Mt 7 - Testamente Ledrimpswha ni Mapsalma

N'wingayavanyiseni

¹ N'wingayavanyiseni, akuva n'wingatiyavanyisiwa na n'wine.

² Hileswo-ke, n'witayavanyisisiwa xiswoswi na n'wine n'wiyavanyisisaka xiswone a vambeni; na kone a mpimu lowu n'witakapima ha wone, na n'wine n'witapimiwa ha wone.

³ Hayini ulavisa a ntwanyi lowu wunga tihlweni dra makwenu, na ungalangusi a ntrandra lowu wunga tihlweni draku?

⁴ Utiyisa kuyini a kubyela makwenu leswaku: Nitriki nikususa a ntwanyi lowu wunga tihlweni draku, na kasi uni ntrandra a tihlweni draku?

⁵ N'wamandrendre! Susa kusungula a ntrandra lowu wunga tihlweni draku, hi kone-ke utakavona swinene a ntwanyi lowu wunga tihlweni dra makwenu.

⁶ N'winganyikeni timbyana a mintxhumu ya kuhlawuleka, na kone n'wingatxukumeteleni atinguluveni a maperola yenu, akuva tingatitxhuka timakandriyetela hi minenge ya tone, titlhela tin'windrulukela tin'wiphatlulela.

Kukhinyela akukombeleni

⁷ Kombelani, n'witanyikiwa; djulani, n'witaswikuma; gongondrani, n'witapfuleliwa.

⁸ Hikusa lweyi akombelaka, awanyikiwa; ni lweyi adjulaka, awaswikuma; ni lweyi agongondraka, awapfuleliwa.

⁹ Hi mani ku n'wine lweyi anganyikaka a ribye ku n'wanake, loko amukombela a kati xana?

¹⁰ Kumbe angamunyikaka nyoka loko amukombela a nhlampfi, xana?

¹¹ Nambi n'wine n'winga vamfani n'witivaka a kunyika mintxhumu leminene ku vanenu, ngopfu Tatana wenu, lweyi anga Matilweni, atanyika leswi swinene ku lava vamukombelaka!

¹² Hileswo-ke, hinkwaswu leswi n'widjulaka leswaku van'wana van'wiyentxela, na n'wine vayentxelani swone; hikusa lowu, hi wone Nawu ni vaprofeta.

Tindlela tibiri

¹³ Nhingenani hi nyangwa leyi ya kukhuma! Hikusa a nyangwa ni ndlela leswi swiyisaka akulahlekeni swiyanami ngopfu, mfuri i vanyingi lava vanhingenaka ha kone;

¹⁴ hikusa yikhumile a nyangwa, ni ndlela yilalile leyi yiyisaka avutomini, ni lava vayikumaka i vatrongo.

Vaprofeta va madrimi

¹⁵ Tivonelani ku vaprofeta va madrimi, lava vataka ku n'wine na vayambali swanga tihamba, kambe hi le ndreni i mahava lawa mahahlulaka.

¹⁶ N'witavativa hi mihandru yavu; kumbe xana vakhaya vana va nvhinya amitweni, ni makuwa ankanyini?

¹⁷ Hi swoleswo a nsinya hinkwawu lowu wunene wuhumexa mihandru leminene, ni nsinya lowu wa kubiha wuhumexa mihandru ya kubiha.

¹⁸ A nsinya lowu wunene aswikoteki akuva wuhumexa mihandru leyi ya kubiha, ni nsinya lowu wa kubiha aswikoteki akuva wuhumexa mihandru leminene.

¹⁹ A minsinya hinkwayu leyi mingahumexikiki mihandru leminene mitremiwa mitxukumetiwa andrilweni.

²⁰ Hileswo-ke, n'wine n'witavativa hi mihandru yavu.

Maritu ni mintiro

²¹ Ahi hinkwavu lava vanihlayaka: HOSI, HOSI! Vatakanhingena a Mfun'wini wa Matilo, kambe ntsena lava vayentxaka a kurandra ka Tatana wanga lweyi anga Matilweni.

²² Asikwini ledro vanyingi vataku: HOSI, HOSI, xana ahaprofetanga hi vito draku? Ahihlongolanga mademoni hi vito draku? Ahayentxanga ni mahlolana lawa manyingi hi vito draku?

²³ Kutani mine nitavayangula niku: Anisami nin'witiva. Sukani ku mine, n'wine vayentxi va swidoho!

Xifaniso xa masungulu ya tiyindlu

²⁴ Lweyi ayingelaka a maritu yanga ava amayentxa, atafananisiwa ni wanuna lweyi atlharihiki, ayakiki a yindlu yake aribyeni.

²⁵ Kutani kuna timpfula tinyingi, kukukumuka ni milambu, ni timheho tihunga, titataba a yindlu leyo; kambe ayiwanga, hikusa afa yiyakiwi aribyeni.

²⁶ Kambe lweyi ayingelaka a maritu yanga ava angamayentxi atafananisiwa ni wanuna wa singe, ayakiki a yindlu yake apfunyeni.

²⁷ Kutani kuna mpfula, kukukumuka ni milambu, ni timheho tihunga titataba a yindlu leyo yiva yiwa, a mawela ya yone mava lawa makulu!

²⁸ Loko Yesu aheti kukhanela a maritu lawo, a switrhungu swihlamala hi dondriso drakwe,

²⁹ hikusa afa avadondrisa swanga hi lweyi angani vuhosi, angafani ni vatrali vavu.