Rm 8 - Testamente Ledrimpswha ni Mapsalma

A vutomi mayelana ni Moya wa Xikwembu Nkulukumba

¹ Kambe swoswi akehena kuyavanyisiwa ku lava vanga ku Yesu Kriste.

² Hiswoswo a nawu wa Moya wa vutomi, ku Yesu Kriste, wu kuntrhunxi ku nawu wa xidoho ni wa lifu.

³ Hikusa leswi afaka swinga koteki ku nawu, hi leswi afaka wu hikola ka nyama, Xikwembu Nkulukumba a yentxile leswi hi ku rumela N'wana wakwe hiku fana ni nyama ya xidoho, xiswoswo, Xikwembu Nkulukumba a yavanyisile Xidoho a nyameni.

⁴ Akuva a kululama ka nawu kuhetiseka ku hine hinga fambikiki hi nyama, kambe hi fambaka hi Moya.

⁵ Hikusa lava vatinyiketaka ka nyama vayanakanya mintxhumu ya nyama, kambe lava vatinyiketaka ka Moya, vayanakanya swa Moya.

⁶ Hikusa akuyanakanya ka swanyama kuyisa kufeni, kambe leswi swinga swa Moya swiyisa vuton'wini ni le kuruleni.

⁷ Hikolahu, akuyanakanya ka nyama ku nyenyana ni Xikwembu Nkulukumba, hikusa akuyingiseti a nawu wa Xikwembu Nkulukumba, mfuri akukoti kuyentxa.

⁸ Lava vahanyaka nyameni avana kuswikota kunyoxisa Xikwembu Nkulukumba.

⁹ Ke, n'wine swoswi an'wihanyi nyameni, kambe n'wihanya Moyeni, loko hakunene n'wini Moya wa Xikwembu Nkulukumba. Loko mhunu ange na Moya wa Kriste, ahi wa Kriste.

¹⁰ Loko Moya wa Kriste wuli ku n'wine, swoswi a miri mifeli xidohweni, kambe a Moya wuvanyika vutomi hinkonta ya kululama.

¹¹ Hakunene loko n'wili ni Moya wa lweyi angapfuxa Yesu aku feni, yelweyi kunene a pfuxiki Kriste Yesu aku feni atahanyisa miri yenu leyi mi faka, hinkonta ya Moya wakwe lowu trhamaka ku n'wine.

¹² Xileswo vamakweru, ahina nandru kunyama, wakuva hi hanya hi nyama.

¹³ Loko n'wine n'wihanya hi kunavela ka nyama, n'wikongoma kufeni; kambe loko hi Moya n'widlaya mintiho ya vudohi, xileswo n'wine n'witahanya.

¹⁴ Hinkwavu lava fambisiwaka hi Moya wa Xikwembu Nkulukumba, i vana va Xikwembu Nkulukumba.

¹⁵ Hikusa an'wiyamukelanga Moya wa vukarawa, akuva n'wihanya na n'witxhava, kambe n'wiyamukeli a Moya wakuhlayiwa leswaku n'wi vana, lowu ha wone hi bandlukanaka: Abba, swidjulaka kuhlaya leswaku Tatana.

¹⁶ Hi wo Moya lowo wu dondrisaka a moya weru leswaku hine hi vana va Xikwembu Nkulukumba.

¹⁷ Ke, loko hili vana, na kone mfuri hi vadi va pfindla. Hi vadi vapfindla dra Xikwembu Nkulukumba kun'we na Kriste. Loko hi xaniseka kun'we na yene, na kone hitatwalisiwa kun'we na Yene.

Kuxaniseka ka nkama lowu ni kuphatima loku kutaka

¹⁸ Hikusa ni pimisa leswaku a mahlomulo yeru ya swoswi amana kufanisiwa ni kuphatima loko kutakapfuleteliwa ku hine.

¹⁹ A misava hinkwayu n'wirindrela hi kunavela lokukulu ampfuletelo wa Xikwembu Nkulukumba ku vana vakwe.

²⁰ Hikusa a misava mile hansi ka kuhluleka, kunge hi kurandra ka yone, kambe hinkonta ya lweyi amivumbiki,

²¹ hikulavisela kaleswi swaku yone misava, siku drin'wana mita ntrhunxiwa vukaraweni ni le kuhahluliweni, akuva mitrhunxeliwa kuphatimeni ka vana va Xikwembu Nkulukumba.

²² Haswitiva swinene leswaku kukondra kuva swoswi misava hinkwayu yakonya, yixaniseka swanga kuvavisa ka kulun'wa.

²³ Ahi ntsena misava, kambe na hine lava hinga ni masungulo ya Moya, na hine haxaniseka ndreni kweru na hirindrela nkama wa kuyentxiwa vana, akuntrhunxeka ka miri yeru.

²⁴ Hikusa akulaviseleni hi huluxiwile; hakunene, aku lavisela loko kuvoniwa a hi kulavisela, hikusa leswi swivoniwaka hinga swilaviselisa kuyini?

²⁵ Kambe loko hine hilavisela leswi hingasiki na swivona, hiswilavisela hi kutiyisela.

²⁶ Hiswoleswo na wone Moya wa hipfunisa a gomeni dreru, hikusa ahitivi kukhongota hilaha swifaneliki, kambe a Moya hi ntshima wu hi kombelela hi minkonyo leyi mingeke na kutlhamuxeliwa.

²⁷ Yene Lweyi avonaka ndreni ka timbilu, ativa leswi a Moya wuswinavelaka, hikusa hi kurandra ka Xikwembu Nkulukumba, hileswaku wukhongotela tinsasi.

²⁸ Haswitiva hine leswaku hinkwaswu switlhanganela akuva switirisa ku lava varandraka Xikwembu Nkulukumba, vanga lava avavitaniki hi kungu drakwe.

²⁹ Hikusa lava Xikwembu Nkulukumba afaka nana avahlawulile vabekiseli akuva vafana ni N'wana wa wakwe, akuva Yene ava n'wana wakusungula ku vamakwavu lavanyingi.

³⁰ Lava ava hlawuliki, lavo na vone ava vitanile, ni lava avavitaniki na vone avahlayile valulami, ni lava avahlayiki valulami avatwalisile.

Lirandru dra Xikwembu Nkulukumba dra hlamalisa

³¹ Hitahlaya yini hi leswi? Loko Xikwembu Nkulukumba ayimile na hine, i mani lweyi a taka lwa na hine?

³² Yene lweyi angatretrelelangakiki a N'wana wakwe, kambe ahinyiketi yene hinkweru, xana angaka angahihanani hinkwaswu kun'we ni N'wana wakwe?

³³ Hi mani lweyi angarambelaka lava Xikwembu Nkulukumba a vahlawuliki xana? I Xikwembu Nkulukumba avahlayiki valulami.

³⁴ Hi mani lweyi atakavayavanyisa? I Kriste Yesu lweyi a fiki, kumbe xana, lweyi apfukiki kufeni, na kone anga vokweni dra xinene dra Xikwembu Nkulukumba mfuri a hi kombelelaka.

³⁵ Hi mani lweyi ataka hitravukanisa ni lirandru dra Kriste? Nhlomulo, kunonon'hweliwa, kuxanisiwa, ndlala, vusweti, timhangu, a lifu?

³⁶ Swanga hi leswi kutraliwiki: Hinyiketiwi ku dlayiweni hinkonta yaku masiku hinkwawu. Vahiyentxisa swanga tihamba leti yisiwaka kutlhabyiweni.

³⁷ Kambe ku hinkwaswu leswi hine hi hundrisa ngopfu kuhlula, hi lweyi ahirandriki.

³⁸ Hikusa nakholwisisa leswaku, nambi ka kuva kufa, nambi bya kuva vutomi; nambi swakuva swirun'wa kumbe min'wana minfumu kumbe mintamu ya moya; nambi swakuva swa swoswi, nambi swakuva leswi switaka;

³⁹ nambi swakuva swa mintamu leyi mitlakukiki, nambi swakuva leswi swiyetiki. Akuna ntxhumu nambi ni mhunu lweyi a nga kotaka kuhi travukanyisa ni lirandru dra Xikwembu Nkulukumba, ahinyikiki ku dri tiva hi Hosi yeru Yesu Kriste.