lweyo aswitiraka, na yene n'wana aswitirisa xiswoswo.

²⁰ Hikusa Tatana arandra N'wana; awamukomba hinkwaswu leswi aswitiraka Yene; kutani atamukomba ni mintiro leyi mitlulaka leyi, akuva n'witahlamala.

²¹ Swanga hi leswi Tatana apfuxaka vafi, atlhela avanyika vutomi, hi swoswo na yene N'wana, anyika vutomi ku lava arandraka kuvanyika.

²² Na swone Tatana angayavanyisi mhunu ni mun'we, kambe anyika N'wana a ntiro hinkwawu wa kuyavanyisa,

²³ akuva hinkwavu vavani xitxhavu ku N'wana, swanga heswi vangani xitxhavu ni le ku Tatana. Amun'wana ni mun'wana lweyi angekena xitxhavu ku N'wana, angana xitxhavu ni le ku Tatana lweyi amurumiki.

²⁴ Nihlayelamfuri nili ku n'wine, lweyi ayingelaka a ritu dranga, ava apfumela ku lweyi anirumiki, ani vutomi lebyi byingahelikiki, kutani angati kuyavanyisiweni, kambe ahumi kufeni anhingena vuton'wini.

²⁵ Nihlayelamfuri nili ku n'wine: A nkama wata, ni swoswi wutlhasile, lowu vafi vatakayingela ritu dra N'wana wa Xikwembu Nkulukumba, kutani lava vadriyingelaka vatahanya.

²⁶ Swanga hi leswi Tatana, ha vuswake angani vutomi, hi ndlela yoleyo anyiki N'wana kuvani vutomi na yene, ha vuswake.

²⁷ Na swone amunyiki ni ntamu wa kuyavanyisa hikusa i N'wana wa Mhunu.

²⁸ N'wingahlamali hi mhaka leyi; hikusa nkama wata, lowu hinkwavu lava vanga maxireni, vatakayingela ritu drakwe;

²⁹ kutani vatahuma lava vayentxiki leswi swinene, vatapfuka vaya vuton'wini lebyi byingahelikiki, lava vayentxiki leswimfani vatapfukela kuyavanyisiweni.

Swikombiso swa ntamu wa N'wana wa Xikwembu Nkulukumba

³⁰ Yesu aku: Ningaka ningatisunguleli niyentxa ntxhumu ha vuswanga. Niyavanyisa hi laha niswiyingelaka ha kone, kutani, akuyavanyisa kwanga kululamile, hikusa anidjuli kuyentxa kurandra kwanga, kambe kurandra ka lweyi anirumiki.

³¹ Loko nitihambela vumboni, a vumboni byanga ahi lebyi byinene.

³² Akone mun'wana lweyi anihambelaka vumboni, kutani nitiva leswaku leswi aswihlayaka ha mine i xihlayelamfuri.

³³ N'wirumeli vhanu ku Yohana, kutani Yene ahambeli xihlayelamfuri a vumboni.

³⁴ Aniyamukeli hi vumboni lebyi byihumaka ku mhunu, kambe nihlaya timhaka leti akuva n'witahuluxiwa.

³⁵ Yohana afa ali xivaningo lexi xilumekiwiki, xiphatimaka; kutani n'wine n'wirandri kutitrhavela nkamanyana kuvaningeni kwake.

³⁶ Kambe mine nini vumboni lebyi byitlulaka bya Yohana. Hikusa a mintiro leyi Tatana aninyikiki leswaku nimihetisisa, minga yo mintiro leyi nimiyentxaka, hi yone leyi minihambelaka vumboni bya leswaku nirumiwi hi Tatana.

³⁷ Naswone, Tatana lweyi anirumiki, na yene hi ntshima yake anihambeli vumboni. An'wingiyingela a ritu drakwe nambi kuvona vuso byake ni siku ni drin'we.

³⁸ A ritu drakwe adriyakanga ku n'wine, hikusa an'wipfumelanga ku lweyi Xikwembu Nkulukumba amurumiki.

³⁹ N'wilavisisa Matralwa, hikusa n'wiyanakanya leswaku, ku wone, n'witakuma vutomi lebyi byingahelikiki, kasi hi wone manihambelaka vumboni.

⁴⁰ Kutani an'wiswidjuli kuta ku mine leswaku n'wikuma vutomi lebyi byingahelikiki.

⁴¹ Aniyamukeli kutwalisiwa loku kuhumaka vhanwini;

⁴² kambe nan'witiva leswaku, an'wina lirandru dra kurandra Xikwembu Nkulukumba timbilwini tenu.

⁴³ Mine nitile hi vito dra Tatana wanga, kambe an'winiyamukeli; kasi loko mun'wana angata hi vito drakwe, lweyo n'witamuyamukela.

⁴⁴ Xana n'wingapfumelisa kuyini leswi n'wirandraka kutwalisana, n'wingadjuli kutwalisiwa loku pfaka ku Xikwembu Nkulukumba ha swake?

⁴⁵ N'wingayanakanyi leswaku hi mine nitakava murambeli wenu amahlweni ka Tatana. Lweyi atakan'wirambela hi Moxe, yelweyi n'wibekiki kudumba kwenu ku yene.

⁴⁶ Hikusa loko afa n'wapfumeli ku Moxe, ana n'wipfumeli ni le ku mine; hikusa afa tili timhaka tanga leti angatrala tone.

⁴⁷ Loko n'wingapfumeli matralwa yake, n'wingapfumelisa kuyini maritu yanga xana?