Rm 11 - Testamente Ledrimpswha ni Mapsalma

Ntlawa wa vahlawuliwa

¹ Nangweso navutisa: Xana Xikwembu Nkulukumba atava a txukumeti tiko drakwe xana? Aswilitanu! Hikusa na mine ni mu-Israyele, wa xiloso xaka Abrahamu wa xiloso xaka Benyamini.

² Xikwembu Nkulukumba angatxukumetanga tiko drakwe, ledri angadrihlawula kehe kusunguleni. Xana n'wine an'wiswitivi leswi a Matralwa ya Kuxwenga ma hlayaka swone ha Eliya lweyi a rambelaka Israyele ku Xikwembu Nkulukumba?

³ Hosi, vadlayi ni vaprofeta vaku, vambundrumuxile ni mimbangu ya kuhisela magandrelo yaku. Ne kusala vuswanga, na mine Avadjula kunidlaya.

⁴ Kasi dravi drini ayangulo dra Xikwembu Nkulukumba xana? Dravi ledri: Nitisaleli ni ntlhanu wa makume na makume mabiri ya madzana (7000) ya vhanu lava vakukavanga khisamelanga xikwembu Baale.

⁵ Kasi, hi ndlela yoleyo ni ku wo nkama wa swoswi yi kone nhlayunyana yitrongo ya lava vahlawuliki hi timpswalu.

⁶ Loko avi hi timpswalu, akahavanga hinkonta ya mintiro yavu; loko ali hi ndlela yin'wana atimpswalu atingaha faneli kuva timpswalu.

⁷ Ke hitakuyini, hileswi? Leswi va-Israyele afaka va swidjula avaswikumanga; kambe swikumiwile hi lava vahlawuliwiki; Kambe a nsalonyana wu tinonon'hwisile.

⁸ Swanga hileswi Kutraliwiki swaku: Xikwembu Nkulukumba avanyiki a moya wavurongo, ni mahlu lawa ya kuka mangavoni ni tindleve leti takuka tingayingeli, kuko siku dra namunhla.

⁹ Kutani na yene Davida ali: Na yone a minkhuvu yavu amindruluki mintlhamu ni mabohelo, akuva vawa vatakhatisiwa.

¹⁰ A mahlu yavu amamphume akuva vanga voni ni leswaku minhlana yavu miherekisiwa hi la kungahelikiki.

Huluko dra va-Matiko

¹¹ Navutisa nangweso nili: Xana loko vakhunguvanyekile, vaweli mfuri xana? Aswivanga tanu. Akuwa kwavu wuvi nkama wa kuhuluxiwa va-Matiko, akuva ava-Yuda vatrhama ni vukwele hi van'wana.

¹² Xileswo, loko a xidoho xavu xindruluki kulondrovota ka misava, na kone a kuhluleka kwavu kutireli vupfundri ku man'wana matiko, ngopfu-ngopfu kundruluka kwavu atava tovoko ledri drikulu.

¹³ Swoswi nibyela n'wine va-Matiko, mine ni mupostola wa va-Matiko, nitwalisa vutireleni byanga.

¹⁴ Akuva kumbe xana a van'we ku lixaka dranga vangava ni vukwele ha n'wine, vahuluxiwa.

¹⁵ Hikusa loko akutxukumetiwa kwavu, kubuyiseli kutlhanganisiwa ka misava, xana akuyamukeliwa kwavu kutava yini? Loko ange vutomi ku lava afaka vafile.

¹⁶ Hileswo-ke, loko swirangana swixwengile, na yo mbila ya xwenga. Loko a mutru wu xwengile, na to tinkambu ta xwenga.

¹⁷ Loko tinkambu tin'wana tiphatluliwile, kambe wene leswi unga nhlwari, utlhomiwa ansinyeni avutrham'wini bya tone; hikolahu utlhanganisiwi ni mutru uva ukuma ni nhome ya nhlwari lowu wa lisima;

¹⁸ ungatxhuki utikulisa, udrela tinkambu leti tremiwiki nambi ali kutikulisa, a hi wene uphamelaka mutru, kambe a mutru hi wone wu kuphamelaka.

¹⁹ Utanibyela leswaku a tinkambu leto tiphatluliwi akuva wene utlhomiwa kone.

²⁰ Switiyile. Tiphatluliwi hinkonta ya kukala kupfumela, kasi swoswi wene uyimi mbangwini lowo hikusa unikupfumela. Kambe ungatikukumuxi hinkonta ya leswo. Hikuhambana tivonele.

²¹ Hikusa, loko Xikwembu Nkulukumba anga tretrelelanga tinkambu leti afaka tili ta ntumbuluku, na wene angatikutretrela.

²² Lavisani, avunene ni kunono'nhwa ka Xikwembu Nkulukumba: Anonon'hwela lava va wiki, kambe a yentxa vunene ku wene, loko utrhama avuneneni byake, Hi ndlela yin'wana, na wene uta tremiwa.

²³ Nambi vone, loko vatrika kutrhama kuyaleni, vatatlhomiwa a nsinyeni; hikusa Xikwembu Nkulukumba ani ntamu wa kutlhela avatlhoma hi vumpswha nangweso.

²⁴ Hikusa leswi ungatremiwa a nhlwarini wa nhova, hikuhambana ni leswi i nga ntumbuluku, utlhomiwi anhlwarini lowu wunene. Hikolahu swa nabyala kutlhoma tinkambu ta nhlwari lowu wunene ansinyeni wa ntshima.

Kuhuluxiwa ka va-Yuda

²⁵ Hikusa anirandri vamakweru, leswaku n'wikohla hi xihundla lexi, (akuva n'wingatitxhuka n'witiyanakanya leswaku n'witlharihile). Leswaku Israyele hi tlhelo drin'we, leswaku ava-matiko hinkwavu vakondra vanhingena.

²⁶ Hikolaho, hinkwadru tiko dra Israyele dritahuluxiwa, swanga hi leswi kutraliwiki leswaku: A Muhuluxi atapfa Siyoni lweyi ataka trhindreta vubihi bya vana va Yakobe.

²⁷ Hi xolexi xipfumelelanu lexi nitaka xiyentxa na vone, loko nitava nisusi swidoho swavu.

²⁸ Hi kuyelana ni Ivangeli, a va-Yuda i valala va Xikwembu Nkulukumba hinkonta yenu. Kambe vahatama vava vahlawuliwa va Xikwembu Nkulukumba hinkonta ya vakokwana vavu.

²⁹ Hikusa Xikwembu Nkulukumba asusi leswi aswi nyikaka nambi kuhlawula leswi swiyentxaka.

³⁰ Swanga hi leswi na n'wine nkama mun'wana n'wingatiyalisa ku Xikwembu Nkulukumba, kambe swoswi, leswi va-Yuda vatiyalisiki, n'wine mi yamukeli kutretrelela ka Xikwembu Nkulukumba.

³¹ Hinkonta ya kuyala ka volavo, hi swoswi navone, volavo, swoswi vayalile akuva hikutretrelela kwenu vakuma kutretreleliwa.

³² Hileswo-ke, Xikwembu Nkulukumba ayentxi leswaku hinkwavu vandruluka vabohiwa va kutiyalisa, leswaku atakombisa ku vone hinkwavu kutretrelela kwake.

³³ Ahikukula ka vukosi bya Xikwembu Nkulukumba ni vutivi ni vutlhari byake! I mani angaswikotaka kutlhamuxela makungu yake ni kuyingelisisa tindlela ta xone!

³⁴ Hi laha mahlayaka swinene a Matralwa mali: I mani lwa tivaka miyanakanyu ya Hosi? I mani lwanga swikotaka kululeka Xikwembu Nkulukumba?

³⁵ Hi mani lweyi anga swikotaka kunyika xa ntxhumu akuva ntrhaku ata yamukela hakelo?

³⁶ Hi leswaku hinkwaswu swipfi ku Xikwembu Nkulukumba ni hinkwaswu swi kone ha Yene na i swake. Ku Xikwembu Nkulukumba akuve lidrumo hi minkama. Ni minkama Amen.