Rm 2 - Testamente Ledrimpswha ni Mapsalma

Ayavanyiso dra Xikwembu Nkulukumba drilulamile

¹ Hi swoswi, wene lweyi ungavaka mani na mani, awunakutilandrula hi kuyavanyisa van'wana. Hi kuvayavanyisa wa tiyavanyisa ha vuswaku, hikusa uyentxa swakufana na vone.

² Haswitiva leswaku a kuyavanyisa ka Xikwembu Nkulukumba kululamile a kuyavanyiseni ka lava yentxaka mintxhumu ya kunhatu.

³ Wene mhunu, uyavanyisaka lava vayentxaka leswo, uyanakanya leswaku, wene u solaka lava vayentxaka mintiro leyo na u yentxaka kufana na vone, utahuluka a yavanyiso dra Xikwembu Nkulukumba?

⁴ Udrelisa kuyini wene a vumbilu lebyikulu bya Xikwembu Nkulukumba, ni kuleha ka mbilu ni kutiyisela? Awuswitivi leswaku a vumbilu bya Xikwembu Nkulukumba afa byifanela ku kuyisa akutisoleni ka swidoho?

⁵ Kambe hinkonta yakunono'hwa kambilu yaku, leya kuka yingadjuli kundruluka. Hi swoleswo utihlengeletela nhlengo ya mahlundru a sikwini dra mahlundru ya kupfuleteleka ka tremo dra kululama dra Xikwembu Nkulukumba,

⁶ lweyi atakatlhelisela mun'wana-ni-mun'wana kuya hi mintiro yake,

⁷ a vutomi lebyi byingahelikiki ku lava vayentxaka hi kutiyisela a mintiro leminene na vadjula lidrumo ni kutwala ni kuka kungaboliwi.

⁸ Kambe atavanyika xikhatiso lexakunono'wha lava vamupfukelaka ni lava vangamupfumelikiki hi xihlayelamfuri, kambe valandrelela vubihi.

⁹ Kuvani kuxaniseka ni nhlomulo ku hinkwavu lava yentxaka leswakubiha, kusungula hi va-Yuda ni le ku van'wana.

¹⁰ Kambe kutava ni lidrumo, kutwala kurula ku hinkwavu lava vayentxaka vunene, kusungula ku va-Yuda ni ku va-Matiko.

¹¹ Hikusa ku Xikwembu Nkulukumba akuna kuyavanyisiwa ka vhanu.

¹² Hinkwavu lava vadohaka na vangativi nawu, vatalahleka na vangativi nawu, Kambe hinkwavu lava vadohaka na vativa nawu, vatayavanyisiwa hi nawu.

¹³ Hikusa avayingeli ntsena va nawu, a hi valulami mahlweni ka Xikwembu Nkulukumba, kambe ntsena lava vayentxaka leswi swileletiwaka hi nawu hi vone vatakahlayiwa valulami.

¹⁴ Ke loko ava-matiko, lava vangeke na nawu vayentxa swa nawu hi ntumbuluko, lavo nambi vange na nawu, vone i nawu ha swavu.

¹⁵ Volavo, hi mayentxela yavu, vakombisa leswaku atimbilwini tavu kutraliwi a nawu. Alipfalu dravu drivahambela vumboni, ni miyanakanyu yavu mivarambela kumbe kuvayimela.

¹⁶ Hi siku ledri Xikwembu Nkulukumba, hikola ka Kriste Yesu, atayavanyisa leswi swifihliwiki swa vhanu, swanga hileswi a Ivangeli leyi yinene yingahlayaka;

Nandru wa va-Yuda

¹⁷ Wene utihlayaka mu-Yuda, utiseketelaka nawini utikukumuxaka hi kutiva Xikwembu Nkulukumba.

¹⁸ U tivaka kurandra kwake ni kudringa mintxhumu leminene, na u dondrisiwa hi nawu.

¹⁹ U tihlaya swanga lweyi afambisaka a vakufa-mahlu, a livaningo dra lava vafambaka munyameni.

²⁰ U tiyanakanya mudondrisi wa lava vakuka vangativi, ni mululeki wa vatrongwana, utivona lweyi ataliki hivutivi ni xihlayelamfuri.

²¹ Wene lweyi adondrisaka van'wana, hayini ungatidondrisi na wene? Wene Ureraka leswaku vangayivi, hikola ka yini wene uyiva?

²² Uli kungayentxiwe vumbuye, hikolahu kayini ubyiyentxa? Wene lweyi asandraka swikwembu leswi swakuka ndlela. Hikolahu kayini utipfuna hi leswi va swinyikaka?

²³ Utikulisa hikuva ni nawu, kambe udrela Xikwembu Nkulukumba hi kuyentxa leswi hambaniki ni kuleleta ka nawu.

²⁴ Hikusa, swanga hileswi kutraliwi: A vito dra Xikwembu Nkulukumba drisandriwa amakari ka va-Matiko hinkonta yenu.

Hi drini a lisima dra kusoka?

²⁵ Hikusa akusoka ka londrovoteka hakunene loko wene ubekisa nawu; kambe loko uli mutluli wa nawu switava swanga hi loko ungasokanga.

²⁶ Hikolahu ka leswo, lweyi waku ka angasokanga abekisa swileleto swa nawu, xana lweyo angaka angahlayiwi lweyi asokiki?

²⁷ Lweyi angasokangakiki a mirini kambe abekisa nawu atakuyavanyisa wene u wutluliki, nambi utiva nawu lowu traliwiki ni kuva usokile.

²⁸ Ahi mu-Yuda lweyi atikombisaka hi le handle hi kusoka loku nga mirini yake;

²⁹ Kambe mu-Yuda hi lweyi anga yene andreni, ni loko asokiwi ambilwini, ni le Moyeni kunge hi nawu wa kutraliwa. Hi yelweyo anganikukhenseka loko kungapfiki vhanwini, kambe ku Xikwembu Nkulukumba.