Rm 4 - Testamente Ledrimpswha ni Mapsalma

Xikombiso ha Abrahamu

¹ Xana hita kuyini hitatana weru Abrahamu? Kuhumeleli yini ku yene xana?

² Hikusa loko Abrahamu ahlayiwile kululama hinkonta ya mintiro, a faneli kutikulisa, kambe kunge mahlweni ka Xikwembu Nkulukumba.

³ Ke, Tralwa driliyini? Abrahamu avi ni kupfumela ku Xikwembu Nkulukumba, hileswo-ke ahlayeliwa kululama.

⁴ Swatwala, lweyi a tiraka ayamukela hakelo drakwe. Leswo aswifani ni xihanano, kambe wa kuva nandru.

⁵ Kambe, lweyi wakuka angatiri, apfumela ku Xikwembu Nkulukumba lweyi ayamukelaka mudohi, amuyentxa nakulobye wakwe hi kupfumela kwake na kunge hi mintiho.

⁶ Swanga hileswi na yene Davida akhensaka ku kateka ka mhunu lweyi Xikwembu Nkulukumba ximunyikaka kululama, na kunge hi mintiho:

⁷ Vakatekile lava a swihono swavu swidrivaleliwiki hi Xikwembu Nkulukumba, Volavo a swidoho swavu swidrivaleliwiki!

⁸ Akatekile a mhunu lweyi a Hosi yingamuhlayelikiki a swidoho.

⁹ A kukateka loko, xana kufanekela lava vasokiki, kumbe xana ni lava vangasokangakiki? Hi tiyisa leswaku a kupfumela kunyikiwile Abrahamu akuva ahlayiwa lweyi wakululama.

¹⁰ Kutani, anyikisiwi kuyini? Xana hi loko asokile, kumbe hi loko anga si soka? Akuvanga hi nkama lowo a sokiwiki, Ka kuva loko angasisoka.

¹¹ Mfuri anyikiwi xikombiso xa kusoka, swanga xifungo xa kululama loku kuhumaka kupfumeleni loku angapfumelela na angasina soka; akuva ava tatana wa hinkwavu lava vapfumelaka na vangasokanga, akuva vatahlayeliwa akululama,

¹² ni kuva tatana wa lava vasokiki vange vakusoka ntsena, kambe na vafamba hi ndlela ya kupfumela ka Abrahamu, tatana weru na angasina sokiwa.

A xidumbiso xa Xikwembu Nkulukumba ni kupfumela ka Abrahamu

¹³ Akuvanga hikola ka nawu lowu Abrahamu, kumbe vatukulu vakwe vayamukeliki axidumbiso xa leswi swaku vatava vadi vapfindla dra misava, kambe swive hikupfumela loku kupfaka kululameni.

¹⁴ Xileswo, loko lava vayingisetaka nawu a vali vone vadi vapfindla, a kupfumela afa kutava ka kuka ndlela ni xidumbiso xa Xikwembu Nkulukumba afa xinga tiva na lisima.

¹⁵ Hikusa a nawu wu koka mahlundru, kambe ni laha ku ngeke na nawu akuna kutlula nawu.

¹⁶ Leswi hiswone leswi swibuyisaka kupfumela, akuva swiva hi timpswalu, leswaku a xidumbiso xiva lexi xitiyisiwiki a tinxakeni hinkwatu, na ange ntsena leswi swinga nawini, kambe na swone swiva hikupfumela loko kuviki na Abrahamu hikusa Abrahamu i tatana wa hinkweru,

¹⁷ swanga hi leswi kutraliwiki: Nikuyentxi kuva tatana wa matiko lawa manyingi a mahlweni ka lweyi apfumeliki ku Yene, Xikwembu Nkulukumba lweyi a hanyisaka vafi na ayentxa miva kone a mintxhumu leyi mingeke kone.

¹⁸ Nambi loko kungahali na kulavisela, Abrahamu afa apfumelile leswaku atava tatana wa matiko lamanyingi, swanga hi laha Xikwembu Nkulukumba angahlaya ha kone: Wu tava xileswi a ntrengo wa tinxaka taku.

¹⁹ Kutani angavanga na gome akupfumeleni kwake, nambi loko a yanakanya amiri yake mifiki khale, afa ali kusuhi ni dzana dra malembe, leswaku Sara angehe na kuva na vana.

²⁰ Anga ganaganekanga, hi kukala kupfumela ku xidumbiso xa Xikwembu Nkulukumba, kambe hi kupfumela atitiyisile, atwalisi Xikwembu Nkulukumba,

²¹ afa ani kudumba ka kutiya ka leswaku Xikwembu Nkulukumba ani ntamu wa kuhetisa leswi aswidumbisiki.

²² Hi ndlela leyo, Xikwembu Nkulukumba amuhlayi mululami.

²³ Kambe a switraliwanga hikola kwake ntsena leswaku a hlayeliwile kululama.

²⁴ Matraliwi na kone hinkonta yeru. Hikusa Xikwembu Nkulukumba na kone awahiyamukela swanga valulami, ku hine lava vapfumeliki ku lweyi apfukiki ku vafi aya vuton'wini, inga Yesu, Hosi yeru.

²⁵ Lweyi anyiketiwiki kufeni hinkonta ya swidoho sweru ni kumupfuxa, ni kuhlayiwa kweru a vululami.