Va-Heberu 8 - Testamente Ledrimpswha ni Mapsalma

Yesu muprista lwenkulu

¹ A xalisima lexi hihlayiki xone hileswaku hinani muprista lwenkulu lweyi wa kutanu, lweyi atrhamisiki avokweni dra xinene dra xiluvelo xa vukulu bya le Matilweni,

² A mutireli wa vuhlawuleko ni wa tende ledringa drone, ledri Hosi yi driyimisiki, ange mhunu.

³ Hikusa a muprista lwenkulu wini ni wini abekiwa akuva ahumexa timhamba ni switlhavelo; hileswo-ke, afa swifanelile leswaku yelwi ava ni xantxhumu xa kuhumexa.

⁴ Hikusa loko afa ali misaveni afa angativa muprista, leswi kunga ni vaprista halenu, lava vahumexaka timhamba hi nawu.

⁵ Lava vatiraka ntiro lowu wunga xifaniso xa ntrhuti wa leswinga Matilweni, swanga heswi Moxe apfuletelisiwiki xiswone hi Hosi, loko adjula kuyimisa ntronga hikusa yone yiti: Vona! Utayentxa hinkwaswu mayelanu ni xifaniso lexi ukombiwiki nhaveni.

⁶ Kambe swoswi Yene akumi vutireli lebyi byitlulaka byavu swakunhati, hikuva leswi angamutlhanganisi wa xipfumelelanu lexi xikulu ngopfu, xinga lexi tiyisiwiki hi swidumbiso leswi swinene.

⁷ Hikusa loko a xipfumelelanu xa kusungula xavi lexi pfumalaka kusoleka, afa swingafanelanga akuva kudjuliwa xin'wana.

⁸ Kambe-ke, hikusola tiko drakwe ati: Vonani, a masiku mata, kuhlaya Hosi, laha nitaka yentxa xipfumelelanu leximpswha ni yindlu ya Israyele ni yindlu ya Yuda.

⁹ Xinge lexi fanaka ni xipfumelelanu lexi ninga xiyentxa ni vatatana vavu siku ni vatekiki hi voko kuva humexa atikweni dra Egipta. Hikusa avahayanga mahlweni ni xipfumelelanu xanga, kutani na mine nivatrikile, kuhlaya Hosi.

¹⁰ Hikusa lexi i xipfumelelanu lexi ni taka xiyentxa ni tiko dra Israyele ntrhaku ka masiku lawo, kuhlaya Hosi: Nita beka milawu yanga miyanakanywini yavu, na kone nita mitrala ni le timbilwini tavu. Nita va Xikwembu Nkulukumba wavu, na vone vatava tiko dranga.

¹¹ Nakone mun'wana angaka angadondrisi a wa le kwavu, swingadjuleki nambi kuhlaya van'we ku van'wana leswaku: Tiva Xikwembu Nkulukumba! Hikusa hinkwavu vata ni tiva, kusukela ku lwentrongo kuyatlhasa ku lwenkulu wavu.

¹² Hikuva nitava ni lirere, ni drivalela swihono swavu, ni ngaka ningaha drimuki swidoho swavu ni siku ni drin'we.

¹³ Loko Yene ahlayaka xipfumelelanu leximpswha, hileswaku lexa kusungula i xa khale kutani. Ke, leswi swindrulukiki swa khale, swiduhwalile, switanyamalala hi kukahlula.