Yohana 19 - Testamente Ledrimpswha ni Mapsalma

¹ Kutani Pilato ateka Yesu amubisa hi swisepu.

² Kutani a masotxha maluka hari ya mitwa, mayibehela anhlokweni yake, mamuyambexa ni xiyambalu xa libungu.

³ Matrhindrekela ku yene maku: Xawani, Hosi ya va-Yuda! Afa mamuba tinhama hi timpama.

⁴ Pilato atlhela ahuma, aku ku va-Yuda: Vonani, nimuhumexa handle mahlweni kwenu, n'witativa leswaku anikumi nandru ku yene.

⁵ Yesu ahuma na ayambali hari ya mitwa anhlokweni, ni xiyambalu xa libungu. Kutani Pilato aku ku vone: Hi lweyi, mhunu!

⁶ Loko vaprista lava vakulu ni malandra vamuvona, vabandlukana, vaku: Muvambe! Muvambe! Pilato aku ku vone: Mutekani n'wine ha vuswenu, n'wiya muvamba; hikusa mine anikumi nandru ku yene.

⁷ A va-Yuda vamuyangula, vaku: Hine hini nawu, kutani hi nawu lowo afanela kufa, hikusa atiyentxi N'wana wa Xikwembu Nkulukumba.

⁸ Loko Pilato ayingeli leswo, atxhava ngopfu.

⁹ Atlhela anhingena ndlwini ya vufumi, aku ku Yesu: Upfa kwini? Kambe Yesu angamuyangulanga ntxhumu.

¹⁰ Pilato aku ku yene: Xana awunibyeli ntxhumu? Xana awuswitivi leswaku nini ntamu wa kukuntrhunxa, ni ntamu wa kukuvamba xana?

¹¹ Yesu ayangula, aku: Afa ungativana ntamu ahenhla kwanga, loko afa unganyikiwanga wupfa Tilweni. Hikolahu, lweyi anganinyiketa ku wene, ani nandru lowu wuhundrisaka.

¹² Hikola ka swone, Pilato afa adjula ndlela ya kumuntrhunxa ha yone. Kambe a va-Yuda vabandlukana, vaku: Loko untrhunxa mhunu lweyi, awu nakulobye wa Khezari. Mun'wana-ni-mun'wana lweyi atiyentxaka mufumi, alwa na Khezari.

¹³ Loko Pilato ayingela maritu lawa, ahumexa Yesu a handle, ayatrhama xitrhan'wini xa kuyavanyisa, ambangwini lowu valiki i ribye, hi Xiheberu i Gabata

¹⁴ Afa dri siku dra kutibekisela Paska, a nkama afa wudjula kuva wa ntlhanu na mun'we Pilato ahangaku ku va-Yuda: Vonani, a Hosi yenu hi leyi!

¹⁵ Vone kambe vabandlukana, vaku: Mususe! Mususe! Muvambe! Pilato aku ku vone: Xana nita vamba Hosi yenu? A vaprista lava vakulu vayangula, vaku: Ahina Hosi loko ange Khezari ntsena.

¹⁶ Kutani Pilato avanyiketa Yesu, akuva avambiwa. Kutani vone vateka Yesu

Kuvambiwa ka Yesu

¹⁷ Kutani Yesu ahuma na abyatrhi xihambanu xakwe, aya mbangwini lowu afaka vaku i Pala hi Xiheberu Golgota.

¹⁸ Vamuvamba kolahu, na ali ni van'wana vabiri, a mun'we hi tlhelo drin'we, a mun'wana hi tlhelo drin'wana, kutani Yesu ava makari.

¹⁹ Pilato afa atrali ni papela, adrinameka henhla ka xihambanu. Leswi afaka switraliwile hi leswi: YESU WA NAZARETE HOSI YA VA-YUDA.

²⁰ A va-Yuda lava vakutala vahlaya papela ledro, hikusa a mbangu lowu Yesu angavambiwa ku wone, afa wu kusuhi ni muti; na swone, apapela afa dritraliwi hi Xiheberu, ni Xi-Roma ni Xigirika.

²¹ Hileswo-ke a vaprista lava vakulu vaku ku Pilato: Ungatrali leswaku: Hosi ya va-Yuda, kambe trala uku: Hi yene lweyi atiki: Ni Hosi ya va-Yuda.

²² Pilato ayangula, aku: Leswi niswitraliki, niswitralile!

²³ Loko masotxha mavambi Yesu, mateka swiyambalo swake maswiyentxa mune wa swiyenge, mayavelana ha swone; mateka ni nkhantxu lowu afaka wungena ntrhungu, afa wulukiwi kusukela ahenhla kuya tlhasa ahansi.

²⁴ Kutani vabyelana, vaku: Hingawuhandruleni, kambe ahiwuyentxeleni mpswhampswha, hitativa leswaku wutava wa mani. Hileswaku Tralwa drihetiseka, ledri dringaku: Vayavelani swiyambalo swanga vayentxi mpswhampswha hi nkhantxu wanga. Hi swoleswi a masotxha mangayentxa swone.

²⁵ Kambe, kusuhi ni xihambanu xa Yesu afa kuyimi mamana wakwe ni makwavu wa mamana wakwe, anga Maria nkata Klopasi, na Maria wa Magadala.

²⁶ Yesu-ke loko avona mamana wakwe ni mudondrisiwa lweyi amurandraka ayimi kusuhi na yene, aku ku mamana wakwe: Wansati, vona a n'wanaku hi lweyi!

²⁷ Kutani aku ku mudondrisiwa: Vona, a mamana waku hi lweyi! Kusukela nkama wolowo, a mudondrisiwa lweyo amuyamukela, amururela kaya kwake.

Kufa ka Yesu

²⁸ Yesu, hi kutiva leswaku hinkwaswu swihetisekile, ahlaya, akuva tralwa drihetiseka, aku: Nini tora.

²⁹ Afa kuni xibya xa kutala hi nhlowa. Vone vapeta xiponji xitala hi nhlowa, vaxitlhoma lihlangeni, vaxiyisa anon'wini wakwe.

³⁰ Loko Yesu anwi nhlowa lowo, aku: Swihetisekile. Kutani adjovota nhloko, anyiketa moya.

³¹ A va-Yuda hi kutxhava leswaku a miri mingahlwela xihambanwini hi siku dra Savata (kasi a siku ledro afa dri siku dra kutibekisa, hikusa a siku dra Savata afa dri siku ledri drikulu) vakombela ku Pilato akuva a minenge yavu mitrhoviwa, vatasusiwa.

³² Hi loko-ke a masotxha mata, matrhova minenge ya lweyi wa kusungula wa lava afaka va vambiwi na Yesu, ni ya lweyi mun'wana.

³³ Kutani loko mata ku Yesu, mavona leswaku afi khale, n'wingatrhovi minenge yake.

³⁴ Nambi swilitanu, mun'wana wa musotxha amutlhava reve hi tlhari, kolahu kuhuma ngati ni mati.

³⁵ Lebyi i vumboni bya lweyi aswivoniki; byibekeliwaka leswaku na n'wine n'witakupfumela. A vumboni byake byitiyile, na yene awaswitiva leswaku ahlayelamfuri.

³⁶ Hikusa swihumeleli akuva Tralwa drihetiseka, ledri dringaku: A rambu drakwe ni drin'we dringatrhoviwi.

³⁷ Nangweso adrin'wana Tralwa drili: Vatahlalela lweyi vamutlhaviki.

Kulahliwa ka Yesu

³⁸ Antrhaku ka leswo, Yosefa wa Arimateya, anga mudondrisiwa wa Yesu, kambe afaka atifihla hi kutxhava va-Yuda, aya kombela ku Pilato leswaku angasusa a ntrumbu wa Yesu. Pilato amupfumelela. Ahangafamba aya susa ntrumbu wa Yesu.

³⁹ Kambe na yene Nikodema (lweyi afaka ayi ku Yesu ni vusiku), ata na arwali miri ya mira ni mhangana leyi mipatranyetiwiki, leyi midjulaka kutlhasa ku dzana dra mimpimu.

⁴⁰ Kutani vateka ntrumbu wa Yesu, vawutrondriyela hi makapulana kun'we ni miri leya kunun'hwela, hi xihena lexi va-Yuda valahlaka vafi ha xone.

⁴¹ Afa kuni nsimu ku mbangu lowo angavambiwa ku wone, kolahu nsin'wini afa kuni xira ledri drimpswha, (a xira ledri afaka yili mhakwa), afaka kungasilahliwa mhunu ku drone.

⁴² Hi laha vangabeka Yesu, hikusa afa dri siku dra kutibekisela Savata, na kone a xira afa dri kusuhi.