Yohana 12 - Testamente Ledrimpswha ni Mapsalma

Maria atota minenge ya Yesu hi mafura ya kun'hwela

¹ Loko kahasali masiku ya ntlhanu na drin'we na nkhuvu wa Paska wungasangana tlhasa, Yesu aya Betaniya, laha afaka kutrhama Lazaro lweyi Yesu angamupfuxa kufeni.

² Vamululamisela swakuda, kutani Marta afa avatirela. Lazaro afa ali mun'we wa lava vanga kudeni na Yesu.

³ Kutani Maria ateka mpimu wa kukari wa mafura ya kunun'hwela ya kudula ngopfu lawa mahambiwiki hi nardo ntsena, atota minenge ya Yesu, kutani amisula hi misisi yake. A yindlu hinkwayu yitala hi kunun'hwela ka mafura lawo.

⁴ Yudasi Iskariyota, mun'we wa vadondrisiwa va Yesu, lweyi afaka atamuwonga, swimu vilelisa aku:

⁵ Hikola kayini amafura lawa mangaxavisiwanga hi mali ya madzana mararu (300) ya madenari, yitanyikiwa swisiwana, xana?

⁶ Ahlayisa xileswo kunge hi leswi afaka ani mhaka ni swisiwana, kambe hi leswi afaka ali muyivi; kutani leswi afaka ali mutameli wa nkwama wa mali, afa ahamba ayiva leswi txheliwaka kone.

⁷ Yesu ahangaku: Mutriki ungamukarati; abekisi mafura lawa, amabekisela siku dra kulahliwa kwanga.

⁸ Hikusa a swisiwana, minaswu masiku hinkwawu; kambe mine n'wingavena mine masiku hinkwawu.

Makungu ya kudlaya Lazaro

⁹ A xitrhungu lexi xikulu xa va-Yuda xiyingela leswaku Yesu akone Betaniya. Kutani xita kunge hikola ka Yesu ntsena, kambe ni kutatavona Lazaro, lweyi Yesu angamupfuxa kufeni.

¹⁰ A varangeli va vaprista vatrimba makungu ya kudlaya naye Lazaro,

¹¹ hikusa, hikola kwake, va-Yuda lava vanyingi afa vapfumela ku Yesu, vafularela vaprista.

Kunhingena ka Yesu Yerusalema

¹² Hi siku ledri drintlhantamaka, a xitrhungu lexi xikulu xa vhanu lava afaka vati nkhubyini wa Paska, xiyingela leswaku Yesu afa ata Yerusalema,

¹³ a vhanu lavo hinkwavu vateka mahanga ya minkindru, vahuma vaya mutlhangaveta, nave kari vahuwelela, vaku: Hozana! Akukhensiwe lweyi ataka hi vito dra Hosi, Mufumi wa Israyele!

¹⁴ Yesu akumiki mbongolo, akhandriya ku yone, swanga hi leswi kutraliwiki leswaku:

¹⁵ Ungatxhave n'hwanyana wa Siyoni! Vona, A Hosi yaku hi leyi, yata; yikhandriyi ximbongolwana.

¹⁶ A vadondrisiwa vakwe avayingelisisanga mhaka leyi akusunguleni. Kambe loko Yesu atlakuxiwile, hi kone vangadrimuka leswaku a mhaka leyi afa yitraliwi ku Matralwa ya Kuhlawuleka hikola kwake, ni leswaku swiyentxekile ha kunene.

¹⁷ A xitrhungu lexi afaka xili na yene loko avitana Lazaro ahuma xireni xiyi drungula leswi swiyentxekiki.

¹⁸ Nakone a xitrhungu xiyile, xiya mutlhangaveta hikusa afa xiyingeli leswaku ayentxi mahlolana wolawu.

¹⁹ Kutani vafarisi vabyelana vaku: N'waswivona leswaku amahapfuni ntxhumu. Lavisani, a tiko hinkwadru drilandra yene.

Van'we va-Girika vadjula kuvona Yesu

²⁰ Amakari ka lava afaka vantlhantukeli Yerusalema kuya gandrela nkhubyini wa Paska, afa kuni va-Girika vange vangani.

²¹ Vatrhindrekela ku Filipi, wa Betsayida wa le Galileya, vamukombela vaku: Hosi, ahirandra kuvona Yesu.

²² Filipi ayabyela Andreyasi, kutani vone hi vubiri byavu vayabyela Yesu.

²³ Yesu avayangula, aku: Ankama wutlhasile lowu N'wana wa Mhunu ataka twalisiwa ha wone.

²⁴ Nihlayelamfuri nili ku n'wine: Loko nhleke ya vele leyi yiweliki misaveni yingafi, yitatrhama na yi vuswayone. Kambe loko yifa, yitapswala ngopfu.

²⁵ Lweyi arandraka vutomi byake, byita mulahlekela; kambe lweyi avengaka vutomi byake misaveni leyi, atabyibekisa hi la kungahelikiki.

²⁶ Loko mhunu adjula kunitirela, a anilandre, kutani laha ninga kone, na yene nandra wanga atava kone. Loko mhunu anitirela, Tatana atamukomba xitxhavu.

Yesu akhanela hi kufa kwake

²⁷ Swoswi a moya wanga wakarateka. Xana ningaku yini? Xana nitaku Tatana, nihuluxe ku nkama lowu! Kambe, niteli swone, kuvona nkama lowu.

²⁸ Tatana, twalisa a vito draku! Kutani kutwala ritu, ledri dripfaka Tilweni driku: Nidritwalisile, nitatlhela nidritwalisa.

²⁹ A xitrhungu lexi afaka xiyimile, xiswiyingela, kutani xiku: Dre druma! A va'wana vaku: A ntrumi yivulavuli na Yene.

³⁰ Yesu avayangula aku: A ritu ledri adritwalanga hikola kwanga, kambe dritwali hikola kwenu.

³¹ Swoswi a misava leyi mikari mayavanyisiwa, kutani mufumi wa misava leyi swoswi atahlongoliwa.

³² Kambe mine, loko nitava nitlakuxiwi nisuka misaveni, nitatikokela vhanu hinkwavu ku mine.

³³ Afa ahlaya timhaka leti na afanisa a mafela lawa atakafa ha wone.

³⁴ A xitrhungu ximuyangula, xiku: Hiyingeli Nawini leswaku Kriste atahanya hi la kungahelikiki. Wene-ke uhlaya ha yini uku: Swifanekeli N'wana wa Mhunu atlakuxiwa? A N'wana lweyi wa Mhunu hi mani?

³⁵ Yesu aku ku vone: A kuvaninga kahatava kone nkamanyana amakari kwenu. Fambani loko meheni kuvaninga, leswaku munyama wungatitxhuka wu n'wikuma; kasi lweyi afambaka munyameni angativi lomu ayaka kone.

³⁶ Loko meheni kuvaninga, pfumelani ku kuvaninga loko, akuva mindruluka vana kuvaninga. Loko Yesu ahlayi leswo asuka aya tumbela kule na vone.

Va-yuda avapfumeli ku Yesu

³⁷ Kambe nambi loko ayentxi mahlolana lawa manyingi ngopfu amahlweni kwavu, avapfumelanga ku yene,

³⁸ akuva kuhetiseka a ritu dra muprofeta Ezaya, ledri driliki: Hosi, xana hi mani lweyi apfumeliki kudondriseni kweru? Ni ntamu wa Hosi wupfuleteliweli mani xana?

³⁹ Hi leswo, vahluleki kupfumela, hikolahu Ezaya atlheli aku:

⁴⁰ Adlayi mahlu yavu, anonohisi timbilu tavu, leswaku vangatitxhuka vavona hi mahlu, vayingelisisa hi timbilu, vandruluka, mine nivadaha.

⁴¹ Ezaya ahlayi leswo, loko avoni kutwala ka Yesu, na kone, akhaneli ha yene.

⁴² Nambi swilitanu, vanyingi amakari ka tindruna, vapfumeli ku yene; kambe, afa vangaswihlayi livaleni, hikola ka vafarisi akuva vanga hlongoliwi sinagogeni.

⁴³ Hikusa varandri kutwalisiwa hi vhanu kutlula kutwalisiwa hi Xikwembu Nkulukumba.

Yesu akhanela hi vufumi bya Tatana

⁴⁴ Kutani Yesu atlakuxa ritu, aku: Lweyi apfumelaka ku mine, angapfumeli ku mine kambe apfumela ku lweyi anirumiki.

⁴⁵ Ni lweyi anivonaka, avona lweyi anirumiki.

⁴⁶ Mine ni kuvaninga, kutani nitile misaveni akuva mun'wana-ni-mun'wana lweyi apfumelaka ku mine, angatrhami munyameni.

⁴⁷ Ni loko mhunu ayingela maritu yanga, kutani angamabekisi, animuyavanyisi, hikusa anitelanga kuyavanyisa misava, kambe niteli kumihuluxa.

⁴⁸ Lweyi anifularelaka, ava angayamukeli maritu yanga, ani lweyi amuyavanyisaka; a maritu lawa nimahlayaka hi wone matakamuyavanyisa hi siku dra vugamu.

⁴⁹ Hikusa anivulavulanga ha vuswanga, kambe lweyi anirumiki, anga Tatana ha vuswake, anileleti leswi nifanelaka ku n'witivisa ni ku swihlaya.

⁵⁰ Kutani nitiva leswaku akuleleta kwake i vutomi lebyi byingahelikiki. Swoswi, leswi niswihlayaka, niswihlaya hi laha Tatana anibyeliki ha kone.