Rm 9 - Testamente Ledrimpswha ni Mapsalma

Xikwembu Nkulukumba a hlawuli lweyi amudjuliki

¹ Hi vito dra Kriste, nihlaya xihlayelamfuri na ninga hembi. A lipfalu dranga, hi kupfuniwa hi Moya wa Kuxwenga, nili:

² Nini nhlomulo lowu wukulu, ni kuvaviseka mbilwini yanga.

³ Mine mfuri afa ninavela akuva lweyi aruketeliwiki, nitravukanisiwa na Kriste, hinkonta ya vamakweru ni maxaka yanga, hi nyama.

⁴ Vone va lixaka dra Israyele, lava swivafaneliki akuva vahlayiwa vana vakwe, na kone mfuri akutwala, ni xipfumelelanu na vone, ni kuva nyika nawu, vugandreli bya kuhlawuleka ni swidumbiso;

⁵ Vone i valixaka dra vatatana; mfuri Kriste ahumi ku vone, hi nyama, lweyi angahenhla ka hinkwavu, akukhensiwi Xikwembu Nkulukumba hi minkama ni minkama. Amen!

⁶ Hinga yanakanyeni leswaku a xidumbiso xa Xikwembu Nkulukumba xidluvekile, hikusa ahi hinkwavu va tinxaka taka Israyele vanga tiko dra Israyele;

⁷ mfuri ahi hinkwavu vatinxaka ta Abrahamu vanga vana vavu, Kambe: A tinxaka ta Isaki hi tone tinga vana vaku.

⁸ Leswi swidjula kuhlaya leswaku ahi vana va Xikwembu Nkulukumba lava pswaliwaka hi nyama, kambe ntsena lava pswaliwaka hi kulandra xidumbiso lava vahlayiwaka lixaka.

⁹ Hikusa a ritu draxidumbiso hiledri: Kusukela ku nkama lowo nitatlhela nibuya kutani, Sara atava ni n'wana.

¹⁰ Na swinga humelelanga ku yene ntsena kambe na kone ku Rabeka, lweyi angave ni nyimba ha nuna mun'we ntsena, anga Isaki, tatana weru.

¹¹ Kutani ni loko vana vangasangana pswaliwa, mfuri na vangasangana yentxa lexinene kumbe leximfani, akuva a kungu dra Xikwembu Nkulukumba ledri dringa hi kutilangela ka lweyi, dritiya dringapfi mintirweni, kambe dripfa kurandreni ka lweyi angava vitana,

¹² ku hlayiwi leswi ku Rebeka: Lwe nkulu atatirela lwe ntrongo,

¹³ Swanga hi leswi kutraliwiki: Nirandri Yakobe kutlula Esawu.

¹⁴ Kolahu xana hitahlaya yini? Leswaku Xikwembu Nkulukumba angalulamanga? Aswitanu!

¹⁵ Yene kutani ati ku Moxe: Nitatretrelela lweyi nitakamutretrelela, niva ni lilondro ku lweyi nitakava ni lilondro ku yene.

¹⁶ Xi leswo, aswipfi ku leswi vhanu va swirandraka nambi kakuva hi mintamu yavu, kambe swipfa lirereni dra Xikwembu Nkulukumba.

¹⁷ Hikusa a amatralwa mali ku Faro: Hi mine nikuyentxiki mufumi akuva nikombisa ha wene a ntamu wanga ni kuva wutivisiwa misaveni hinkwayu.

¹⁸ Hi xileswo, Yene ani lilondro ku lweyi amurandraka, ni kunonon'hwisa mbilu ya lweyi amuvonaka.

Mahlundru ya Xikwembu Nkulukumba ni timpswalu

¹⁹ N'winganibyela: Xana Yene aha solela yini? Hikusa hi mani lweyi angatiyiselaka kurandreni kwake?

²⁰ U mani wene, we mhunu, kutengisana ni Xikwembu Nkulukumba? Xana i yini xakuvumbiwa, xingakotaka kuvutisa lweyi a xivumbiki xiku: Hikola kayini univumbisili xileswo xana?

²¹ Hikusa amuyentxi wa vumba ani mfanelo ya kuyentxa ha drone leswi aswirandraka. Awaswikota muvumbi kuhamba swibya swa lisima ni swin'wana swakuka swinge swalisima.

²² Hikolahu hina yini xakuxihlaya, loko Xikwembu Nkulukumba arandra kukombisa mahlundru yake ni kunyika kutiva ntamu wakwe! Yene akombisi kutiyisela kwake kunyingi ku lava afaka vafaneliwa hi swikhatiso swamatilo ni ku lava faka vafaneliwa hi kuhelisiwa,

²³ akuva xiswoswo, akombisa mahlolana ya lifuyo dra kutwala kwake ku swibya swa lilondro drakwe, leswi aswibekisiki akuva switakuma lidrumo na swone,

²⁴ i nga hine lava, na kone a hivitaniki na kunge ntsena makari ka va-Yuda, kambe na kone kuva matiko man'wana.

²⁵ Swanga hi leswi angahlaya abukwini dra Hoxeya aku: Nitavitana vatiko dranga ku lava afaka vange drone; ni murandriwa ku lweyi afaka angarandriwi;

²⁶ Ni mbangu lowu nivabyeliki niku: N'wine an'witiko dranga, lahu n'witahlayiwa vana va Xikwembu Nkulukumba lweyi a hanyaka.

²⁷ Na yene Ezaya ahlaya hi tlhelo dra Israyele aku: Nambi loko vana va Israyele vangava vanyingi vafana ni sava dra likhulu, ntsena i nsalonyana wavu wu taka huluka.

²⁸ Hikuva Hosi yita hetisa ritu dra yone henhla ka misava, hi ndlela ya kuhangwesa ni kuhetiseka.

²⁹ Swanga hi leswi Ezaya ahlayiki aku: Loko a Hosi ya mintamu hinkwayu yinga hi siyelanga lixaka, hine afa hitava hi weli kusuveni, swanga ha Sodoma na Gomora.

Israyele ni Ivangeli

³⁰ Hitahlaya yini hi leswi? Hidjula kuhlaya leswaku a va-Matiko afa vanga djulisisi kululama, vakuyamukeli mayelana ni kupfumela loku ka kululama;

³¹ kutani Israyele lweyi afaka adjula a nawu wakululama angakukumanga.

³² Ha yini ke xana? Hikusa aswipfanga ku pfumeleni, kambe ntsena swive swanga hi mintiro. Xileswo vakhunguvanyekeli aribyeni ledri drivawisiki,

³³ swanga hi leswi kutraliwiki: Nibeka ribye a Siyoni ledri drikhunguvanyisaka ni kuwisana; Kambe lweyi a pfumelaka ku drone angavi na tingana.