Rm 6 - Testamente Ledrimpswha ni Mapsalma

Kufela xihono, kuhanya ha Kriste

¹ Xana hitakuyini ke? Hitatrhama xihonweni, akuva timpswalu tiyandra?

² Swingatxhuki swiva tanu! Hinga hanyisa kuyini a xidohweni Hine lava ku Yene hi fiki?

³ Kumbe an'wiswitivi leswaku hine hinkweru lava hi Babatisiwiki akuva hi tlhanganisiwa na Yesu Kriste, hi tlhanganisiwi na yene ku lifu drakwe?

⁴ Hilahliwi kun'we na Yene, hi Babatiso ku lifu, akuva, swanga hi leswi Kriste apfuxiwiki akufeni hi kuphatima ka Tatana, na hine hi famba hi vutomi lebyi byimpswha.

⁵ Hikusa, loko hitlhanganisiwile na yene hi lifu swanga hi drakwe, na kone hita tlhanganisiwa na yene swanga hi kupfuka kwake.

⁶ Haswitiva leswaku leswi afaka hilixiswone hine kusunguleni swifile na Kriste axihambanwini, akuva kuhelisiwa leswi ku hine afaka kuni kubiha akuva hinga havi swikarawa swa xihono,

⁷ Lweyi afiki antrhunxekile axidohweni.

⁸ Loko hine hi file na Kriste, na kone ha pfumela leswaku hita pfuka kun'we na Yene.

⁹ Ha switiva leswaku, loko Kriste lweyi apfuxiwiki akufeni, angahafi; a lifu adrina ntamu henhla kwake.

¹⁰ Hikusa loko a file, afeli xidoho kan'we kuva hi laha kungahelikiki, kambe leswi a hanyaka, a hanyela Xikwembu Nkulukumba.

¹¹ Hi ndlela yoleyo, tipimisani na n'wine lava feliki xidoho kambe n'wihanyela Xikwembu Nkulukumba hi kutlhanganasiwa na Yesu Kriste.

¹² Hileswo-ke, a xidoho xingatxhuki xifuma amirini yenu leyi mifaka, akuva n'wixiyingiseta akunaveleni ka xone.

¹³ N'winganyiketeni xidohweni swiro swamiri yenu swanga switiro swavubihi; kambe tinyiketani ku Xikwembu Nkulukumba, swanga hi vhanu lava vapfukaka kufeni, miri yenu ku Xikwembu Nkulukumba, swanga switiro swakululama.

¹⁴ Hikusa a xidoho xingahavi ni ntamu henhla kwenu; hikusa a mehe hansi ka nawu. Kambe atimpswalwini ta Xikwembu Nkulukumba.

A ntirweni wa kurandra Xikwembu Nkulukumba

¹⁵ Hikolahu hi pimisa yini? Xana hita doha hi leswi hingeheke hansi ka nawu, kambe atimpswalwini ta Xikwembu Nkulukumba? Swingavi tanu!

¹⁶ N'wine n'waswitiva leswaku, lweyi n'witinyiketaka ku yene swanga switiri akuva n'wimuyingiseta, ku yelweyo n'wimuyingisetaka n'wiswitiri swake, kumbe swa xidoho lexi xiyisaka ku feni, kumbe akuyingiseteni loko kutisaka kululama.

¹⁷ Kambe, a kutlangeliwi Xikwembu Nkulukumba! N'wine lava n'wiviki swikarawa swaxidoho, kuhinkwaswu n'wivi nikuyingiseta hi mbilu amayentxela ya dondro dondrweni leyi n'wiyi nyikiwiki.

¹⁸ Hikuva n'wintrhunxiwiki axidohweni, n'wiyentxiwi switiri swakululama.

¹⁹ Nikhanela hi ndlela ya vumhunu hinkonta ya gome dra nyama yenu. Swanga hi leswi n'winyiketiki miri yenu akuva miva swikarawa swavusomboloki ni vubihi akutireleni ka swakubiha, Ke swoswi, nyiketani miri yenu akuva n'witirela vululami akuva n'wixwengisiwa

²⁰ Hikusa loko n'wehe swikarawa swa xidoho, afa n'winge kululameni.

²¹ Hi nkameni wolowo, xana afa n'wikuma mihandru muni? Kasi i mintxhumu leyi swoswi yi n'wikhomisaka tingana ntsena; hikusa avugamu bya swone i lifu.

²² Swoswi kutani n'wintrhunxekiki ku xidoho, n'windrulukiki n'wiva switiro swa Xikwembu Nkulukumba. N'wini handru wenu akuva n'wibasisiwa, akuva n'witava ni vutomi lebyi byingahelikiki.

²³ Hikusa a hakelo dra xidoho i kufa, kambe a nyiko leyipfaka ku Xikwembu Nkulukumba i vutomi lebyi byingahelikiki hi ntlhanganu na Kriste Yesu Hosi yeru.