Mt 28 - Testamente Ledrimpswha ni Mapsalma

Kupfuka ka Yesu akufeni

¹ Antrhaku ka Savata, ampundrwini wa siku dra kusungula dra vhiki, Maria wa le Magdala na Maria mun'wana vafambi vaya vona a xira.

² Kutani vonani, kuvi ni kutrekatreka loku kukulu ka misava, hikusa a ntrumi ya HOSI afa yixiki hi le Tilweni, yitrhindrekela axireni yipfingula a ribye, yitrhamisa ku drone;

³ a mavonekela ya yone afa mahamba swanga i lihati, ni swiyambalu swa yone afa swili swa ntlhohe swanga xitrhwatrhwa;

⁴ kutani a valaveleli vatrekatreka hi kutxhava yone vava vandruluka swanga hi vafi.

⁵ A ntrumi yiku ku vavasati lavaya: N'wine n'wingatxhaveni; naswitiva leswaku n'widjula Yesu, lweyi avambiwiki.

⁶ Anga kone la, hikusa apfukile kufeni, swanga hi leswi afaka ahlayile. Tanani n'witata vona mbangu lowu afaka ayetleli ku wone.

⁷ Na swone kahlulani n'wiyabyela a vadondrisiwa vakwe leswaku apfukile kufeni, vonani yene an'wirangela aya Galileya, hi lomu n'witakayamuvona kone. Hi swoleswo, nin'wibyelile.

⁸ Kutani vahatla vasuka axireni hi kutxhava, ni kunyoxa loku kukulu, vatrutruma vayabikela a vadondrisiwa vakwe.

⁹ Kutani vonani, Yesu avatlhangaveta aku ku vone: Xawani! Kutani vone vatrhindrekela ku Yene, vamukhoma a minenge, vamugandrela.

¹⁰ Yesu aku ku vone: N'wingatxhaveni. Fambani n'wiyabikela a vamakweru leswaku vaya Galileya; hi lomu vatakanivona kone.

Madrimi ya vakulu va tiko

¹¹ Loko a vavasati vahafamba, vonani, van'we va valaveleli, vaya a mutini, vayadrungulela a vaprista lava vakulu hinkwaswu leswi swihumeleliki.

¹² Kutani vone vahlengeletana ni vakulu va tiko, vakhanela makungu, vanyika a masotxha a mali leyi yakutala,

¹³ vavaleleta vaku: Hlayani leswaku a vadondrisiwa vakwe vatile ni vusiku, vatatamuyiva, na hine hiyetlelile.

¹⁴ Loko a mufuminyana aswiyingela, hine hitamukholwisa, hin'wixirelela.

¹⁵ Vone-ke, vayamukela a mali, vayentxisa xiswoswi vabyelisiwiki xiswone. Kutani a ritu ledro dritwali amakari ka va-Yuda, kutlhasa ni namuhla.

Yesu ahumelela ku vadondrisiwa vakwe a Galileya

¹⁶ Kutani a vadondrisiwa lava va khume na mun'we vasuka vaya Galileya anhaveni leyi Yesu afaka avaleleti yone.

¹⁷ Loko vamuvona, vamukhisamela, kambe van'wana afa vaganaganeka.

¹⁸ Kolahu Yesu atrhindrekela akhanela navu aku: Ninyikiwi ntamu hinkwawu ni vuhosi atilweni ni le misaveni.

¹⁹ Hileswo-ke, fambani n'wiyadondrisa a matiko hinkwawu, n'wivababatisa hi vito dra Tatana ni dra N'wana ni dra Moya wa Kuxwenga,

²⁰ n'wivadondrisa a kubekisa hinkwaswu leswi nin'wileletiki swone. Na swone lavisani, mine nina n'wine masiku hinkwawu kukondra kuhela a minkama.