Yohana 15 - Testamente Ledrimpswha ni Mapsalma

Kriste i nsinya lowu wunene wa vhinya.

¹ Hi mine nsinya lowu wunene wa vhinya; Tatana wanga i mudrimi.

² A likambu lin'wana ni lin'wana ledringa ku mine, ledringabekiki mihandru, awadritrhema; kambe drin'wana ni drin'wana ledri dribekaka mihandru awadrikhakhata, akuva dritahundrisa kubeka mihandru.

³ Niswoswi n'wine n'wibasile, hikola ka ritu ledri nin'wibyeliki drone.

⁴ Trhamani ku mine, na mine ku n'wine. Swanga hi leswi likambu dringakotikiki kubeka mihandru ha swadrone loko dringatrhami ansinyeni, na n'wine an'wina kuswikota kubeka mihandru, loko n'winga trhami ku mine.

⁵ Hi mine nsinya wa vhinya, n'wine n'wi tinkambu. Lweyi atrhamaka ku mine, swanga hi leswi na mine nitrhamaka ku yene, abeka mihandru yakutala; hikusa ahandle kwanga n'wingaka n'wingakoti kuyentxa ntxhumu.

⁶ Loko mhunu angatrhami ku mine, atatxukumetiwa swanga hi likambu; kutani drawoma vadrirola, vadritxukumeta ahandle, dripswha.

⁷ Loko n'witrhama ku mine, ni maritu yanga matrhama ku n'wine, kombelani hinkwaswu leswi n'wiswirandraka, n'witanyikiwa.

⁸ Tatana wanga atwalisiwa hi loko n'wibeka mihandru yakutala, akukombisa leswaku n'wi vadondrisiwa vanga.

⁹ Swanga hi leswi Tatana anirandriki, na mine nin'wirandrile; trhamani a lirandrwini dranga.

¹⁰ Loko n'wibekisa milawu yanga, n'witatrhama alirandrwini dranga, swanga hi leswi na mine nibekisiki milawu ya Tatana wanga, kutani nitrhami lirandrwini drakwe.

¹¹ Nin'wibyeli leswo akuva kutrhava kwanga kutrhama ku n'wine, ni leswaku a kutrhava kwenu kuhetiseka.

¹² A nawu wanga hi lowu: Hi leswaku n'wirandranana, swanga hi leswi na mine nin'wirandriki.

¹³ Akuna mhunu lweyi angani lirandru ledri dritlulaka ledri: dra loko mhunu anyikela vutomi byake hikola ka vanakulobye.

¹⁴ N'wi vanganu vanga loko n'wiyentxa leswi nin'wileletaka swone.

¹⁵ Anahan'wihlayi malandra, hikusa a nandra angativi leswi n'winyi wakwe aswiyentxaka. Kambe nin'wihlayi vanakulori, hikusa nin'witivisi hinkwaswu leswi niswiyingeliki ku Tatana wanga.

¹⁶ Ahi n'wine n'winihlawuliki; kambe hi mine nin'wihlawuliki, nin'wibekiki akuva n'wiya n'wibeka mihandru, ni mihandru yenu miva leyi mitrhamiki; akuva nambi n'wikombela yini na yini ku Tatana hi vito dranga, atan'winyika.

¹⁷ Leswi nin'wileletaka swone hileswaku n'wirandrana!

Akuvengiwa ka Yesu ni vadondrisiwa

¹⁸ Loko misava min'wivenga, tivani leswaku yone mirangi minivenga.

¹⁹ Loko afa n'wi va misava, ana misava mirandri swa yone; kambe leswi n'wingeke va misava, ni leswi nin'wihlawuliki makari ka yone; hikolahu a misava man'wivenga.

²⁰ Drimukani leswi nin'wibyeliki swone, loko niku: A nandra ahi nkulu ku n'winyi wakwe loko vanixanisile, na n'wine vatan'wixanisa; loko vabekisi ritu dranga, ni dro drenu vatadribekisa.

²¹ Kambe vatan'wiyentxa hinkwaswu leswo hinkonta ya vito dranga, hikusa avativi lweyi anirumiki.

²² Loko afa ningatanga nitatavulavula navu, ana vangena xihono; kambe swoswi avana leswi vangatilandrulaka ha swone hinkonta ya xihono xavu.

²³ Lweyi anivengaka, avenga ni Tatana wanga.

²⁴ Loko afa ningatiranga amahlweni kwavu, a mintiro leyi mun'wana mhunu angamitirikiki, afa vangativana xihono. Kambe vamivonile mintiro, vatlhela vavenga mine na Tatana.

²⁵ Kambe hileswaku a ritu dritahetiseka, ledri dritraliwiki a Nawini wavu driku: Vekunivenga handle ka mhaka.

²⁶ Kambe loko kutatlhasa Mutxhaveleli, lweyi nitakan'wirumela yene apfa ku Tatana, wunga Moya wa xihlayelamfuri, lowu wuhumaka ku Tatana, hi yene lweyi atakanihambela vumboni.

²⁷ Na n'wine n'witahamba vumboni hikusa n'witrhama na mine kusukela akusunguleni.