Yakobe 5 - Testamente Ledrimpswha ni Mapsalma

Xitiviso ku vafuyi

¹ Yingisetani n'wine swipfundri, drilani hi kubongosa, hinkonta ya tinxanisa leti taka henhla kwenu.

² A vupfundri byenu byi bolile, a swiyambalu swenu swidiwile hi tinsumba.

³ A gole drenu ni silivela swikurile, aku kura ka swone kutava vumboni ku n'wine, kuta da nyama yenu swanga hi ndrilo n'wihlengeleta vukosi amasikwini laya vugamu.

⁴ Lavisani a muholo wavatiri lava vatrhoveliki masin'wini yenu lowu nw'ingavakanganyisa hi kuvayivela; kutani a kubandlukana ka vatrhoveli kutlhasi tindleveni ta Xikwembu Nkulukumba wa ti yimpi.

⁵ N'wine n'wihanyi a vutomi bya kuxonga a misaveni; ni kutikholiseni, n'wixuri timbilu tenu hi siku drakudlawa;

⁶ n'wiyavanyisile, ni kudlaya lweyi wakululama, na angan'wiyaleli.

Xikhongoto ni xixixi

⁷ Ke, laviselani vamakweru, n'wirindrela kubuya ka Hosi. Lavisani, swanga hi mudrimi akotaka kulavisela, a mihandru leya lisima ya misava, kukondra kuta timpfula ta hlovo ni ta Malanga.

⁸ Laviselani na n'wine, nw'itiyisa timbilu tenu, hikusa a kubuya ka Hosi ku kusuhi.

⁹ N'winga n'unun'utelaneni van'we ku van'wana, vamakweru, akuva n'wingatiyavanyisiwa. Lavisani-ke, a muyavanyisi a le nyangweni.

¹⁰ Vamakweru, akuxanisekeni ni le kulaviseleni, vanani swanga vaprofeta lava vangakhanela hi vito dra Hosi.

¹¹ Hili, vakatekile lava vatiyiseliki. N'wine n'wiswiyingelile loko kukhaneliwa hi kulavisela ka Yob, na kone n'wiswivonile, a Hosi yi munyikile; hikusa a Hosi yitali hi timpswalu ni lirere.

¹² Kambe akutlula hinkwaswu vamakweru, n'wingafungeni ha ntxhumu, nambi dra kuva tilo, ni misava, nambi ntxhumu ni mun'we. Hlayani ntsena im'na loko ali im'na, ni im'hi loko ali im'hi, akuva n'winga weli hansi ka yavanyiso.

¹³ Akone mun'we ku n'wine axanisekaka? Aakhongote; akone mun'we ku n'wine anyoxiki? Aayimbelele tinsimu ta kutlangela.

¹⁴ Akone mun'we ku n'wine a vabyaka? Aativitanele vakulu va Kereke akuva vamu khongotela, na vamu tota mafura, hi vito dra Hosi.

¹⁵ Kutani axikhongoto xa kupfumela xita huluxa mbabyi, Hosi yita muwololoxa; nambi ayentxi xidoho, yita mudrivalela.

¹⁶ Ke, byelanani swidoho; n'wikhongotelana mun'wana ku mun'wana, akuva miholisiwa. A xikhongoto xa mululami xini ntamu swinene xatira.

¹⁷ Eliya ave mhunu lweyi afaka ali ni mahanyela ya kufana na hine, akhongotile hikutiyisisa leswaku yi nga ni hi mpfhuka wa malembe mararu ni ntlhanu wa tihweti na yin'we, ayinanga a mpfula amisaveni.

¹⁸ Ntrhaku, atlhela akhongota, kutani amatilo manisa mpfula, a misava mibeka mihandru ya yone.

¹⁹ Vamakweru, loko a mun'we ku n'wine ahambuka ndleleni ya xihlayelamfuri a mun'wana amutlhelisa,

²⁰ drimukani leswaku, lweyi a pfunaka mudohi akuhambukeni ka ndlela yake ya kubiha, amhuluxa vutomi ni kudrivaleliwa vunyingi bya swihono.