Yakobe 1 - Testamente Ledrimpswha ni Mapsalma

Ku losa

¹ Yakobe, nandra wa Xikwembu Nkulukumba ni wa Hosi Yesu Kriste, ni losa a tinxaka leti ta khume na tibiri tihangalakiki misaveni.

Kupfumela ni vutlhari

² Vamakweru, n'wifanela kuva ni kunyoxa, loko n'wihundra ku mindringo ya kuhambana.

³ Tivani leswaku akudringiwa kupfumeleni kwenu kuvanga mhandru ya kutiyisela.

⁴ Kambe akutiyisela akuve ni ntiro wa kuhetiseka, akuva n'wiva lava valulamiki hikuhetiseka na n'wingapfumali ntxhumu.

⁵ Kambe loko wa kukari angenavutlhari bya kudringana a akombele ku Xikwembu Nkulukumba lweyi hananaka hinkwavu mahala na angasoli, kutani atan'winyika.

⁶ Kambe kombela, hi kupfumela, na ungaganaganeki; hikusa lweyi aganaganekaka afana ni vimbi dra lwandle ledri dribiwaka hi mheho driya hala-ni-hala.

⁷ A mhunu yelweyo angayanakanyi leswaku ataswikota kukuma xa ntxhumu Hosini,

⁸ hikusa i mhunu wa timbilu tibiri, lweyo angatiyangakiki atindleleni takwe hinkwatu.

Swisiwana ni vafuyi

⁹ Makweru lweyi anganixiyimu xa kutrongahateka afanela kutrhava akutlakuxiweni kwake.

¹⁰ Kutani lweyi wa xipfundri afanela kutrhava loko atrongahatiwa, hikuva ata hundra swanga hi xiluva xa byanyi.

¹¹ Loko adambu drihuma, kuta mumu, wu womisa byanyi, kutani a swiluva swa byone swibuna ni kuxonga kamavonekela ya swone ka nyamalala; hiswoswo ni lweyi wa vupfundri, atabuna mabindrwini yake.

Kuwomelela ku mindringo

¹² Anindjombo lweyi atiyiselaka mindringweni, hikuva loko akumiwa na atiyiselili andringweni atayamukela a ngiyana ya vutomi lebyi byingahelikiki, lebyi Xikwembu Nkulukumba adridumbisiki lava vamurandraka.

¹³ Kambe loko wakukari adringiwa angahlayi leswaku: nidringiwa hi Xikwembu Nkulukumba. Hikusa Xikwembu Nkulukumba angadringiwi hileswi swakubiha, na kone Yene mfuri angadringi mhunu.

¹⁴ Kambe lweyo ni lweyo adringiwa hikunavela kwake ntsena, hikukokiwa ni kuwongiwa awela ntlhan'wini.

¹⁵ Kutani akunavela ka kubiha kukumi khuri kupswala xidoho ni xidoho, xiku xa hetisiwa xipswala kufa.

¹⁶ N'wingakanganyisekeni, vamakweru lava randrekaka:

¹⁷ Akuhanana hinkwaku loko ka hombe ni nyiko hinkwayu leyi ya kuhetiseka, swipfa henhla-henhla, swipfa ku Tatana, nhlovo ya livaningo hinkwadru. Ku yene akuna kundruluka nambi ntrhuti ni wun'we wa kundruluka.

¹⁸ Hikuva hikurandra kwake, Yene ahibeleki hi ritu dra xihlayelamfuri, akuva hi va swirangana swa swivumbiwa swake.

Maritu ni mintiro

¹⁹ Switivani vamakweru lava randriwaka! Mhunu mun'wana-ni-mun'wana afanela kukahluli kuyingela minkama hinkwayu; kambe ahlwela kuvulavula, ahlwela kuhlundruka.

²⁰ Hikusa akuhlundruka ka mhunu akuyentxi kululama ka Xikwembu Nkulukumba.

²¹ Ke, bekani hi tlhelo xambya hinkwayu ni mona lowu wuhundrisaka kutani n'wiyamukela hi kutitrongohata a Ritu ledri dribyaliwiki ku n'wine, ledri dringa ni ntamu akuva drihuluxa vutomi.

²² Vanani vayentxi va Ritu, n'wivi vayingeli ntsena, n'witikanganyisa ha swenu.

²³ Hikuva loko mun'we ali muyingeli wa ritu na ange muhlayi, afananisiwa ni mhunu lweyi tilavisaka a xivoni-vonini a liso drakwe ntumbuluko;

²⁴ avona liso drakwe, kambe loko asuka ahatla adrivala leswaku i wa matrhamela ya kuyini.

²⁵ Kambe lweyi ayingisetaka swinene Nawu lowu wa kululama, a nawu wa vuntrhunxeki, atiyisela ku wone, na ange muyingiseti wa kudrivala, kambe na ali muyentxi wa ntiro ni muyentxi wa ritu, lweyo atava ni ndjombo ku hinkwaswu leswi a swiyentxaka.

²⁶ Loko apimisa leswaku i mhunu wa vukhongoti ngopfu, kambe loko angafumi lidrimi drakwe, akanganyisa mbilu yake, avukhongoti byake i bya mahala.

²⁷ A vukhongoti bya xihlayelamfuri ni lebya kubasa, amahlweni ka Xikwembu Nkulukumba, Tatana weru, hi lebyi: kuvonelela swirombe ni mafelwa kunonon'hweliweni kwavu, ava lweyi waku kala kutinyamisa hi swa misava.