Mt 9 - Testamente Ledrimpswha ni Mapsalma

Kuhanyisiwa ka wa kuwonyana swiro

¹ Kuti loko anhingeni abyatrhwini, awelela halahaya, ayatlhasa atikweni dra kwavu,

² vonani, vamutisela a mhunu wa kuwonyana swiro, na ali lihlakeni; loko Yesu avoni a kupfumela kwavu, aku ku lweyi wa kuwonyana swiro: Tiya ntamu n'wananga; a swidoho swaku swidrivaleliwile.

³ Kolahu van'we ku vatrali vapimisa vaku: Lweyi asandra Xikwembu Nkulukumba!

⁴ Kambe Yesu atiki ativa miyanakanyu yavu, avavutisa aku: Xana n'wiyanakanyela yini leswi swakubiha atimbilwini tenu?

⁵ Xana i mpswini leswi swinabyalaka? A kuhlaya leswaku: A swidoho swaku swidrivaleliwile, kumbe kuhlaya leswaku: Pfuka utifambela?

⁶ Kambe akuva n'witativa leswaku a N'wana wa Mhunu ani ntamu wa kudrivalela a swidoho amisaveni, aku ku lweyi wa kuwonyana a swiro: Pfuka, utitlakulela a vunanu byaku, utimukela.

⁷ Lweyi wa kuwonyana swiro apfuka, atimukela a kaya kwake.

⁸ Loko a switrhungu swivoni leswo, swiveni kutxhava, kutani switwalisa Xikwembu Nkulukumba, lweyi anyikiki ntamu wolowo ku vhanu.

Kuvitaniwa ka Matewu

⁹ Kuti loko Yesu ahundrela mahlweni, avona a mhunu lweyi valiki i Matewu, lweyi afaka atrhami ambangwini wa nhlengo, aku ku yene: Nilandre. Kutani Matewu asekeleka amulandra.

¹⁰ Kuhumelela leswaku loko Yesu atrhami akudeni, kuta vanyingi va vahlengisi ni vadohi, vatrhamisa atafuleni kun'we na Yesu ni vadondrisiwa vakwe.

¹¹ Loko a vafarisi vavona leswi vavutisa vadondrisiwa vakwe vaku: Hayini a Mudondrisi wenu ada kun'we ni vahlengisi ni vadohi xana?

¹² Kambe loko Yene aswiyingelile, aku ku vone: Lava vanga vatomi avadjuli n'anga, kambe ntsena lava vavabyaka.

¹³ Fambani n'wiyadondra a ntlhamuxelo wa maritu lawa maliki: Nidjula a lilondro, mange magandrelo. Hikusa mine anitelanga kuvitana valulami, kambe niteli kuvitana vadohi akululameni.

Mhaka ya kutitrona

¹⁴ A vadondrisiwa va Yohana Mubabatisi vatrhindrekeli ku Yesu vamuvutisa vaku: Xana hine ni vafarisi hititronela yini ha kanyingi, na kasi a vadondrisiwa vaku avatitroni?

¹⁵ Yesu aku ku vone: Xana swakoteka leswaku a vakhapi va muteki vadrila na muteki ahali na vone? Kambe wata a nkama lowu a muteki atakasusiwa ku vone; laho-ke vatatitrona.

¹⁶ Angakone lweyi angarungelaka xihlama xa kapulana drimpswha axiyambalwini xa khale, hikusa a xihlama lexi ximpswha xingawonyana, xihandrula a xiyambalu lexi xa khale, akuhandruka ka xone kuva loku kukulu.

¹⁷ Na swone avatxheli a vhinyo drimpswha aminkwameni ya khale, hikusa a vhinyo dringahandrula a minkwama, kuhalaka a vhinyo na yone minkwama mihoneka. Kambe vatxhela a vhinyo drimpswha aminkwameni mimpswha, kutani swibekiseka hi vubiri bya swone.

Kupfuxiwa kufeni ka wanhwanyana ni kuhanyisiwa ka mbabyi

¹⁸ Loko Yene ahavabyela leswo, kutlhasi mun'we wa murangeli wa sinagoga, akhisama amahlweni kwake aku ku yene: A n'wananga wa wanhwanyana ahakufa swoswi; kambe tana utatamutlhanteka a voko draku, atahanya.

¹⁹ Yesu ahangasekeleka, amulandra kun'we ni vadondrisiwa vakwe.

²⁰ Kolahu mun'we wa wansati, lweyi afaka avabya hi mavabyi yakuhalata a ngati, hi xipimu xa khume dra malembe na mabiri, atrhindrekela ku Yesu hi le ntrhaku, akhumba a makhaxa ya xiyambalu xakwe.

²¹ Hikusa afa atipimisela aku: Loko nikhumba ntsena a xiyambalu xakwe, nitahanya.

²² Yesu andrulukiki avona lweyi wansati, aku ku yene: Tiya mbilu, n'wananga! A kupfumela kwaku kukuhanyisile. A kusukela ankameni lowo lweyi wansati ahanyisiwa.

²³ Loko Yesu atlhasi a kaya ka lweyi wa murangeli, avona a vayimbi va tinanga ni switrhungu leswi swibaka pongwe,

²⁴ aku ku vone: Sukani! Hikusa a nhwanyana angafanga, ali khutriyela. A vhanu vamuhleka,

²⁵ kuti loko a xitrhungu xihumexiwi handle, Yene anhingena, akhumba a voko dra lweyi wanhwanyana, kutani a nhwanyana asekeleka.

²⁶ Kutani atikweni ledri hinkwadru kuhangalaka a mhaka leyi yiyentxekiki.

Yesu ahanyisa a vakufa-mahlu vabiri

²⁷ Loko Yesu asuki kone, a vakufa-mahlu vabiri vamulandra, va bandlukana vaku: N'wana Davida, hi yentxeli vurombe!

²⁸ Loko Yesu anhingeni ndlwini, lava vakufa-mahlu vabiri vamutrhindrekelela, Yene avavutisa aku: N'wapfumela leswaku ningaswikota a kuyentxa leswo? Vone vayangula vaku: Im'na, we HOSI!

²⁹ Kutani Yesu avakhumba a mahlu aku: Akuyentxiwi hi laha n'wipfumelaka ha kone!

³⁰ Kutani a mahlu yavu mapfuleka. Yesu avaleleta hi kutiyisa aku: Tivonelani leswaku kungavini mhunu lweyi aswitivaka.

³¹ Volavo kambe vaku vahuma, vamutwalisa atikweni hinkwadru.

Kuhanyisiwa ka lweyi wa mbheveve

³² Vaku na vasuka, vamubuyisela mhunu wa mbheveve lweyi afaka ani demoni.

³³ Loko Yesu ahlongoli demoni, kutani lweyi afaka ali mbheveve asungula kukhanela. A vhanu vahlamala ngopfu vaku: Ahingivona swanga hi leswi a Israyeleni!

³⁴ Kambe a vafarisi vaku: Ahlongola mademoni hi hosi ya mademoni.

A ntrhovelo ni vatiri

³⁵ Yesu afa afamba-famba hi miti ni swimitana, adondrisa amasinagogeni, arera Ivangeli ya Mfumu wa Matilo, na ahanyisa hinkwatu tinxaka ta mavabyi ni minkaralu.

³⁶ Loko avona a switrhungu, aswitwela vurombe, hikusa afa swikarali ngopfu, swihangalakile, swanga hi tihamba leti tingekena mubyisi.

³⁷ Kutani aku ku vadondrisiwa vakwe: Hakunene a ntrhovelo i wukulu, kambe a vatiri i vatrongo.

³⁸ Hileswo-ke, kombelani ku N'winyi wa ntrhovelo akuva aruma a vatiri akutrhoveleni kwake.