Yohana 3 - Testamente Ledrimpswha ni Mapsalma

Kukumana ka Yesu na Nikodema

¹ Afa kuni mun'we wa vafarisi lweyi afaka vaku hi Nikodema; afa ali mun'we wa tindruna ta va-Yuda.

² Ayi ku Yesu ni vusiku, atlhasa aku: Mudondrisi, haswitiva leswaku u mudondrisi lweyi apfaka ku Xikwembu Nkulukumba, hikusa akuna mhunu lweyi angayentxaka mahlolana lawa umayentxaka, loko Xikwembu Nkulukumba ange na yene.

³ Yesu amuyangula, aku: Nihlayelamfuri nili ku wene, akuna mhunu lweyi angavonaka Mfumu wa Xikwembu Nkulukumba, loko angatlhelanga apswaliwa hi vumpswha

⁴ Nikodema aku ku yene: Loko mhunu aduhwalile, swingayentxisa kuyini a kutlhela apswaliwa xana? Xana angaswikota kutlhelela ndreni a khurini dra mamana wakwe, atlhela apswaliwa ka vubiri xana?

⁵ Yesu ayangula, aku: Nihlayelamfuri nili ku wene, loko mhunu angapswaliwi hi mati ni Moya, angaka anganhingeni Mfun'wini wa Xikwembu Nkulukumba.

⁶ Leswi swipswaliwaka hi nyama i nyama; kambe leswi pswaliwaka hi moya i moya.

⁷ Ungahlamali loko niti ku wene hinkwavu vafanekela kubelekiwa ximpswha.

⁸ A moya wuhungela lomu wu kudjulaka, kutani uyingela mpfumawulu wa wone, kambe awukutivi laha wu humaka kone, ni laha wu yaka kone. Switanu ni le ku hinkwavu lava vapswaliwiki hi Moya.

⁹ Nikodema avutisa, aku: Xana leswi swingayentxekisa ku yini?

¹⁰ Yesu amuyangula, aku: U mudondrisi wa tiko dra Israyele, kambe a timhaka leti awutitivi xana?

¹¹ Nihlayelamfuri nili ku wene, hine hi khanela hi leswi hiswitivaka, kutani hihamba vumboni bya leswi hiswivoniki; kambe an'widjuli kuyamukela leswi niswihlayaka.

¹² Leswi n'wingapfumelikiki loko nin'wibyela hi swa la misaveni, xana n'witapfumelisa ku yini loko nin'wibyela hi swa le Tilweni xana?

¹³ Akuna mhunu lweyi asamaka antlhantukela Tilweni, loko ange kuva lweyi axikiki hi le Matilweni, anga N'wana wa Mhunu.

¹⁴ Kufana ni leswi Moxe angahayeka nyoka huleni, N'wana wa Mhunu na yene atafanela kuhayekiwa hi ndlela yoleyo,

¹⁵ leswaku mun'wana-ni-mun'wana lweyi apfumelaka ku yene, akuma vutomi lebyi byingahelikiki.

¹⁶ Hikusa Xikwembu Nkulukumba arandri misava swakunhati, ako anyika N'wanakwe lweyi apswaliwiki ali swake, leswaku mani na mani lweyi apfumelaka ku yene, angatxhuki alahleka, kambe akuma vutomi lebyi byingahelikiki.

¹⁷ Xikwembu Nkulukumba angarumanga N'wanakwe misaveni akuta yavanyisa misava, kambe afa ayentxela leswaku misava mihuluxiwa hi yene.

¹⁸ Lweyi apfumelaka ku N'wana, angayavanyisiwi; kambe lweyi angapfumelikiki ayavanyisiwile ni swoswi, hikusa anga pfumelanga ku N'wana wa Xikwembu Nkulukumba lweyi wa mun'we.

¹⁹ A kuyavanyisa hi loku: A kuvaninga kuti misaveni, kambe vhanu varandri munyama kutlula kuvaninga, hikusa mintiro yavu afa mibihile.

²⁰ Mun'wana-ni-mun'wana lweyi ayentxaka swakubiha, avenga livaningu, angarandri kuya livaningweni akuva a mintiro yake mingativaningiwa.

²¹ Kambe lweyi ahanyaka xihlayelamfurini, ata livaningweni, leswaku mintiro yake mitavoneka mili leyi mitiriwaka hi kulandra kurandra ka Xikwembu Nkulukumba.

Yesu na Yohana Mubabatisi

²² Antrhaku ka leswo, Yesu ni vadondrisiwa vakwe vaya tikweni dra Yudeya, kutani atrhama kone masikunyana na vone, ababatisa vhanu.

²³ Yohana na yene afa ababatisa le Enoni, kusuhi ni le Salime, hikusa afa mati matalile kone. A vhanu afa vaya ku yene, vayababatisiwa.

²⁴ Ankameni wolowo Yohana afa angasanganapfaleliwa abohelweni.

²⁵ Kutani kuhumelela kukanetana amakari ka vadondrisiwa va Yohana ni mun'we wa mu-Yuda, amhakeni ya swakubasisiwa.

²⁶ Vahangata ku Yohana, vaku ku yene: Mudondrisi, a mhunu lweyi afaka uli na yene halahaya ka nambu wa Yordana, ni lweyi ungamuhambela vumboni, akari ababatisaka na yene, kutani hinkwavu vaya ku yene.

²⁷ Yohana ayangula, aku: A mhunu angaka angavina ntxhumu, loko angawunyikiwanga wupfa Tilweni.

²⁸ N'wine ha vuswenu n'witimboni ta leswaku niti: Ahi mine Kriste. Ntsena nirumiwile amahlweni kwake.

²⁹ A n'winyi wa mutekiwa hi muteki. Kambe a n'winyi wa ndlela ayingiseta muteki, atrhava swinene hi kumuyingela. Kolahu-ke a kutrhava kwanga loku, swoswi kuhetisekile.

³⁰ Yene swifaneli akula, mine niya nitrongahateka.

³¹ Lweyi apfaka henhla, ale henhla ka hinkwavu; lweyi ahumaka misaveni, i wa misava, kutani akhanela hi swa misava. Lweyi apfaka Tilweni, ale henhla ka hinkwavu.

³² Ahlaya vumboni bya leswi aswivoniki ni kuswiyingela; kambe akuna lweyi ayamukelaka vumboni byake.

³³ A mhunu lweyi ayamukelaka vumboni byake, atiyisa leswaku Xikwembu Nkulukumba awadumbeka.

³⁴ Lweyi arumiwiki hi Xikwembu Nkulukumba, ahlaya maritu ya Xikwembu Nkulukumba, hikusa Xikwembu Nkulukumba amunyiki Moya kunge ha mpimu.

³⁵ Tatana arandra N'wana, kutani abeki hinkwaswu a mavokweni yake.

³⁶ Lweyi apfumelaka ku N'wana, anani vutomi lebyi byingahelikiki; lweyi ayalaka kupfumela ku N'wana, angakumi vutomi, kambe a mahlundru ya Xikwembu Nkulukumba matrhami ahenhla kwake.