Va-Heberu 9 - Testamente Ledrimpswha ni Mapsalma

Xipfumelelanu leximpswha hi ngati ya Kriste

¹ A xipfumelelanu lexi xa kusungula na xone afa xi ni swileleto swa mintiro ya vugandreli ni xiluvelo xa kuhlawuleka kola misaveni.

² Hikusa ntronga wa kuranga loko wu yimisiwile, ku wone afa kuni kandelar, ni byangama ni makati ya xikombiso; a mbangu lowu wuhlayiwaka wa kuxwenga.

³ Hi ntrhaku ka kapulana dra vubiri, afa kuni ntronga wa Hosi, mbangu lowu valiki wakuxwengisisa.

⁴ Lowu afaka wuli ni altari dra gole drakuhisela miri leya kunun'hwela ni areka dra xipfumelelanu, ledri afaka dri fukumetiwi hi gole hi matlhelo hinkwawu; ku drone afa kuni nhlambeto ya gole leyinga ni mana ni nhonga ya Aroni, leyi afaka yihlukile, ni maribye ya xipfumelelanu.

⁵ A henhla ka areka, afa kuni makerubime ya kuphatima, hi timpapa ta wone afa mafukumeta mbangu wa vudrivalelo bya swidoho. Kambe swoswi ahi nkama wa kukhanela ngopfu hi timhaka leto.

⁶ Swoleswo-ke, loko swibekisiwi xiswoswo, a vaprista afa vanhingena hinkwawu nkama antrongeni wa kuranga, na vatira mintiro ya kuhlawuleka.

⁷ Kambe antrongeni wa vubiri, afa kunhingena ntsena muprista lwenkulu ali swake, kan'we hi lembe, anganhingeni kone angana ngati ya swifuyo akuva anyikela, hinkonta yake ni ya swidoho swa tiko hiku kohleka.

⁸ A Moya wa Kuxwenga wu kombisa kolahu leswaku, a ndlela ya mbangu wa kuxwenga afa yinga si pfuliwa loko ntronga wa kusungula wuyimisiwile.

⁹ Xinga xifaniso ku nkama wa swoswi, lowu ha wone kaha humexiwaka timhamba ni switlhavelo, swihlulekaka kubasisa swinene lipfalu dra lweyi agandrelaka,

¹⁰ leswi kun'we ni swakuda, ni swakunwa, ni mahlambela ya tinxaka-xaka, minga ntsena milawu ya vumhunu leyi mibekiwiki kutlhasa a nkama switaka ndrulutiwa hinkwaswu.

¹¹ Kambe loko Kriste ahumelelile, a muprista lwenkulu wa mintxhumu leminene miyentxiwiki, amahlweni ka ntronga lowukulu wakuhetiseka, lowu wungayakiwangakiki ha mavoko, hileswaku, lowu wungaliki wa ntumbuluku lowu.

¹² Kunge ha ngati ya swiphongo ni marole, kambe kuvi hi ngati yake, anhingenile kan'we a mbangwini lowu wa kuxwenga, ahikumeliki kutiruliwa loku kungahelikiki.

¹³ Hikusa loko a ngati ya tinkunzi, ni ya swiphongo, ni nora wa homu lowu vaxuvaka ha wone lava vanga ni xambya, leswaku vabasisiwa hi tlhelo dra kubasisiwa ka nyama,

¹⁴ ngopfu-ngopfu a ngati ya Kriste, leyi Yene atinyiketiki ku Xikwembu Nkulukumba ha swake hi Moya lowu wungahelikiki, na ngeke na xisandru, yita hi basisa timpfalu teru a mintirweni leyi mitifeliki, akuva hitakota kutirela Xikwembu Nkulukumba lweyi a hanyaka.

¹⁵ Hileswo-ke, Yene i mutlhanganisi wa xipfumelelanu lexi ximpswha, akuva a kufa loko, kuhumeleli kutirula swidoho leswinga tumbuluka hansi ka xipfumelelanwini lexi xa kusungula, lava vitaniwiki vanyikiwa leswi xidumbiso xa kuda pfindla ledri dringahelikiki.

¹⁶ Hikusa laha kutraliwiki papela dra pfindla kone, swafanekela leswaku kufa ka mutrali wa drone kupaluxiwa.

¹⁷ Hikusa a papela dra pfindla dritiyisiwa loko vafile vadondrisi va Nawu, hileswi dringeke na ntamu loko mutrali wa drone aha hanya.

¹⁸ Hileswo-ke, a xipfumelelanu xa kuranga na xone axikhanguliwanga handle ka ngati.

¹⁹ Hikusa kuti loko Moxe ahlayi swileleto hinkwaswu hiku landra nawu wa tiko hinkwadru, a teki ngati ya marole ni swiphongo ni mati, ni voya bya libungu, ni hisopa, axuva nakunge ntsena buku, kambe ni dro tiko hinkwadru,

²⁰ aku: Leyi i ngati ya xipfumelelanu lexi Xikwembu Nkulukumba aleletiki han'wine.

²¹ Kutani axuvisa xiswoswo hi ngati a ntronga ni swibya hinkwaswu swakugandrela ha swone.

²² Mfuri hi nawu ingi hinkwaswu swibasisiwa hi ngati, a handle ka kuhalatiwa ka ngati, akuna kudrivaleliwa ka swidoho.

Kutinyiketa ka Kriste kudrivalela swidoho

²³ Swidjulekile kolahu leswaku aswifaniso swa mintxhumu ya le tilweni swibasisiwa hi mayentxela lawo. Kambe a swa le tilweni swone hi ntshima swifanekeli kubasisiwa hi timhamba leti titlulaka leto.

²⁴ Hikusa Kriste anga nhingenanga ambangwini wa kuxwenga lowu yentxiwiki hi mavoko, lexi xinga xifaniso ntsena xa lowu wunga wone. Kambe atilweni antshima ya drone, ayahumelela swoswi amahlweni ka Xikwembu Nkulukumba ahikombelelaka.

²⁵ Na ange hi kutinyiketa Yene kanyingi, swanga muprista lwenkulu anhingena ambangwini wa kuxwenga lembe drin'wana ni drin'wana hi ngati leyi ngeke yake.

²⁶ Hikusa loko swilitanu, afa afanekelile kuxaniseka ha kunyingi, kusukela akutumbulukeni ka misava. Kambe swoswi ahumeleli kan'we akuhetisekeni ka minkama, atadrivalela swidoho hi kutinyiketa ava mhamba.

²⁷ Kutani swanga hi leswi kululamisiwiki leswaku vhanu vafa kan'we, nangweso kubuya kuyavanyisa.

²⁸ Hiswoswo ke, Kriste ahumexiwi kan'we kususa swidoho swa vhanu. Ntrhaku ata humelela nangweso, kunge ha kutata susa xidoho, kambe a kutata huluxa lava mulaviselaka.