Yohana 18 - Testamente Ledrimpswha ni Mapsalma

Kukhomiwa ka Yesu

¹ Ntrhaku ka xikhongoto lexo, Yesu ahumi ni vadondrisiwa vakwe, awela a mfulanyana wa Kedroni laha afaka kuni xiramba, kutani ayanhingena ku xone yene ni vadondrisiwa vakwe.

² Yudasi muwongi na yene afa ativa mbangu lowo, hikusa Yesu afa atolovela kuhlengeletana kone ni vadondrisiwa vakwe.

³ Yudasi atekiki ntlawa wa masotxha ni malandra man'wana ya vaprista lava vakulu ni ya vafarisi, vaya kone na vatameli mimotre, ni swisa, ni matlhari.

⁴ Yesu, hi kutiva hinkwaswu leswi switakamuhumelela, ahuma aya ku vone, aku: N'widjula mani xana?

⁵ Vamuyangula, vaku: Yesu wa Nazarete. Yesu aku ku vone: Hi mine lweyi! Yudasi muwongi na yene afa ayimi navu kolahu.

⁶ Loko Yesu ati: Hi mine lweyi, vantlhentlha, vawa hi swikosi.

⁷ Yesu atlhela avavutisa, aku: N'widjula mani xana? Vaku: Yesu wa Nazarete.

⁸ Yesu ayangula, aku: Nin'wibyelile niku, hi mine lweyi. Loko-ke n'winidjula, trikani lava, vatifambela.

⁹ Hi leswaku a ritu drihetiseka, ledri afaka adrihlayile aku: Lava uninyikiki vone anilahlanga ni mun'we ku vone.

¹⁰ Simoni Petrosi lweyi afaka ali ni lipanga, adrihlomula, a ba nandra wa muprista lwenkulu, amutrema ndleve ya xinene. A vito dra nandra lweyo afa ali Malkusi.

¹¹ Yesu ahangaku ku Petrosi: Tlhoma lipanga ankotlotweni! Xana ningaka ninganwi a ntrheko lowu Tatana aninyikiki wone xana?

¹² A ntlawa lowo, ni tindruna, ni malandra ya va-Yuda, vakhoma Yesu, vamutrimba.

¹³ Kutani varanga hi kumuyisa ku Anasi, lweyi afaka ali mukon'wana wa Kayafasi, muprista lwenkulu wa lembe ledro.

¹⁴ Kayafasi hi yene lweyi angatlhavukanyisa va-Yuda aku: afa switayapswa loko mhunu mun'we afela vhanu hinkwavu.

Petrosi alandrula Yesu

¹⁵ Simoni Petrosi ni mudondrisiwa mun'wana afa valandrelela Yesu. A mudondrisiwa lweyo afa atibyiwa hi muprista lwenkulu, ahanganhingena hubyeni ya yindlu ya muprista lwenkulu na Yesu.

¹⁶ Kambe Petrosi afa ayimi handle anyangweni. Kolahu a mudondrisiwa lweyo ativiwaka hi muprista lwenkulu, ahuma, aya vulavula ni wansati lweyi afaka ali mulaviseli wa nyangwa, kutani anhingenisa Petrosi.

¹⁷ Kutani lweyi wa mulaviseli, wa wansati, aku ku Petrosi: Xana na wene awu mudondrisiwa wa mhunu lweyi xana? Petrosi aku: Ani yene.

¹⁸ A malandra ni tindruna afa vatrhiveli ndrilo vawora hikusa afa kuni xirami; Petrosi na yene afa ayimi navu, awora.

Anasi loko avutisa Yesu

¹⁹ A muprista lwenkulu avutisa Yesu hita vadondrisiwa vakwe ni hita kudondrisa kwake.

²⁰ Yesu amuyangula, aku: Nakhaneli alivaleni amahlweni ka vhanu hinkwavu. Nidondrisi minkama hinkwayu amasinagogeni ni le Tempeleni, lomu va-Yuda hinkwavu vahlengeletanaka kone. Anahlayanga ntxhumu axihundleni.

²¹ Xana univutisela yini? Vutisa lava vaniyingeliki leswi nivabyeliki swone. Vone vaswitiva leswi ningaswihlaya.

²² Loko Yesu ahlayi leswo, a mun'we wa malandra, lweyi afaka ayimi kolahu, a ba Yesu hi mpama, aku: Xana uyangulisa xiswoswo a muprista lwenkulu?

²³ Yesu amuyangula, aku: Loko nikhaneli swakubiha, komba kubiha ka swone. Kambe loko nikhaneli leswi swinene, unibela yini xana?

²⁴ Kutani Anasi amurumela ku Kayafasi muprista lwenkulu, na atrimbiwile.

Petrosi atlhela alandrula Yesu

²⁵ Simoni Petrosi afa ayimi kone awora ndrilo. Vahangaku ku yene: Xana na wene awu mun'we wa vadondrisiwa vakwe xana? Yene ayala, aku: Ani yene!

²⁶ A mun'wana wa malandra ya muprista lwenkulu, afaka ali xaka dra lweyi Petrosi angamutrema ndleve, aku: Xana andrakuvonanga axirambeni na u na yene xana?

²⁷ Petrosi atlhela ayala; hi nomu-lo a nkuku wudringa.

Yesu amahlweni ka Pilato

²⁸ Kutani vasuka na Yesu ku Kayafasi, vamuyisa ndlwini ya vufumi. Afa wehe mpundru swinene. Vone avanhingenanga ndlwini ya vufumi, akuva vangatitinyamisa, vatakota kuda Paska.

²⁹ Hikolahu Pilato ahuma, aya ku vone, aku: Xana mirambela mhunu lweyi ha yini?

³⁰ Vayangula, vaku ku yene: Loko afa mhunu lweyi angahonanga, ana hingamunyiketanga ku wene.

³¹ Pilato aku ku vone: Mutekani n'wine, n'wiya muyavanyisa hi nawu wenu. A va-Yuda vaku ku yene: A nawu awuhipfumeleli kudlaya mhunu.

³² Akuva ritu dra Yesu drihetiseka, ledri angahlaya drone loko ativisa a mafela lawa afa afanekela a kufa ha wone.

³³ Pilato atlhela anhingena ndlwini ya vufumi, avitana Yesu, aku ku yene: Xana u Hosi ya va-Yuda xana?

³⁴ Yesu amuyangula, aku: Xana leswo uswihlayaka swihuma ku wene, kumbe ubyeliwi hi van'wana xana?

³⁵ Pilato ayangula, aku: Xana nimu-Yuda mine? A tiko dra kwenu ni varangeli va vaprista hi vone vakunyiketiki ku mine. Xana uyentxi yini?

³⁶ Yesu ayangula, aku: A mfumu wanga ahi wa misava leyi. Loko afa a mfumu wanga wu wa misava leyi, a malandra yanga afa matalwa akuva ninganyiketiwi ku va-Yuda. Kambe, a mfumu wanga ahi wa lomu misaveni.

³⁷ Pilato aku ku yene: Xana u Hosi wene? Yesu ayangula, aku: Uhlaya swone, ni Hosi. Nipswaleliwi swone, niteli swone amisaveni leyi, akuva natatatiyisa xihlayelamfuri. Mun'wana-ni-mun'wana lweyi anga wa xihlayelamfuri, ayingiseta ritu dranga.

³⁸ Pilato aku ku yene: A xihlayelamfuri i ntxini? Loko ahlayi leswo, atlhela ahuma aya ku va-Yuda, ayaku ku vone: Mine anikumi nandru ku yene.

³⁹ Kambe n'witoloveli leswaku nin'wintrhunxela mhunu mun'we hi nkama wa Paska. Xana n'widjula leswaku nin'wintrhunxela Hosi ya va-Yuda xana?

⁴⁰ Vayangula hikubandlukana, vaku: Ungantrhunxe lweyo, ntrhunxa Barabasi! Kasi Barabasi afa ali nsulavoya.