Rm 10 - Testamente Ledrimpswha ni Mapsalma

¹ Vamakweru, akunavela kambilu yanga ni xikhongoto xanga ku Xikwembu Nkulukumba hileswaku vahuluxiwa.

² Nitiyisa leswaku vani kutikarata kukulu hi Xikwembu Nkulukumba, ntsena vatikarata na vengena vutivi.

³ Hikusa leswi vakohliki hi vululami bya Xikwembu Nkulukumba, vadjulisisa kubekisa vululami byavu, a vatinyiketanga kululameni ka Xikwembu Nkulukumba.

⁴ Hikusa akuhela ka nawu hi Kriste, akuva kuhlayiwa mululami lweyi apfumelaka ku Yene.

Kuhuluxiwa ka vapfumeli hinkwavu

⁵ Nakone, Moxe a trali leswaku: A mhunu lweyi alandraka vululami lebyi byinga nawini, atahanya ha wone.

⁶ Kambe akululama loko ku fambelanaka ni kupfumela, ahlaya xileswi: Ungahlayi a mbilwini yaku uku: Hi mani lweyi angakotaka kuntlhantukela tilweni? (i nga leswaku, kuyentxa leswaku Kriste abuya);

⁷ Kumbe kuhlaya leswaku: Hi mani lweyi atakafulamela hansi ka vafi? (I nga leswaku, akuva atahumexa Kriste ku lava vakufa)?

⁸ Kolahu a matralwa mali yini? Aritu drile kusuhi na wene, a non'wini waku ni le mbilwini yaku. Hidroledri a ritu dra kupfumela ledri hi reraka drone.

⁹ Loko wene hi nomu waku utihlaya leswaku Yesu i Hosi ni le mbilwini yaku ukholwa leswaku Xikwembu Nkulukumba amupfuxile kuvafi, utahanya.

¹⁰ Hikusa a mhunu apfumela hi mbilu akuva a lulama, apfumela hi nomu akuva a huluxiwa.

¹¹ Swanga hileswi a Matralwa maliki: Lweyi a pfumelaka ku Yene angavina tingana.

¹² Xileswo akuna kuhambana makari ka va-Yuda ni va-Girika, hikusa yene i Hosi ya hinkwavu ni kunyika vukosi byake ku hinkwavu, lava muvitanaka.

¹³ Hikusa: Lweyo ni lweyo lweyi a vitanaka Hosi ata huluxiwa.

¹⁴ Kambe, xana vata khongotisa kuyini ku lweyi vangasikina pfumela ku yene? Kumbe vata pfumelisa kuyini loko vanga yingelanga kukhaneliwa ha yene? Kumbe vatayingelisa kuyini loko kungena lweyi a varerelaka Ivangeli?

¹⁵ Nakone vatarerisa kuyini loko vangarumiwanga? Swanga hi leswi kutraliwiki: ahikuxonga ka minenge leyi mitivisaka Ivangeli!

¹⁶ Kambe ahi hinkwavu lava yamukelaka Ivangeli. Ezaya ahlayisi xiswoswo aku: Tatana, i mani xana lweyi apfumelaka kuleswi afaka hi rera swone?

¹⁷ Hileswo-ke a kupfumela kupfa kuyingeleni, kambe akuyingela kupfa aritwini dra Xikwembu Nkulukumba.

¹⁸ Kutani mine navutisa: Kolahu avayingelanga na kukhaneliwa? Im, kunene vayingelile, mpfumawulu wavu wutwalile misaveni hinkwayu, na wone maritu yavu mayitlhasa avugan'wini bya misava.

¹⁹ Nitlhela nivutisa nili: Xana hileswaku a tiko dra Israyele adriswitivanga? Ku leswi, Moxe ayangulisa xileswi aku: Nitayentxa leswaku n'wine n'wivani matrhoho hi tiko ledri angaliki tiko; ni kuva ni vukwele hi tiko ledri dringayanakanyiwikiki.

²⁰ Mfuri Ezaya ahayengesa aku: Nikumiwi hi lava afaka vanganidjuli na nitinyiketi a kutivisisa ku lava afaka vangavutisi ntxhumu ha mine.

²¹ Na kasi hi tlhelo dra Israyele ati: Masiku hinkwavu ninalavuteli voko ku tiko dra kutiyalisa ni vakaneti.