Yohana 17 - Testamente Ledrimpswha ni Mapsalma

Yesu akhongotelela vadondrisiwa vakwe

¹ Loko Yesu ahlayi leswo, atlakuxa mahlu, alavisa Tilweni, aku: Tatana, a nkama wutlhasile! Twalisa N'wanaku, akuva na yene N'wana akutwalisa;

² swanga hi leswi umunyikiki ntamu henhla ka vhanu hinkwavu, akuva hinkwavu lava umunyikiki vone atavahanana vutomi lebyi byingahelikiki.

³ Kambe a vutomi lebyi byingahelikiki hi byolebyi: leswaku vakutiva, wene unga Xikwembu Nkulukumba wa xihlayelamfuri, na Yesu Kriste lweyi umurumiki.

⁴ Mine nikutwalisile la misaveni, nihetile a ntiro lowu uninyikiki wone akuva niwutira.

⁵ Swoswi, nitwalise, we Tatana, amahlweni kwaku hi kutwala loku afaka nili nakone ku wene, na misava mingasiva kone.

⁶ Nivonekisi vito draku amahlweni ka vhanu lava uninyikiki vone, uvahlawuliki misaveni; afa vali vaku; uninyiki vone, kutani vabekisi ritu draku.

⁷ Swoswi vaswitivile leswaku hinkwaswu leswi uninyikiki swone, swihuma ku wene.

⁸ Hikusa a maritu lawa uninyikiki nivanyiki wone; vamayamukelile, kutani vaswitivile leswaku kunene nihumi ku wene, vapfumelile leswaku nirumiwi hi wene.

⁹ Navakhongotela, anikhongoteli misava, kambe nikhongotela lava uninyikiki vone, hikusa i vaku.

¹⁰ Hinkwaswu leswi swinga swanga, i swaku; ni swaku, i swanga; kutani nitwalisiwi hikola ka swone.

¹¹ A nehe misaveni, kasi vone vahali lani misaveni; mine niya ku wene. Tatana wa kuxwenga vabekise avitweni draku lava unihananiki vone akuva vava mun'we swanga ha hine.

¹² Loko nahali na vone, afa nivabekisi avitweni draku; nibekisi lava uninyikiki vone, akulahlekanga mhunu ni mun'we ku vone loko ange n'wana wa kulahleka, akuva Matralwa mahetiseka.

¹³ Kambe swoswi nita ku wene, kutani nihlaya leswo na nahali misaveni, akuva vavani kutrhava kwanga loku kuhetisekiki andreni kwavu.

¹⁴ Nivanyiki ritu draku, kutani misava mivavengile, hikusa ahi va misava, swanga ha mine ningeke wa misava.

¹⁵ Anikombeli leswaku uvasusa misaveni, kambe leswaku uvaxirelela ku leswi swakubiha.

¹⁶ Ahi va misava, swanga ha mine ningeke wa misava.

¹⁷ Vaxwengisi axihlayelamfurini xaku; a ritu draku hi xo xihlayelamfuri.

¹⁸ Swanga heswi unirumiki misaveni, na mine nivarumi misaveni.

¹⁹ Kutani nitixwengisela vone, akuva na vone vava lava vaxwengisiwiki axihlayelamfurini.

²⁰ Anikhongoteli lava ntsena, kambe ni lava vatakapfumela ku mine hi ritu dravu,

²¹ akuva hinkwavu vava mun'we, swanga ha wene Tatana unga ku mine, na mine ninga ku wene, akuva na vone vava ku hine, kutani misava mitapfumela leswaku unirumile.

²² Nivanyiki kutwala loku uninyikiki kone, leswaku vava mun'we swanga ha hine hinga mun'we:

²³ Mine ku vone na Wene ku mine, akuva lava vahetisekiki, vava mun'we, kutani misava mitativa leswaku hi Wene unirumiki, ni leswaku uvarandrile swanga hi leswi unirandrisiki xiswone.

²⁴ Tatana! Nirandra leswaku hinkwavu lava uninyikiki vone, vava na mine laha ningakone: akuva vatahlalela kutwala kwanga loku uninyikiki kone, hikusa unirandrile na misava mingasitumbuluka.

²⁵ Tatana, wa kululama! A misava yone amikutivanga, kambe mine nikutivile, ni volavu vaswitivile leswaku hi Wene unirumiki.

²⁶ Nivativisi vito draku, nahatavativisa, akuva lirandru ledri unirandriki ha drone, driva ku vone, na mine niva ku vone.