Yakobe 3 - Testamente Ledrimpswha ni Mapsalma

Kufuma lidrimi

¹ Vamakweru, avunyingi byenu n'wingave ndruluka vadondrisi, switivani leswaku hine lava hi dondrisaka hita kuma kuyavanyisiwa loku hundrisaka.

² Hikusa ha hoxa hi swihoxo swinyingi hinkweru. Loko nha mun'we angahoxi hi maritu, i mhunu wa kuhetiseka, lweyi a kotaka kufuma miri yake hinkwayu.

³ Lavisani, hi nhingenisa matomu milon'wini ya mahanxi akuva ma hi yingiseta; hiva hi ndruluta miri ya wone hinkwayu!

⁴ Lavisani ku tingalawa, nambi tilitikulu swakunhati, nambi leswi tisusumetiwaka hi mimoya leya ntamu, tindrulutiwa hi xihindrulo lexitrongonyana lomu a muhindruli arandraka kone.

⁵ Hi swoswo ni lidrimi, dringa xironyana ku xiyenge xa miri, kambe dratitwalisa ku mintxhumu mikulu. Lavisani andrilo lowu wutrongonyana wuhisa mutrhu lowukulu swakunhati!

⁶ Hikusa a lidrimi na drone i ndrilo; i tiko dravusomboloki. Hikuva i xiyenge xa miri yeru, drihonisa amiri yeru hinkwayu, driva dritrhivela a ndlela hinkwayu ya kuhanya kweru, na kone, drone dritrhiveliwa hi ndrilo wa gehena.

⁷ Hidro lixaka draswihari swanhova ni tinyanyana, nita leswi swaku kokakoka, nita swihari swalwandle, swafuyiwa, na kone swifuyiwa hi lixaka dra vhanu; ha kunene;

⁸ Kambe a lidrimi akuna mhunu lweyi a kotaka kudrinabyalisa; i xibiho lexi xingeke na kuhluliwa; dritali hi vuhlungu lebyi dlayaka.

⁹ Ha drone hi twalisa Xikwembu Nkulukumba Tatana weru; ha drone mfuri hi ruka vhanu, lava yentxiwiki hi xifaniso xa Xikwembu Nkulukumba.

¹⁰ A non'wini mun'we kuhuma kudrunisa ni kurukana. A swifaneli vamakweru, leswaku swiva tanu!

¹¹ Xana nhlovo yinga humexa ha mbangu mun'we a mati lawa ya vunandri ni lawa ya kubava xana?

¹² Vamakweru, xana ankuwa wungaswikota kupswala Minhlwari xana, kumbe nsinya wa nvhinya wungapswala makuwa xana? Swingekoteki ni kutrongo, a nhlovo ya mati lawa ya munyu mayentxa mati ya vunandri.

A vutlhari bya xihlayelamfuri

¹³ A kone makari kwenu anganivutlhari ni vutivi xana? Aakombise hi kunabyala ni hivutlhari a mintiro yake, ni hi mahanyela lawa manene.

¹⁴ Kambe loko timbilu tenu titali hi vukwele kumbe matrhoho, n'wingatikulisi n'wihembela xihlayelamfuri.

¹⁵ Lebyo ahi byone vutlhari lebyi pfaka hi le henhla; kambe i bya misava, ahibya Moya, i bya Sathana.

¹⁶ Lomu kunga ni vukwele ni kutengisana, hi lomu kunga ni mubangu ni tinxaka hinkwatu leta vubihi.

¹⁷ Kambe a vutlhari lebyi pfaka hi le henhla i kusungula ka hinkwaswu, kubasa; byirulile, ni kunabyala, ni kuyingelana, byitali hi lirere, mintiro ya hombe; abyi yentxi xihlawu-hlawu xa vhanu, abyi na kutiyentxisa.

¹⁸ Lavisani, a mihandru ya kululama mipfa hi kurula, ku lava vayentxaka kurula.