Yohana 2 - Testamente Ledrimpswha ni Mapsalma

Nkhuvu wa vukati le Kana

¹ Hi siku dra vuraru, kuva ni nkhuvu wa vukati amutini wa Kana le Galileya. Na yene mamana wa Yesu afa ali kone.

² Yesu ni vadondrisiwa vakwe afa varambiwi nkhubyini na vone.

³ Kuti loko vhinyo drihelile, a mamana wa Yesu aku ku yene: Avehena vhinyo.

⁴ Yesu aku ku yene: Wansati, kuna yini amakari kwanga na wene? A nkama wanga awusanganatlhasa.

⁵ A mamana wakwe aku ku malandra: Yentxani hinkwaswu leswi atakan'wibyela swone.

⁶ Afa kuni tihotro ta ribye ta ntlhanu ni yin'we leti va-Yuda afaka vatitirisela kuhlamba mandla hi xitoloveto xa vukhongoti byavu. Yin'wana ni yin'wana afa yiteka dzana dra mimpimu ya mati.

⁷ Yesu aku ku malandra: Tatani tihotro leti hi mati. Vatitata tiku khapa hi mati.

⁸ Kutani aku ku vone: Kanani swoswi n'wimayisa ku mufambisi wa nkhuvu. Kutani vamayisa.

⁹ A mufambisi wa nkhuvu adringa mati lawa mandrulukiki vhinyo; kambe afa angativi laha drihumaka kone, afa switibyiwa ntsena hi malandra lawa afaka makeleli mati. Kutani avitana muteki, aku ku yene:

¹⁰ A vhanu hinkwavu vatoloveli kuhumexa vhinyo ledri drinene kusunguleni, kutani loko kunwiwile ngopfu, kuli kone vahumexaka ledri dringanandrikiki ngopfu; kambe wene ubekisi vhinyo ledri drinene kutlhasa swoswi

¹¹ A mahlolana lawa, hi wolawa Yesu angasungula ha wone, amutini wa Kana a Galileya, akombisa kuphatima kwake; kutani a vadondrisiwa vakwe vahangapfumela ku yene

¹² A ntrhaku ka swone afulamela aya Kapernawume, na ali ni mamana wakwe ni vamakwavu ni vadondrisiwa vakwe; kutani vayatrhama kone masiku mangemangani.

Yesu a Tempeleni

¹³ A nkhuvu wa Paska dra va-Yuda afa wu kusuhi, kutani Yesu antlhantukela Yerusalema.

¹⁴ Andlwini ya Hosi akuma vhanu lava vaxavisaka tihomu, ni tihamba, ni matuva, ni lava vabindrulisaka timali, na vatrhami kone.

¹⁵ Kuti loko Yesu aluki xisephu hi tingoti, avahlongola vahuma hinkwavu aNdlwini ya Hosi, ni tihamba, ni tihomu; ahangalasa ni mali yalava vabindrulisaka, awisetela ni matafula yavu.

¹⁶ Kutani abyela lava vaxavisaka matuva aku: Susani leswi hinkwaswu la; n'wingandruluti yindlu ya Tatana wanga, yiva yindlu ya minxavu.

¹⁷ A vadondrisiwa vakwe vahangadrimuka leswaku kutraliwi: A nkhinkhi hinkonta ya yindlu yaku yita ni da.

¹⁸ Kolahu a varangeli va va-Yuda vamuvutisa vaku: Ungayentxa xikombiso xini lexi xingakombisaka leswaku u nyikiwi ntamu wakuyentxa leswi xana?

¹⁹ Yesu avayangula, aku: Hahlulani a Tempele ledri, kutani mine nitadripfuxa ha masiku mararu.

²⁰ A va-Yuda vamubyela kolahu vaku: A Tempele ledri, drayakiwi ha mune wa makume na ntlhanu na drin'we (46) wa malembe, kutani wene, uli utadripfuxa ha masiku mararu xana?

²¹ Kambe Yesu afa ahlaya Tempele dra miri yake.

²² Hikolahu kungaku loko apfuki akufeni, a vadondrisiwa vakwe vadrimukiki leswaku amhaka leyi asama ayihlaya; kutani vapfumela Matralwa ni ritu ledri Yesu angavabyela drone.

²³ Loko ali Yerusalema, ankhubyini wa Paska, a vhanu lava vanyingi vapfumela ku yene, hi kuvona mahlolana lawa amayentxaka.

²⁴ Kambe Yesu afa angavadumbi, leswi avativiki hinkwavu.

²⁵ Na swone afa swingafanekeli leswaku mhunu mun'wana amubyela ta mun'wana, hikusa afa ativa leswi swinga mbilwini ya mhunu.