Va-le-Filipiya 4 - Testamente Ledrimpswha ni Mapsalma

Swileleto

¹ Hiswoswo, vamakweru varandriwa vanga, lava varandrekaka ngopfu, n'wine lava n'winga kunyoxa kwanga ni ngiyana yanga, tiyiselani xiswoswo a Hosini varandriwa.

² Nitratriya Evodiya na Sintike akuva vava ni kuyanakanya kun'we a Hosini.

³ Nikombela na wene, mutirikulori lweyi wa xihlayelamfuri, leswaku upfuna a vavasati lavo, vatiriki kun'we na mine na Klimente, ku Ivangeli, kun'we ni van'wana vapfuneti, lava a mavito yavu ma traliwiki abukwini dra vutomi.

⁴ Miva ni kutrhava hi minkama hinkwayu a Hosini. Ni tlhela ni hlaya ni ku: Trhavani!

⁵ Akunabyala kwenu akutibyiwe hi vhanu hinkwavu; a Hosi yi kusuhi.

⁶ N'winga hlatiyeleni ntxhumu, kambe atimhakeni hinkwato akukombela kwenu aku tibyiwe hi Xikwembu Nkulukumba, hi kukhongota ni kukombela ni kutlangela.

⁷ A kurula ka Xikwembu Nkulukumba, loku kutlulaka kuyingelisisa hinkwaku, kuta bekisa a timbilu tenu ni miyanakanyu yenu ku Kriste Yesu.

⁸ Avugan'wini, vamakweru, hinkwaswu leswi swinga xihlayelamfuri, hinkwaswu leswi swinkhensekaka, hinkwaswu leswi swilulamiki, hinkwaswu leswi swibasiki, hinkwaswu leswi swirandrekaka, hinkwaswu leswi swinga ni vito ledrinene, loko kuli ni leswi swinga ni vunene, ni loko kuli ni kukhenseka swiyanakanyani.

⁹ Leswi na swone n'widondriki, ni kuyamukela, ni kuswiyingela, ni kuswivona ku mine, swiyentxani; Xikwembu Nkulukumba wa kurula atava na n'wine.

Mintlangelo ya Pawulosi ku va-le-Filipiya

¹⁰ Lavisa, ni trhavile ngopfu Hosini, hi leswi n'wikumiki ntamu wakutlhela n'winiyanakanya; na kone afa n'wiswiyanakanyi khale, kambe afa n'wipfumala nkama.

¹¹ Anihlayi leswo hi kuvilela xa ntxhumu, hikusa nidondri a kutinyoxisa hi leswi ninga naswu.

¹² Nitiva kutitrongohata, naswitiva na kone kuva naswu hi ntalu; kuhinkwawu matrhamela ni kuhinkwayu mintxhumu, ni dondrisiwile, akuxura kumbe kuva ni ndlala, kumbe kutaleliwa nambi kupfumala.

¹³ Ningaswikota ku hinkwaswu ku lweyi anitiyisaka.

¹⁴ Nambi swili tanu, n'wiyentxi swone loko n'witlhangani na mine a hlomulweni wanga.

¹⁵ Nakone mfuri n'waswitiva n'wine, va-Filipi, leswaku akusunguleni ka Ivangeli, loko ni suki Makedoniya, akuvanga ni kereke ni drin'we ledri dringatlhangana na mine amhakeni ya kunyika ni le kuyamukeleni, loko kunge n'wine.

¹⁶ Hikusa, loko nili swihano, n'wini rumeli tinyiko ku ni pfuna ku leswi ni swipfumalaka.

¹⁷ A hileswaku ni djula swihanano, kambe ni navela leswaku miyengeseliwa a mhandru hinkonta yenu.

¹⁸ Mine ni yamukeliki swinyingi, ni naswu hi ntalu; swinitalelile, ntrhaku ka kuyamukelisiwa ha Epafrodito leswi ni rumeliwiki ha n'wine, swanga hi kunun'hwela loku ka kunandrika, ni mhamba leyi yamukeliwaka ni kutrhavisa Xikwembu Nkulukumba.

¹⁹ Xikwembu Nkulukumba wanga atan'witatisa n'wine akupfumaleni hi hinkwaku, hi vukulu, hikola ka Kriste Yesu.

²⁰ Kambe, nyikani lidrumu dra Xikwembu Nkulukumba ni Tatana weru, hi minkama ni minkama. Amen.

Madrungula ya vugamu

²¹ Drungulani tinsasi hinkwatu ku Kriste Yesu. A vamakweru lavanga na mine van'wi drungula.

²² Hinkwatu tinsasi, ngopfu ata yindlu ya Khezari.

²³ A timpswalu ta Hosi Yesu Kriste ative na n'wine hinkwenu.