Yohana 11 - Testamente Ledrimpswha ni Mapsalma

Kupfuka ka Lazaro akufeni.

¹ Afa kuni mhunu lweyi afaka avabya, anga Lazaro wa Betaniya, amutini wa Maria na Marta vamakwavu

² Maria, hi lweyi angasama atota Hosi hi mafura lawa ya kunun'hwela, ava amusula minenge hi misisi yake.

³ A vamakwavu lavo va vavasati, varumela ritu ku Yesu, vaku ku yene: Hosi, lweyi umurandraka awavabya.

⁴ Loko Yesu ayingeli leswo, aku: A vuvabyi lebyi abyiyisi kufeni, kambe byihumeleli akukomba kutwala ka Xikwembu Nkulukumba, ni leswaku N'wana wa Xikwembu Nkulukumba atwalisiwa ha byone.

⁵ Yesu afa arandra Marta, ni makwavu Maria na Lazaro.

⁶ Loko ayingeli leswaku Lazaro awavabya, atrhama masiku mabiri kola afaka ali kone.

⁷ Kutani antrhaku ka swone aku ku vadondrisiwa wakwe: Ahiyeni a Yudeya.

⁸ A vadondrisiwa vaku ku yene: Mudondrisi, ahi khale, a va-Yuda vadjuliki kukukhandla hi maribye. Xana wahadjula kutlhela uya kone?

⁹ Yesu ayangula, aku: Xana a siku adrina minkama ya khume na mibiri xana? Loko mhunu afamba ni nhlikanhi, angakhunguvanyeki ha ntxhumu, hikusa avona kuvaninga.

¹⁰ Kambe, loko mhunu afamba ni vusiku, awakhunguvanyisiwa, hikusa akuvaninga akukone ku yene.

¹¹ Loko ahlayi swoleswo, ayengeta aku ku vone: Lazaro a murandriwa weru, eyetlela, kambe nitaya niyamupfuxa.

¹² A vadondrisiwa vaku ku yene: Hosi, loko ayetlelile, atahanya.

¹³ Yesu afa akhanela hi kufa ka Lazaro, kasi vone afa vayanakanya leswaku akhanela hi kuyetlela vurongo byinene.

¹⁴ Kutani Yesu avabyela livaleni, aku: Lazaro afile.

¹⁵ Kutani, nitrhavile hinkonta yenu, leswi afaka ningekone, leswaku n'witapfumela; kambe ahiyeni ku yene!

¹⁶ Tomasi lweyi ahlayiwaka Didimosi, aku kuvadondrisiwa kulobye: Ahi fambeni na hine, leswaku hiyafa ni Mudondrisi weru.

Yesu i kupfuka ni vutomi

¹⁷ Kuti loko Yesu atlhasa Betaniya, akuma leswaku Lazaro afa ena mune wa masiku na alahliwile.

¹⁸ A muti wa Betaniya afa wu kusuhi na Yerusalema; afa swidjula kudringana mimpfhuka ya makilometro mararu (3 Km).

¹⁹ A va-Yuda lavanyingi afa vati ku Marta na Maria akutata vatxhavelela hikola ka kufa ka makwavu.

²⁰ Loko Marta ayingela leswaku Yesu awata, ayi mutlhangaveta. Maria yene afa atrhami ndlwini.

²¹ Kutani Marta aku ku Yesu: Hosi, loko afa uvi kone, ana makweru angafanga.

²² Kambe naswitiva ni swoswi leswaku hinkwaswu leswi ungaswikombelaka ku Xikwembu Nkulukumba, Yene atakunyika.

²³ Yesu aku ku yene: A makwenu atatlhela apfuka.

²⁴ Marta aku ku yene: Naswitiva leswaku atapfuka hi siku dra vugamu, akupfukeni ka vafi.

²⁵ Yesu aku ku yene: Hi mine kupfuka kufeni ni vutomi. Lweyi apfumelaka ku mine, nambi angafa, atahanya.

²⁶ Kutani mun'wana-ni-mun'wana lweyi ahanyaka, ava apfumela ku mine, angaka angafi hi la kungahelikiki. Xana waswipfumela leswo xana?

²⁷ Aku ku yene: Im'na Hosi. Napfumela leswaku hi wene Mesiya, N'wana wa Xikwembu Nkulukumba, lweyi afaka afanela kuta amisaveni.

Yesu adrila hikola ka Lazaro

²⁸ Loko Marta ahlayi leswo, afamba aya vitana Maria makwavu, hi xihundla, aku: A Mudondrisi akola, awakuvitana.

²⁹ Loko Maria ayingeli leswo asekeleka, aya ku Yesu.

³⁰ Yesu afa angasangana nhingena mutini, kambe afa ahali kola Marta angamutlhangaveta kone.

³¹ A va-Yuda lava afaka vahali ndlwini na Maria vali kari vamutxhavelela, loko vamuvona asekeleka ahuma hi kuhangwesa, vamulandra hi kuyanakanya leswaku aya xireni akuya drila kone.

³² Loko Maria atlhasa laha Yesu afaka ali kone ni loko amuvona, akhinsama minengeni yake, aku ku yene: Hosi, loko afa uvi kone, ana makweru anga fanga.

³³ Loko Yesu amuvona na ali kari a ba nkosi adrila, ni loko avona va-Yuda lava vamuheketaka, na vone vaba nkosi vadrila, atlhaveka moyeni ni kutwa kuvaviseka kukulu.

³⁴ Kutani aku: N'wimulahli kwini xana? Vaku ku yene: Hosi, tana utatakuvona.

³⁵ Yesu adrila.

³⁶ Kutani ava-Yuda vaku: Lavisani leswi afaka amurandrisa xiswone!

³⁷ A van'wana ku vone van'unun'uta vaku: Yene lweyi angapfula mahlu ya lava va kufa mahlu, hayini angakotanga kuyentxa leswaku a mhunu lweyi angafi xana?

Yesu apfuxa Lazaro kufeni

³⁸ Yesu atlhela atlhaveka moyeni, atrhindrekela kusuhi ni xira. A xira afa yi mhakwa, kambe a mhakwa leyo afa yi pfaliwi hi ribye.

³⁹ Yesu aku: Susani ribye! Marta makwa mufi aku ku yene: Hosi, kutani awanun'hwa, hikusa ledri i siku dra vumune na afile.

⁴⁰ Yesu aku ku yene: Xana anikubyelanga leswaku loko upfumela, utavona kutwala ka Xikwembu Nkulukumba xana?

⁴¹ Kolahu vahanga susa ribye, kutani Yesu atlakuxa mahlu yake, aku: Tatana, nakukhensa, hikusa uniyingelile.

⁴² Mine niswitivile leswaku hinkwawu masiku waniyingela. Kambe nihlayi leswo hikola ka xitrhungu lexi xiyimiki kola, akuva xitapfumela leswaku hi wene unirumiki.

⁴³ Kuti loko ahlayi swoleswo, ahuwelela hi ritu ledri drikulu, aku: Lazaro, humela handle!

⁴⁴ Kutani a mufi ahuma, na atrondriyeliwi minenge ni mavoko hi makapulana, a vuso byake afa byifukumetiwi hi nturu. Yesu aku ku vone: Muntrhunxani akuva akota kufamba.

Makungu ya kudlaya Yesu

⁴⁵ Lava vanyingi amakari ka va-Yuda lava afaka vati ku Maria, loko vavona leswi Yesu aswiyentxiki, vapfumela ku yene.

⁴⁶ Kambe van'wana ku vone vaya ku vafarisi, vaya vabyela leswi Yesu aswiyentxiki.

⁴⁷ Kutani varangeli va vaprista ni vafarisi varamba huvu, vaku: Hitayentxa yini xana, leswi a mhunu lweyi atiraka mahlolana lawa ya kutala?

⁴⁸ Loko hi mutrikisa xiswoleswi, hinkwavu vatapfumela ku yene, kutani va-Roma vatatahohlota a mbangu lowu ni tiko dreru.

⁴⁹ A mun'wana wavu, Kayafasi, lweyi afaka ali muprista lwenkulu wa lembe ledro, aku ku vone: N'wine an'witivi ntxhumu.

⁵⁰ Xana an'wipimisi leswaku n'wingapfuneka loko mhunu mun'we afela tiko, kutlula loko a tiko hinkwadru drisuva xana?

⁵¹ Kambe Kayafasi angahlayanga leswo ha vuswake; kambe, hi leswi afaka ali muprista lwenkulu wa lembe droledro, eprofeta leswaku Yesu atafanela kufela tiko dra va-Yuda.

⁵² Na swone kunge kufela tiko ntsena, kambe ni kukota kuhlengeleta vana va Xikwembu Nkulukumba lava vahangalakiki, avayentxa van'we.

⁵³ Kutani kusukela siku ledro, va-Yuda vatrimbi makungu ya kudlaya Yesu.

⁵⁴ Hikolahu Yesu afa angahafamba-fambi livaleni makari ka va-Yuda. Kambe asuka kolahu, aya tikweni ledri dringa kusuhi ni mananga, amutini lowu valiki i Efrayimi, aya trhama kone kun'we ni vadondrisiwa vakwe.

⁵⁵ Afa nkhuvu wa Paska dra va-Yuda wu kusuhi; kutani lava vanyingi vapfa tikweni hinkwadru vantlhantukela Yerusalema vaya tibasisa na Paska dringasangana tlhasa.

⁵⁶ Afa vadjula Yesu, vavutisana na vali Ndlwini ya Hosi, vaku: Xana n'wiyanakanya yini? Angaka angati nkhubyini xana?

⁵⁷ Kambe a vaprista lava vakulu ni vafarisi afa valeleti leswaku, loko mhunu ativa laha Yesu angakone, a avativise, leswaku vatakota kumukhoma.