Rm 5 - Testamente Ledrimpswha ni Mapsalma

Hini kurula na Xikwembu Nkulukumba

¹ Leswi hihlayiwiki valulami hi kupfumela, ahiveneni ni kurula ku Xikwembu Nkulukumba ha Hosi yeru Yesu Kriste.

² Lweyi ha Yene hikumiki hi kupfumela, timpswalu leti hitiyiki ku tone, nakone hititwalisa akulaviseleni ka kuphatima ka Xikwembu Nkulukumba.

³ Swinge leswo ntsena, kambe hi titwalisa ni le mahlomulweni, hi kutiva leswaku a mahlomulo ma vanga kutiyisela,

⁴ a kutiyisela kuvanga kuhlula mindringweni, mfuri akuhlula ndringweni kuvanga kulavisela.

⁵ Swatwala, akulavisela akuvangi tingana, hikuva alirandru dra Xikwembu Nkulukumba dritxheleteliwile atimbilwini teru, hi Moya wa Kuxwenga lowu hinyikiwiki wone.

⁶ Hikusa Kriste, a nkama hine afaka hini gome, afeli vadohi hi nkama wa kone.

⁷ Afa swinga nonon'hwa ngopfu akuva mhunu a fela lweyi wa kululama. Hakunene, a mhunu angenakuswikota kunyiketa vutomi hi mhunu lweyi munene.

⁸ Kambe Xikwembu Nkulukumba akombisa lirandru drakwe ku hine, hi leswi Kriste ahifeliki, na hahali vadohi.

⁹ Ngopfu kutani, leswi hi hlayiwiki valulami hinkonta ya ngati yake, hitahuluxiwa ha Yene mahlundrwini.

¹⁰ Hikuva loko hi tlhanganisiwile ni Xikwembu Nkulukumba, hi kufa ka n'wana wakwe, na kasi afa hili valala, ngopfu swoswi hita huluxiwa hi vutomi byake, leswi hitlhanganisiwiki kutani.

¹¹ Na ange ntsena hinkwaswu leswi; kambe na hine hititwalisa ku Xikwembu Nkulukumba ha Yesu Kriste, Hosi yeru, hikola ka lweyi hikumiki ha Yene akutlhanganisiwa.

Adamu na Kriste

¹² Kutani, swanga hi leswi ha mhunu mun'we ntsena kunhingeniki xidoho misaveni, hikola ka xidoho kuti a lifu; hi swoleswo na kone a kufa kunhingenile ku vhanu hinkwavu, hikusa hinkwavu vadohile.

¹³ Xileswo, kukondra kuyatlhasa nkameni wa nawu, na a xidoho afa xili kone misaveni. Kambe, leswi faka kunga siva ni nawu, Xikwembu Nkulukumba afa xinga londrisi xidoho.

¹⁴ Kambe aku fa ka fumi kusukela ka Adamu kukondra kuya tlhasa nkameni wa Moxe, nambi ku lava afaka vangena xidoho hi kufana na Adamu, lweyi angaxifaniso xa lweyi afaka a faneli kuta.

¹⁵ Kambe, akuna kudringanisiwa nyiko ya timpswalu ni kutlula nawu, ke, hi kudoha ka mun'we vanyingi vafile, ngopfu-ngopfu a timpswalu ta Xikwembu Nkulukumba, ni nyiko leyi yinga timpswalwini ta mhunu mun'we, Yesu Kriste, i nyiko yikulu ngopfu ku lava vanyingi.

¹⁶ Nakone a nyiko leyo, ayi fani ni ya loko mhunu mun'we a dohile; Hikusa a yavanyiso drisukeli ka xidoho xin'we, dritisa a yavanyiso, kambe a timpswalu ti buya hi ka swidoho swinyingi, akuva swiyisa kululameni.

¹⁷ Kutani, loko kuvi hi xidoho xa mun'we, ni leswaku hi xidoho xa mun'we a lifu dri fumile, kambe ngopfu-ngopfu ku lava va yamukelaka a timpswalu hi ntalo ni nyiko leyi ya kululama vatafuma vuton'wini ha mun'we, anga Yesu Kriste.

¹⁸ Xileswo, Swanga hileswi ha xidoho xin'we ntsena, xitisiki a tremo henhla ka vhanu hinkwavu akuva vayavanyisiwa, xiswoswo kambe, hinkonta ya xiyentxo xin'we xakululama kuxikile timpswalu henhla ka vhanu hinkwavu akuva vava ni kululama loku kunyikaka vutomi.

¹⁹ Hakuva hikutiyalisa ka mhunu mun'we ntsena, hinkwavu vandruluki vadohi, swanga hi kuyingiseta ka mun'we ntsena, hinkwavu vandruluki lava vanene.

²⁰ A nawu wutile wutayengesela ngopfu a xidoho. Kambe lomu kuviki ni kudoha ngopfu, kuvi ni timpswalu hi kuyandra,

²¹ Akuva leswi, axidoho xifumiki a lifu, kambe na tone timpswalu ti kota kufuma hi kululama a vuton'wini lebyi byingahelikiki, hikola ka Yesu Kriste, a Hosi yeru.